1 Gamu na koburu, si mi va tabei sari na tiatamamia, koasa mia linulina sa Baṉara, sina asa tugo si toṉoto pude tavetia gamu.*Kol 3:20 2 “Mu va lavatia sa tamamu meke sa tinamu,” asa tugo sa tinarae kekenu sapu koa ia na vina tatara sapu guahe:*Ekd 20:12; Diut 5:16 3 “Pude leana sa mua kinokoa, meke kote toa va gelenae pa popoa pepeso si goi,” gua.

4 Gamu na tiatamadia rina koburu, mi lopu va bubugori sari mia koburu, ba mi turaṉa sage ni meke va toṉoti si arini pa korapa vina tumatumae tanisa Baṉara.*Kol 3:21

5 Gamu na pinausu*Sari na pinausu pukerane tadi na tie si ta holudi pude na tinagotago tanisa tie pu holuna., mi va tabei sari na mia palabatu pa korapa mia pinamaṉa na minatagutu. Mi tavete va hinokaria si hie pa korapa bulomia, kekeṉoṉo guana tavete la nia gamu si asa koe Karisito.*Kol 3:22-25 6 Lopu tale pa totoso kopu totokoni gamu mo arini, pude va qetui mo si arini, gua. Ba sina koa guana pinausu te Karisito si gamu, ke mi tavetia sapu gua hiva nia sa Tamasa, pa doduru bulomia. 7 Mi tavetavete qetuqetu guana sapu nabulu nia gamu se Zisu sa Baṉara, meke lopu tale koari na mia palabatu mo. 8 Sina gilania mia sapu kote hopeke pia gamu sa Baṉara si gamu koari na tinavete leadi pu taveti gamu, be na pinausu, babe lopu na pinausu si gamu.

9 Gamu na palabatu si mi vata dogoro nia tugo sa hahanana leana koari na mia pinausu, meke lopu va mataguti. Mamu gilania sapu agoi, meke sari na mua pinausu si tanisa Baṉara mo pa Maṉauru, sapu lopu hoke toka kale nia si keke tie pa vinaripitui.*Diut 10:17; Kol 3:25, 4:1

10 Ego, vina betobeto si mi koa va ṉiṉira koasa mia sinoto koasa Baṉara, meke koa sa Nana ṉiniraṉira lavata. 11 Mi va sagei sari doduru poko varipera saripu ponini gamu sa Tamasa, pude mi turu va ṉiṉira meke varipera koari na tinoketoke sekesekeidi tanisa Devolo sapu se Setani. 12 Sina lopu varipera la pa tie si gita, ba koari soku tomate kaleadi na ṉiṉiradi pa galegalearane meke pa maṉauru, sari na binalabala huporodi, meke sari na ṉiniraṉira kaleadi, meke sari na tomate kaleadi pu vahesi rina tie koari na rane kaleadi hire. 13 Ke mi va sage betoi sari na poko varipera te Tamasa, meke be pana raza mae sa kinaleana, si lopu kaqu boka va rizu gamu sa kana si gamu; meke sipu ele tavete betoi gamu sari doduru gua pu bokai gamu, si kaqu turu hola pa minataqara si gamu.

14 Ke sipu ele va sage betoi gamu sari na poko varipera, si mi turu va nabu. Mi dokoho nia sa hinokara, mi va sagea sa poko raqaraqa tana tinoṉoto.*Ais 11:5, 59:17 15 Mi va namanama pude tozia sa Inavoso Leana tanisa binule, kekeṉoṉo guana va sagei sari na mia sadolo.*Ais 52:7 16 Pa doduru totoso si mi paleki sari na mia lave rinaṉeraṉe, pude boka kasi pani gamu sari na tupi huruṉudi pu gona ni e Setani, sapu sa ṉatina sa kinaleana. 17 Mi va hakea sa toropae varipera tanisa tinaharupu, mamu vagia sa magu varipera tanisa Maqomaqo Hope, sapu sa zinama te Tamasa.*Ais 59:17 18 Mi varavara doduru totoso pa tinuraṉa tanisa Maqomaqo Hope, meke pa doduru mia vinaravara, si mi tepa sa tinokae te Tamasa. Pa ginugua asa, si mi koa va namanama, mamu lopu makudo varavara toka ni sari doduru tie te Tamasa. 19 Mi varavara toka nau tugo, pude boka poni nau Tamasa gua sapu kaqu zama nia rau, meke pana zama rau, si boka tozi va mataqara nia rau sa Inavoso Leana sapu lopu ta gilana koari na rane la hiroi. 20 Ta garunu si rau koe Karisito pude tozia sa Nana inavoso, meke kamahire si koa pa vetu varipusi. Ke mi tepa ia sa Tamasa, pude toka nau, pude maqu zama va mataqara nia rau sa Inavoso Leana, gua sapu garoqu tugo pude tavetia.

21 E Tikikasi, sa tasida ta tataruena, meke na nabulu ta ronuena pa tinavete tanisa Baṉara, asa kote vivineini gamu sari doduru inavosoqu rau, pude boka gilani gamu gua sapu korapa evaṉi rau.*TTA 20:4; 2 Tim 4:12*Kol 4:7-8 22 Gua asa ke garunu atu nia rau koa gamu si asa, pude vivinei ni koa gamu sari doduru inavoso mami gami, meke pude va ṉiṉirai sari bulomia.

23 Sa Tamasa sa Tamada, meke sa Baṉara Zisu Karisito, si mani vatua koa gamu doduru tamatasi koe Karisito sa binule, sa tataru, meke sa rinaṉeraṉe. 24 Mani koa koa gamu doduru sa tataru variharupi te Tamasa, koa gamu pu tataru nia sa nada Baṉara Zisu Karisito koasa tataru toa holana.