45
Vizatia Zihova se Saerasi
1 “Hiera gua si zama nia Arau Zihova koa sa pu ele vizatia Rau,
koe Saerasi, sapu tuqe vagia Arau lima mataona
pude va kilasi sari na baṉara koari na butubutu pa kenuna sa,
meke pude va gorei koari na baṉara sari dia poko varipera,
pude tukeli sari sasada pa kenuna sa
pude sari sasada si lopu tuku:
2 Arau si kote ene pa kenumu
meke va pezara i sari toqere;
kote huara goreni Rau sari sasada boronizi
meke seke huari sari na rorotoana aeana.
3 Kote poni igo Rau sari na tinagotago koadi pa vasidi huporodi,
tinagotago sapu ta kopu pa vasidi tomedi,
pude mamu gilania sapu Arau se Zihova,
sa Tamasa pa Izireli, pu tioko vagi igo pa pozamu.
4 Pa laena e Zekopi sa Qua nabulu,
e Izireli sa Qua vinizatana,
si tioko vagi igo Rau pa pozamu
meke va hake nia koa goi si keke pozapoza nomana hola,
gua ba Arau si lopu gilana Au goi.
5 Arau se Zihova, meke loketoṉa pule si kekeṉoṉo gugua Arau;
Arau mo sa Tamasa, lopu keke tamasa pule si koa.
Arau kote va ṉiṉira igo si agoi,
gua ba lopu gilana Au goi,
6 pude podalae pa vasina gasa sa rimata
meke kamo pa vasina lodu sa,
si boka tumae nia ari tie sapu Arau mo sa Tamasa.
Arau se Zihova, meke lopu keke pule si koa.
7 Arau va podakia sa kalalasa meke sa huporo;
Arau si turaṉa kamo minana meke tinahuara;
Arau, se Zihova, pu taveti sari doduru arini.
8 Agoi na galegalearane panaulu, mu zoropo mae nia sa tinoṉoto;
vekoi sari na lei pude zoropo gore mae nia.
Vekoa sa popoa pepeso pude tukele va ṉaṉara veko,
vekoa sa hinarupu pude tuvulu sage,
vekoa sa tinoṉoto pude toqolo turaṉia;
Arau, se Zihova, ele va podaki si arini.
9 Mani ta lotaṉa sa tie pu tokea si Asa pu tavetena,
sa tie sapu na keke koari na bele raro patu pa pepeso.
Vea boka zama sa pepeso bupara koasa tie tavete raro patu,
‘Na sa si korapa tavetia goi,’ gua?
Boka zama sa raro patu koasa tie tavetena,
‘Lopu tumaemu,’ gua?*Rom 9:20
10 Mani talotaṉa sa tie pu zama koasa tamana,
‘Na sa si podoa goi hie?’
babe koasa tinana,
‘Na sa si podo vura nia goi hie?’
11 Hiera gua si zama nia Arau Zihova,
Asa mo sapu Hopena pa Izireli, asa pu Tavetena:
Guguadi ri na ginugua pu kote kamo mae,
si vea, kaqu nanasa ni tu goi koa Rau sari Qua koburu
babe totozi Nau koari na Qua tinavete?
12 Nake Arau mo tavetia sa popoa pepeso
meke podaki saripu koa vasina.
Pa limaqu telequ repaha vura nia Rau sa maṉauru;
meke vekoi pa dia vasidi sari na pinopino.
13 Kote va ovulu sagea Rau se Saerasi pa korapa Qua tinoṉoto:
Arau kote taveti sari doduru nana inene pude toṉoto.
Kote kuri pule ia sa sa Qua vasileana nomana pa Zerusalema,
meke rupahi sa sari na Qua tie pu ta zau vagi,
ba lopu pude ta tabara babe ta pia,”
zama gua se Zihova Tadi na Qeto Minate.
14 Hiera gua si zama nia e Zihova:
“Sari tinagotago tadi pa Izipi meke hinoluholu tadi pa Sudani,
meke sari tie geledi pa Sabeani,
si kote karovo atu koa goi
meke kote tamugoi si arini;
kote ene luli si arini pa mudimu agoi,
ta pusi seni meke kote luli atu koa goi.
Kote kokotuṉu si arini pa kenumu
meke kote helahelae atu, meke zama guahe,
‘Hinokara koa turaṉa igo tugo sa Tamasa si agoi, meke loke Tamasa pule si koa, ba Asa mo Telena;
ura loketoṉa pule sa Tamasa,’ ”
15 Hinokara Agoi sa Tamasa sapu tome pule Nigo,
kei Tamasa sa Hinarupu pa Izireli.
16 Doduru tie tavete beku si kote tava kurekure meke doṉo guana tie pekipekidi;
kote topue taloa varigara guana tie pekipekidi.
17 Ba sa Izireli si kote ta harupu koe Zihova,
pa hinarupu loke vina betona;
agoi si lopu kote tava kurekure kamoa na kamoa.
18 Ura hiera gua si zama nia e Zihova,
Asa pu tavetena sa maṉauru,
Asa sa Tamasa;
Asa pu tavetia sa popoa pepeso,
Asa va podakana bisa;
lopu tavetia Sa pude kokoba,
ba kuria Sa pude koa ia tie.
Zama si Asa:
“Arau se Zihova,
meke loketoṉa pule gugua Arau si koa.
19 Lopu tome si Arau meke zama,
lopu tome pa kaiqa vasina hupohuporona;
lopu ele hite zama si Rau koari tutina Zekopi,
‘Hata Au be boka dogoro Au tu gamu,’
Arau, e Zihova, si zama pa hinokara;
Arau zama vura nia mo gua sapu toṉoto.
20 Varigara, mamu mae;
varigara gamu na votiki tie pu govete koari na kana.
Na pupuhudi si arini pu paleke viloraeni sari dia beku huda,
pu varavara la koari na tamasa pu lopu variharupi.
21 Zama vura nia sapu koa koa gamu, mamu toketoke geso nia,
vekoi, madi vari vivinei dia.
Esei tozi va kenue nia si hie pukerane la,
esei zama vura nia pa totoso latu hoi?
Vea, lopu Arau e Zihova tu sia?
Meke Arau mo meke loketoṉa pule sa Tamasa,
sa Tamasa toṉotona meke sa Hinarupu;
loketoṉa pule si koa ba Arau mo.
22 Kekere mae koa Rau mamu ta harupu,
gamu doduru pa vina betona sa popoa pepeso;
ura Arau mo sa Tamasa meke loketoṉa pule si koa.
23 Koa Rau telequ ele va tatara nia Rau,
sa ṉuzuqu ele zama nia pa ṉinoṉo
sa zinama sapu lopu kaqu ta hobe:
Pa kenuqu si kote kokotuṉu sari doduru tie,
meke doduru mea si kote helahelae vura Nau.*Rom 14:11; Pil 2:10-11
24 Guahe kote zama nau rini, ‘Koe Zihova eke mo
sa tinoṉoto meke ṉiniraṉira.’ ”
Doduru pu kana la koa Sa
si kote mae koa Sa meke tava kurekure.
25 Ba koe Zihova, sa doduru tutina Izireli
si kaqu tava toṉoto meke kote vahesia rini si Asa.