37
Tepaia sa Baṉara sa Tinokae te Aisea
(2 Baṉara 19:1-7)
1 Sipu avosia tugo Hezikaea, sa baṉara, sa inavoso, si daku rikatia sa sa nana poko meke va sage poko baika, meke nuquru la pa Zelepade te Zihova si asa. 2 Garunu lani sa sari Eliakimi sa palabatu kopu pa vetu baṉara, Sebana sa tie kubekubere, meke sari ṉati hiama pude la koe Aisea sa poropita tuna Emosi. Va sage poko baika beto sari doduru. 3 La tozi nia rini se Aisea, “Guahe si zama nia e Hezikaea: Sa rane hie si na rane tinasuna, vinakilasa meke na kinurekure, gua puta totoso va namanama podo sa koburu, ba loke ṉiniraṉira si koa pude podo si asa. 4 Hokara ele avosi tu e Zihova sa mua Tamasa sari doduru zinama pu zama ni sa palabatu varipera sapu garunu mae nia sa baṉara pa Asiria, pude mae va sisire nia sa Tamasa toana. Mani va kilasi Sa sarini pu zama ni sari zinama pu avosi e Zihova sa mua Tamasa. Mu varavara poni gami sapu gami ka visavisa mami pu korapa koa hola.”
5 Totoso kamo la sari palabatu te Hezikaea sa baṉara koe Aisea, 6 si zama la i Aisea si arini, “Tozi nia sa mia baṉara, ‘Hiera gua si zama nia e Zihova: Mu lopu matagutu nia sa inavoso sapu avoso nia goi. Sari zinama pu zama ni sa nabulu tanisa baṉara pa Asiria sapu va paraparaṉa mae koa Rau. 7 Mu avoso mae! Kote vekoa Rau si keke binalabala koa sa pude totoso vagia sa si keke inavoso, si kote kekere pule mo si asa pa nana popoa soti, meke vasina kote vari poni nia rau pude ta seke va mate si asa pa vedara.’ ”
Va Balau Pule La sari pa Asiria koe Hezikaea
8 Totoso avoso nia sa palabatu varipera sapu ele taluarae pa Lakisi sa baṉara pa Asiria, si kekere pule si asa meke la dogoria sa sa nana baṉara korapa varipera pa Libina. 9 Ego, vagia Senakeribi si keke inavoso sapu sa qeto minate pa Izipi, sapu turaṉi sa baṉara Tirihaka pa Itiopia, si korapa mae pude raza ia si asa, gua. Totoso avosia sa sapu gua asa, si garunu la zinama si asa koe Hezikaea sapu zama guahe: 10 “La zama guahe koe Hezikaea sa baṉara pa Ziuda: Mu lopu va malumia sa mua tamasa sapu raṉe ia goi pude koha igo pana zama si asa, ‘Zerusalema si lopu kaqu ta vala koasa baṉara pa Asiria,’ gua. 11 Ele avoso ni mo goi gua sapu taveti rina baṉara pa Asiria koari doduru popoa, sapu huara beto pani rini. Meke gamu si vea, kote ta harupu tugo? 12 Vea, harupi tugo ri na dia tamasa sari na butubutu sapu ta huara koari na tamaqu kenudi, sapu sari tamasa tadi pa Qozani, Harani, Rezepi, meke sari tie pa Idini sapu koa pa Telasa? 13 Avei sa baṉara pa Hamati, sa baṉara pa Arapadi, sa baṉara koasa vasileana lavata pa Sepavaimi, babe pa Hena meke pa Iva?”
14 Meke vagia Hezikaea sa leta koari tie paleke inavoso meke tiro ia sa. Beto si sage la si asa pa Zelepade te Zihova, meke la repahia sa pa kenuna e Zihova, 15 Meke varavara la koe Zihova se Hezikaea: 16 “Kei, Zihova Tadi na Qeto Minate, Tamasa pa Izireli, habotu Mua koasa Mua habohabotuana Baṉara pa vari korapadi rina mateana serubimi. Agoi mo telemu sa Tamasa pa doduru butubutu pa popoa pepeso. Agoi mo tavetia sa maṉauru meke sa pepeso.*Ekd 25:22 17 Mu va taliṉa mae, Zihova, Mamu va avoso mae: tukeli Matamu, kei Zihova, Mamu dogoro gami; avosi sari doduru zinama pu garunu mae ni e Senakeribi pude zama ṉoṉovala Igo si Agoi sa Tamasa toana. 18 Kei Zihova, na hinokara tugo bisa, sapu sari baṉara pa Asiria si huara inete i sari doduru tie arini meke sari dia popoa. 19 Meke gona pani rini sari na tamasa tadi na butubutu arini pa nika meke sulu pani, sina lopu na tamasa si arini, ba na huda mo meke na patu, sapu peqoi mo ri na tie pa limadia. 20 Zihova mami Tamasa, harupu gami pa limana sa, pude madi gilania ari doduru butubutu pa popoa pepeso sapu Agoi Zihova eke mo, sa Tamasa,” gua si asa.
Sa Inavoso te Aisea La koa sa Baṉara
(2 Baṉara 19:20-37)
21 Meke garunu la inavoso se Aisea, sa tuna Emosi, koe Hezikaea, “Hiera gua si zama nia e Zihova, sa Tamasa pa Izireli: Ele avosia Rau sa mua vinaravara mae koa Rau pa guguana e Senakeribi, sa baṉara pa Asiria, 22 hiera sa zinama sapu zama la nia e Zihova koasa:
‘Zaione sapu guana vineki vaqura,
si doṉo gore nigo meke va sisire nigo sa.
Sa vasileana Zerusalema, guana tuna vineki,
si hiruhiru nia sa batuna totoso govete taloa si agoi.
23 Esei si va karikari ia meke paraparaṉa la ia agoi?
Na koe sei si kukukili va noma la si agoi
meke va eṉeṉa sage la matamu pa vina titie?
Na koa Sa pu Hopena pa Izireli mo!
24 Koari na mua tie paleke inavoso
si soku zinama va karikari la koe Zihova si ipa ni goi.
Meke zama guahe si agoi,
“Koari na qua totopili varipera sokudi
si kamoa rau sa vasina sapu ululu gua ri na toqere,
kamo pa batu toqere pa Lebanoni.
Sari na huda sida ululudi vasina si maho gore ni rau,
gua tugo sari na huda paeni ta okoraedi.
Kamoi rau sari vasidi sapu ululu pa ululu,
koari na hudahuda sapu leleadi hola.
25 Ele geli berukehe si rau pa popoa seu
meke napoa sa kolo vasina.
Koari ola nenequ
si ene va popa pani rau sari doduru tototolo pa Izipi,” gua.
26 Vea, lopu ele avosia tu goi?
Nake pukerane tu zama veko nia Rau.
Koari na rane ele hola la tu si balabala i Rau sari na tinavete,
meke kamahire va gorevura i Rau,
pude agoi kote huari sari na vasileana ta gobadi
meke vata evaṉae ni na kobi remoremo patu.
27 Gua ke sari dia tinoni si loke dia ṉiniraṉira,
matagutu si arini meke kurekure.
Guana linetelete si arini pa inuma,
guana liho buma vaqura,
guana duduli sapu toa vura pa batu vetu,
sapu harahara mate sipu raza i na givusu maṉini.
28 Ba tumae nia Qua sa vasina koa si agoi,
meke totoso mae meke taloa si goi,
meke gua sapu hoke ta ṉaziri guni nau goi si Arau.
29 Sina ta ṉaziri nau goi si Arau
meke sina ele kamo mae pa taliṉaqu sari na mua vinahesi pule,
ke kote va rita nia Rau sa Qua vinetuṉu pa isumu
meke kote vekoa Rau pa ṉuzumu sa Qua aeana kalakalahana hose,
meke kote va ene pule igo Rau
koasa siraṉa tugo sapu ene mae ia goi.’ ”
30 Meke zama se Aisea koe Hezikaea, “Hezikaea, hie sa vina sosode tamugoi:
Vuaheni hie si kote henai gamu sari linetelete sapu toa sage teledia,
meke pa vuaheni vina rua si kote henai sapu tuvulu sage koari na linetelete arini.
Ba pa vuaheni vina ṉeta si kote lelete meke pakepakete si gamu,
kote lete inuma vaeni meke henai gamu sari vuadi.
31 Keke totoso pule ka visavisa tie pa butubutu Ziuda si
kote va gore karoso pana gore meke vua katakata panaulu.
32 Ura kote koa hola pa Zerusalema si ka visavisa tie,
meke kote vura pa toqere Zaione sa puku tie saripu lopu tava mate.
Sa inokoro ṉiṉirana te Zihova Tadi na Qeto Minate si kote va gorevura ia si asa.
33 Gua ke hiera gua si zama nia e Zihova pa guguana sa baṉara lavata pa Asiria:
‘Lopu kote nuquru ia sa sa vasileana lavata hie
babe gona nia si keke tupi tani.
Lopu kote paleke kamo mae nia lave sa si tani,
babe mae tavete buturu pa kali goba pude rapata na haele sage.
34 Sa siraṉa sapu ene mae ia sa si asa tugo si kote pule ia sa;
na lopu kote nuquru ia sa sa vasileana lavata hie,
Arau Zihova si zama vura gua.
35 Arau kote lavelave nia sa vasileana lavata hie meke harupu ia,
pa laequ Arau meke pa laena e Devita sa Qua nabulu!’ ”
36 Meke vura la sa mateana te Zihova meke va matei sa si ka keke gogoto vesu ṉavulu lima tina tie koari na ipi tadi pa Asiria. Totoso tekulu sari na tie pa koivugona si na tie matedi mo si eko doduru vasina. 37 Ke qaqiri mo se Senakeribi, sa baṉara lavata pa Asiria, meke haqi taloa. Pule la mo pa Ninive si asa meke koa vasina. 38 Keke rane, totoso korapa vahesi si asa pa zelepade te Nisiroki sa nana tamasa, si la sari karua tuna koreo, sari Adarameleki meke Sareza meke seke va mate ia pa dia vedara, beto meke govete la dia pa popoa pa Ararata. Meke sa tuna koreo pule, se Esarahadoni, si hobena si asa koasa binaṉara.