51
Sa Zinama Vina Manoto koe Zerusalema
1 Zama pule se Zihova, “Va avoso mae koa Rau gamu pu okoro nia sa tinoṉoto
meke gamu pu hata Au si Arau.
Doṉo la koasa patu sapu vasina ta bele vagi si gamu
meke koasa pepeso vasina ta geli vagi si gamu,
2 doṉo la koe Ebarahami, sa tamamia;
meke koe Sera, pu podo gamu.
Totoso tioko ia Rau se Ebarahami si kekekena mo si asa,
ba mana nia Rau meke va soku ia.
3 Arau Zihova kote va manotia sa vasileana Zaione,
meke kote tataru ni Rau sari doduru nana vetu ta huaradi;
sari qega pa popoa Zaione si kote iliri Rau pude guana inuma pa Idini,
sari pepeso kaleanadi pa korapana si kote guana inuma te Zihova.
Na qinetuqetu si kote ta dogoro vasina,
na kinera zama leana meke na vinahesi si kote ta avoso vasina.
4 Mi va avoso mae koa Rau, gamu na Qua tinoni,
va avoso Au, gamu Qua butubutu:
Sa Qua tinarae si kote vura koa Rau;
sa Qua ṉinoṉo si kote na kalalasa koari na butubutu.
5 Sa Qua tinoṉoto si tuturei tata mae mo sana,
sa Qua tinaharupu si korapa mae,
meke sa limaqu kote va kamoa sa ṉinoṉo koari na butubutu.
Sari na nunusa si kote doṉo mae koa Rau
meke aqa va ṉoṉo nia sa Limaqu pude tokani.
6 Va eṉa sage i mata mia la pa maṉauru,
doṉo gore la pule koasa pepeso;
sa maṉauru si kote murimuri guana tuṉaha,
sa popoa pepeso si kote ṉoreṉore guana poko
meke sari tiena si kote mate guana dodoa.
Ba sa Qua hinarupu si kote koa hola,
sa Qua tinoṉoto si loke vina betona!
7 Mi avoso Au, gamu pu tumae nia sa si toṉoto,
gamu na tie pu tagoa sa Qua tinarae pa bulomia:
Mi lopu matagutu nia sa ṉinovaṉovala tadi tie
babe holoqoru ni sari dia zinama kaleadi.
8 Ura kote gani na kikiti si arini guana poko;
na nokinoki kote henai guana poko vulu.
Ba sa Qua tinoṉoto si kaqu koa hola ninae rane,
meke sa Qua hinarupu si kote kamo koari na sinage na sage.”
9 Zihova, Mu vaṉunu, Mu vaṉunu!
Mamu poko nia pa limamu sa ṉiniraṉira;
vaṉunu, gua koari na rane ele hola,
gua sapu tavetia Agoi koari na totoso pukerane.
Vea lopu Agoi tu seke va umumu ia se Rehabi,
pu hova matea sa noki lavata*Sa noki lavata si na vina titilana sa ovuku naelo babe sa popoa Izipi.?
10 Lopu Agoi tu va popa ia sa lamana,
sari kolo pa lamana peava,
pu tavetena sa siraṉa pa korapa lamana peava
pude karovo saripu ta rupahadi?
11 Sarini pu ta holu vagi pule koe Zihova si kote kekere pule.
Kote kerakeradi meke nuquru la pa Zaione;
sa qinetu loke vina betona si kote toropae nia rini pa batudia.
Na kinomolo na qinetu si kote koa eko mo koa rini,
meke sa tinalotaṉa na siniṉo mamata si kote taloa koa rini.
12 Zama se Zihova, “Arau, uve Arau tugo si Asa pu va manoto gamu.
Esei si gamu ke matagutu nia gamu sa tie,
sa tuna na tie, sapu kote mate gua mo na duduli?
13 Gua ke muliṉi nia tu gamu se Zihova, sapu tavete gamu si gamu,
pu repaha vura nia sa maṉauru
meke va sokirae ia sa popoa pepeso.
Vea, kote koa mala eko lamo si gamu doduru rane
koasa tinaṉaziri tadi na mia kana,
arini pu hiva raza gamu?
Ke avei sa tinaṉaziri tadi na mia kana kamahire?
14 Sari tie ta pusidi si tata kote ta rupaha;
lopu kaqu mate si arini pa vetu varipusi,
babe papaka ni na ginani.
15 Ura Arau se Zihova, mia Tamasa,
sapu va nakili ia sa lamana pude ovaṉa sa ololobagea,
se Zihova Tadi na Qeto Minate, asa sa Pozaqu Rau.
16 Arau ele vekoa sa Qua zinama pa ṉuzumia,
meke nobi gamu Rau koasa maqomaqona sa Limaqu.
Arau veko valeania pa nana vasina sa maṉauru,
meke va sokirae ia sa popoa pepeso,
meke zama koa rina tie pa Zaione, ‘Gamu sari na Qua tinoni,’ gua.”
Sa Vina Betona sa Tinasuna te Zerusalema
17 Kei agoi Zerusalema, mu vaṉunu! Mu vaṉunu!
Gasa turu, agoi pu napo pa Limana e Zihova
koasa kapa tanisa Nana tinaṉaziri,
agoi pu napo va pahoa
meke va tedeve igo sa.*Rev 14:10, 16:19
18 Koari doduru koburu koreo pu podoi Zerusalema,
lopu keke si koa pude totoli nia sa tinadia;
koari doduru koburu koreo pu va nomai sa
lopu keke si koa pude tuqea sa limana sa tinadia.
19 Karua tinasuna hire si kamo koa goi.
Esei boka va manoto igo si agoi?
Ta huara meke ivulu sa popoa meke mate pa soṉe meke pa vedara sari tie,
esei kote boka va manoto igo Zerusalema?
20 Sari tumu si ele mabubulu;
eko dia pa vina betodi rina siraṉa,
gua rina kurukuru sapu voi pa sipata.
Na siṉi i na tinaṉaziri te Zihova si arini
meke sa ginegese tanisa mua Tamasa.
21 Ke mu avoso mae, agoi pu koa pa tinasigiti,
agoi sapu napo viviri ba lopu pa napo vaeni.
22 Hiera gua si zama nia e Zihova sa Baṉara,
sa mua Tamasa pu lavelave ni sari Nana tinoni:
“Doṉo la ele vagi pania Rau pa limamu
sa kapa sapu va tedevemu si agoi;
lopu kote napo pule si agoi koasa kapa asa,
sa naponapoana tanisa Qua tinaṉaziri.
23 Kote vekoa Rau si asa pa limadia ri na mua kana,
arini pu zama guahe koa goi,
‘Hoqa oporapaha pude mami neti igo.’
Ke sa mudimu si guni nia goi na pepeso,
guana siraṉa pude enea.”