4
Koasa rane asa,
ka zuapa barikaleqe kote tuqe vagia si keke tie
meke zama, “Haba gami!
Telemami kote hata ginani meke poko;
malumu gami mo pude ta poza nia sa pozamu.
Mu vagi pania sa mami kinurekure!”
Kaqu Tava Vaqura Pule sa Popoa Zerusalema
Koasa rane asa, sa Lelaṉana e Zihova si kote tolavaena meke marilaena; meke sa vuana sa pepeso si kote na qinetuqetu meke tinolava tadi pu koa hola pa Izireli. Arini pu koa hola pa Zaione, pu lopu taluarae pa Zerusalema, si kote ta pozae hopedi, arini pu ta kubere pozadi meke korapa koa pa Zerusalema. Meke kote vulasa pani e Zihova sari na sinea tadi na barikaleqe pa Zaione, kote va via pani Sa sari ehara pa Zerusalema pa korapa Maqomaqona Sa pa vinaripitui meke pa nika. Meke kote tavetia e Zihova koarini pa toqere Zaione, meke koari doduru pu varigara vasina, si keke lei pana rane meke na huruṉu nika pana boṉi, meke sa ṉinedala te Tamasa si kaqu nobia sa doduruna sa vasileana nomana.* Ekd 13:21, 24:16 Kote na ipi si asa pude aqoro koasa ṉada pana rane meke na vasina pude tome koari na ruku na raneboṉi.

*4:5 Ekd 13:21, 24:16