10
1 Izireli si na huda vaeni sapu repaha va labe lelaṉana;
vua va soku si asa pude gana telena.
Totoso soku nono la sari nana vuvua,
si kuri va soku hope tugo si asa;
totoso tagotago sari tie pa dia pepeso,
si va sari i rini sari dia patu hopedi koari na vinahesi beku.
2 Sari bulo dia si sekesekei,
ke kamahire si kaqu vagia rini sa laena sa dia sinea.
Kote seke goreni Zihova sari dia hope
meke huari sari dia patu hopedi.
3 Totoso asa kote zama si arini, “Gami si loke mami baṉara
sina lopu va lavata ia gami se Zihova;
gua ba pude tago ia gami si keke baṉara
si nasa si kote boka tavete poni gami sa?”
4 Soku vina tatara si tozi rini,
zama tokotokoro kokoha tugo
meke tavete vinariva egoi;
gua ke sa vari turaṉa la pa koti si ari gana
guana duduli poizini pa inuma sapu lopu ele ta letena.
5 Saripu koa pa Sameria si matagutu,
vea beka sa dia beku bulumakao pa Beti Aveni* Mu tiro vinabakala pa vesi Hoz 4:15., gua.
Na kote kabo ia ri nana tie si asa,
meke gua tugo sari hiama sapu vahesi beku di,
arini pu qetuqetu nia sa tinolava tanisa,
sina ta vagi palae si asa koa rini pu la pa tina raovo.
6 Kote ta paleke la si asa pa Asiria
guana dia vinariponi koasa baṉara lavata vasina.
Se Iparemi si kote va sisire nia rini;
se Izireli si kote kurekure ni sari nana beku.
7 Se Sameria meke sa nana baṉara si kote ale taloa
guana keke umumu huda pa beru kolo.
8 Sari vasidi ululudi sapu kaleanadi* Sa vasina ululu sapu kaleana hola si Betolo. si kote ta huara.
Asa sa sinea nomana tadi pa Izireli.
Sari hilibubuku na hiqohiqo rakihi si kote toqolo vasina
meke nobi sari dia hope.
Totoso asa kote zama si arini koari na toa, “Tamunu gami!” kote gua,
meke koari na toqere si, “Hoqa mae gami!” gua.* Lk 23:30; Rev 6:16
Vilasa ia e Zihova se Izireli
9 “Podalae pa totoso pa Qibea, si tavete va sea si agoi Izireli,
meke vasina mo si koa agoi.
Vea, lopu kamo la i tu na vinaripera
saripu tavete va kaleana pa Qibea?* Sa butubutu te Benisimane si tava mate pa Qibea koari na dia sinea.* Zaz 19:1-30
10 Totoso hiva, kote va kilasi Arau si arini;
kobi butubutu si kote varigara pude raza i
pude va kilasi koari dia soku ṉavulu sinea.
11 Izireli si na bulumakao manavasana
sapu malumu sisigiti pude varipaqaha ni sari huiti;
ke kote vekoa Rau sa ioki d
koasa rua leleana tanisa.
Kote garunu zuzuku ia Rau se Iparemi,
meke Ziuda kote daku ia sa geligeliana,
meke Izireli kote geli va malohoro ia sa pepeso.
12 Lete ia sa tinoṉoto, pude mua si asa,
mamu paketia sa vuana, sa tataru sapu loke kokoina,
mamu geli ia sa pepeso sapu lopu ele ta umana;
ura na kamo he sa totoso pude mu hata ia se Zihova,
pude mani mae meke titisi atu nia sa tinoṉoto koa goi.* Zer 4:3
13 Ba ele lete ia tu goi sa kinaleana,
ele paketia tu goi sapu kaleana,
ele hena ia tu goi sa vuana sa sinekesekei,
sina ele kalavarae si agoi koasa mua ṉiniraṉira telemu
meke koari mua soku tie varipera.
14 Ke sa vevehena sa vinaripera si kote sage la raza koari mua tinoni,
pude sari doduru mua vasileana ta gobadi si kote ta huara,
gua sapu huara ia Salamanu si pa Beti Arabeli koasa rane varipera,
totoso sapu ta hiru pa pepeso sari koburu meke sari tinadia.
15 Gua asa si kote ta evaṉa koa goi, Betolo,
sina sa kinaleana tamugoi si noma hola.
Pana maraqata mae sa rane asa,
si kote ta huara taloa hokara sa baṉara pa Izireli.