2
Sa Vina Pepekae meke sa Linavata te Karisito
1 Sa mia tinoa keke koe Karisito si va ṉiṉira gamu, meke sa Nana tataru si va manoto gamu. Koa vari baeri si gamu sina koa koa gamu sa Maqomaqo Hope, meke koa variva tukana na vari ṉoṉoi si gamu pa tataru. 2 Ke mi koa keke pa binalabala, pa tataru, meke pa hiniva, pude gua asa si kote va qetu hinokarau gamu. 3 Mi lopu tavetia si keketoṉa pa pinuhi meke pa vinahesi pule, ba mi koa va pepekae pa vari korapa mia. Doduru totoso si mi balabala ia sa lineana tana votiki tie, hola nia sa mia lineana telemia. 4 Mi lopu tale doṉo puleni gamu mo, pa mia vinaleana telemia, ba mi doṉo la ia tugo sa vinaleana tana votiki tie. 5 Ke mi keha lulia sa hahanana va pepekae te Zisu Karisito sapu guahe:
6 Tagoa Sa sa tinoa Tinamasa doduru totoso,
ba lopu balabala ia Sa pude tuqe va nabua sa vina kekeṉoṉo pule nia koe Tamasa.
7 Ba luara pania Sa sa Nana vasina ululuna,
meke vagia Sa sa ginugua tana nabulu, meke ta evaṉae na tie si Asa.
8 Meke ta dogoro guana tie hokara si Asa,
va pepekae pule nia, meke enea Sa sa siraṉana sa vina tabe,
osolae kamo koasa minate, sapu sa Nana minate pa korosi.
9 Gua asa, ke va lavatia meke ovulu sage nia Tamasa si Asa, pude kamoa sa vasina ululuna hola pa Maṉauru,
meke ponia Sa sa pozapoza sapu nomana lavata, sapu ululu hola ni sari doduru pozapoza pule.
10 Meke pude koasa pozana e Zisu, sari doduru tinoni pa Maṉauru, pa pepeso,
meke pa kauruna*Kauruna sa pepeso si na vasina tadi pu matedi sapu ta pozae Hedisi. sa pepeso si kaqu kokotuṉu meke va lavatia si Asa.*Ais 45:23
11 Meke kaqu tozi helahelae nia ri doduru sapu e Zisu Karisito si na Baṉara, pa vinahesina sa Tamasa sa Tamada.
Kalalasa Gua rina Pinopino
12 Kasa qua baere ta tatarue mia, gua sapu hoke va tabe au gamu sipu koa koa gamu si rau, si arilaena hola pude va tabe au tugo gamu totoso lopu koa koa gamu si rau. Mi tavetavete zoṉazoṉa pude kopu nia sa mia vinagina sa tinaharupu, mi pamaṉa sisigiti nia sa Tamasa, osolae vagi va hokotia gamu gua sapu va nama vekoa Sa pude tamugamu. 13 Sina Tamasa telena si tavetavete pa korapa mia gamu, pude boka hiva nia meke lulia gamu sa Nana hiniva.
14 Pa doduru mia tinavete si mi lopu qumiqumi na varitokei. 15 Gua, pude loke tinazutu mia, meke via pa bulomia; na tuna Tamasa si gamu sapu loke kisakisa mia, pa korapana sa sinage koqina meke va karikarina. Vasina kaqu koa na tie leamia pa vari korapadi rina tie, guana kalalasadi rina pinopino pana boṉi pa maṉauru,*Diut 32:5 16 totoso tozi vura nia gamu koa rini sa inavosona sa tinoa hola. Be gua asa si gamu, si kote ari qua ginugua si rau pude qetuni gamu koasa rane pinule mae tanisa Baṉara, sina kote ta dogoro vura vasina sapu lopu oki palae hoboro sari doduru qua tinavete ṉiṉira.
17 Koasa mia rinaṉeraṉe si vala ni gamu sari na mia tinoa koe Tamasa pa ninabuluna Sa. Meke be guana tava mate si rau pa vina tabena Sa, meke tava zoloro sa eharaqu, ba kote qetu si rau. 18 Ke mi somana qetuqetu turaṉau.
Timote meke Epaporodaitasi
19 Raṉea rau se Zisu sa Baṉara, sapu pa hiniva Tanisa, si lopu sana kote garunu atu nia rau se Timote koa gamu, pude boka tava ṉiṉira si rau pa inavoso mia gamu. 20 Ura loke tie pule si gugua asa, sapu galagala sisigitini gamu. 21 Sari doduru tie pule si va boka pule ni mo dia tinoa soti, ba lopu kopu nia rini sa tinavete te Karisito. 22 Ba gilana valeania gamu sapu se Timote si na tie arilaena hola. Tavetavete varigara guana karu tatamana si gami kara pa tinavete tanisa Inavoso Leana. 23 Rovea rau sapu lopu sana kote boka va atua rau si asa, pana gilana pakia rau gua sapu kote ta evaṉa koa rau. 24 Meke kalavarae si rau koa sa Baṉara, sapu arau ba lopu sana kote atu tugo koa gamu.
25 Balabala ia rau sapu leana tugo pude garunu atu nia se Epaporodaitasi, sa tasida koe Karisito, sapu somana tavetavete turaṉau, guana tie varipera te Karisito. Asa sa mia tie ta garununa sapu ele va tukanau. 26 Hiva hola si asa pude dogoro gamu, meke mamata sisigiti sa bulona sina ele avoso nia gamu sapu moho si asa. 27 Hinokara sapu ele moho tata mate si asa. Ba tataru nia Tamasa si asa meke salaṉia. Meke lopu asa eke mo si tataru nia Sa, ba arau tugo pude lopu talotaṉa nia rau sa minoho tanisa, meke pude lopu vari tomoi koa rau sa tinalotaṉana sa nana minate. 28 Hiva sisigiti pude garunu atu nia rau si asa koa gamu, pude boka qetu si gamu pana dogoria si asa, meke lopu kote talotaṉa sisigiti si arau. 29 Mi va kamo valeania si asa pa qinetuqetu, guana tasimia koasa Baṉara. Mi pamaṉa ni sari doduru tie pu gugua asa. 30 Ura pa korapa tinavete te Karisito si tata mate si asa, sina va tasuna ia sa sa nana tinoa pude boka toka nau sa, vasina lopu boka toka nau gamu.