3
Mani talotaṉa sa vasileana siṉia ehara,
siṉia koha,
siṉia tinago ta hinikodi,
na loke vina betona sa mua ṉinovaṉovala pa tie!
Sa pidalana sa iku sekesekeana,
sa qaleṉanadi ri na totopili,
haqaladi ri na hose
meke sa zorudi ri totopili varipera!
Haqala la variperadi sari tie koi hose,
keana kumana sari vedara
meke sari hopere si ṉedala!
Soku si bakora,
soku sari tie matedi,
sari tini tomate si lopu boka ta nae,
meke ta tubarae ni tu rina tie.
Ta evaṉa si hire koa gua koasa hiniva kaleana tanisa maqota,
ta doṉo lea nia rini, sa barikaleqe matemateana asa,
va pinausu butubutu si asa koari hahanana tuturue tanisa
meke vagi tie koari nana tinavete vakuvakutae.
Zama vura guahe se Zihova Tadi na Qeto Minate, “Arau kana igo si agoi.
Kote kepuhu sage la nia Rau pa isumatamu sa mua tivitivi,
kote va dogoro ni Rau koari na butubutu sa mua tini dodorena
meke koari na butubutu baṉara sa kinurekure tamugoi.
Sapu boni humaṉa hikare si kote nobi nigo Rau,
kote hakohako va tana igo Qua
meke kote na vina dodogoro tavete guni nigo Arau.
Doduru pu dogoro igo si kote govete meke zama,
‘Se Ninive si ta huara! Esei kote kabo ia?’ kote gua.
Pavei si kote boka dogoria rau si keke tie pude va manoto igo?”
Loke tie hokara!
Vea, agoi leana hola nia si pa Tibisi,
sapu koa pa kali Ovuku Naelo,
sapu koa vari likohae nia na kolo?
Sa ovuku si sa nana hukata koari na kana,
sa kolo sa nana goba.
Loke kokoina sa nana ṉiniraṉira koari na tie pa Itiopia meke Izipi;
Itiopia meke Libia tugo sari kaiqa nana tie varitokae pa vinaripera.
10 Gua ba ta zau vagi si asa
meke la pa tinaraovo.
Sari nana koburu si ta muzara va mate
koari doduru varipaza siraṉa.
Mudumudukeda ni rini sari dia palabatu vasileana,
meke doduru dia tie nomadi si ta pusi seni.
11 Agoi Ninive ba kote podalae viviri mo;
kote govete la tome pa keke vasina si agoi
tome nia sa mua kana.
12 Doduru mua vasileana ta gobadi si guana huda piqi
sapu sagana sari dia vua kekenu;
totoso ta zoru rini
si hoqa la pa ṉuzu tie mo sari vuadi.
13 Doṉo la ia sa mua qeto tie varipera,
doduru si guana barikaleqe mo!
Sari sasada koasa mua popoa
si tukele toa la koari mua kana;
na ele sulu i na nika sari rotodi.
14 La utuvu kolo veko, va nama nia sa rinapata,
va ṉiṉira i sari mua goba!
Heni i sari pepeso bupara,
mamu tavete biriki,
mamu tuvaka ia sa goba!
15 Ba na nika kote gani igo;
na vedara kote seke gore nigo
meke kote guana kupokupo si asa pu atu gani panigo.
Mu tuturei soku guana kupokupo si agoi,
va omunu guana rovana kupokupo!
16 Ele va soku hola i goi sari mua tie holuholu
osolae soku holani rini sari na pinopino pa galegalearane,
ba gua tugo na kupokupo si arini sapu gania sa popoa
beto si tapuru taloa dia.
17 Sari mua tie kopu si soku guana kupokupo,
sari mua palabatu tinavete si guana rovana kupokupo
sapu pa rane sapu ibu hola si hake dia koari na goba
ba totoso sage sa rimata si tapuru taloa dia,
meke loke tie tumae nia pavei la.
18 Kei baṉara pa Asiria, sari mua sepati si puta;
sari palabatu pa vasileana si eko magogoso.
Sari mua tinoni si hurakatae koari na toqere
meke loke tie pude varigarani.
19 Loketoṉa kote boka salaṉa ia sa tubu tamugoi;
kote mate nia goi sa bakora isa.
Doduru pu avoso nia sa inavosomu
si popohara nia sa hinoqa tamugoi,
ura esei na lopu va nonoga ia
sa mua ṉinovaṉovala kaleanadi sapu loke kokoidi?