50
Sa Minae Tanisa Nabulu
Hiera gua si zama nia e Zihova:
“Avei sa pepa vari luari tanisa tinamu,
sapu vala nia Rau meke garunu taloa nia?
Babe pa Qua linipulipu savana si holuholu la nigo Rau si agoi?
Lokari, koari na mua sinea mo si ta holuholue taloa si agoi;
koari na mua tinavete kaleadi mo si ta garunu taloa sa tinamu.
Totoso mae Arau, si vegua ke loke tie tu si va avoso?
Totoso titioko Arau, si vegua ke loke tie tu si olaṉa?
Vea, papaka hola sa Limaqu pude holu vagi pule igo?
Vea, loke Qua ṉiniraṉira si Arau pude harupu igo?
Pa ginegese hite mo si va popa ia Rau sa kolo lamana.
Sari ovuku si iliri lani Rau pa qega;
sari dia igana si muzi sina loke kolo
meke mate sina memeha.
Arau va poko nia hinuporo sa maṉauru
meke na poko baika sa nana nobi.”
Sa Vinatabe Tanisa Nabulu te Zihova
Zama sa Nabulu te Zihova, “Se Zihova Baṉara ele va tumatumae Nau zama,
pude tumae nia sa zinama sapu kote toka nia sa tie sapu malohoro.
Asa va vaṉunu Au doduru munumunu,
va vaṉunia sa Taliṉaqu pude va avoso guana tie sapu tava tumatumae.
E Zihova Baṉara ele tukeli sari Taliṉaqu,
meke lopu hite seke tinarae si Arau;
lopu hite taliri taloa si Rau.
Va malumia Rau sa Mudiqu koa rini pu seke Au,
sari paparaqu koa rini pu dakui sari gumiqu;
lopu tomea Rau sa Isumataqu
koa rini pu va sisire Nau meke loro Au.* Mt 26:67; Mk 14:65
Ura toka Nau e Zihova Baṉara si Arau
ke lopu kote kurekure si Arau.
Gua ke ele va nabua Rau sa isumataqu guana patu,
na gilania Rau sapu lopu kote tava kurekure si Arau.
Asa pu poni Au tinoṉoto si koa tata mo.* Rom 8:33-34
Na esei boka zutu Au si Arau?
Mae mada vari tia i!
Esei sa tie sapu zutuqu Rau?
Vekoa mani mae zama pa Kenuqu!
E Zihova Baṉara na toka Nau si Arau.
Esei koa ri na tie sapu hiva zutu Au si Arau?
Kote ṉoreṉore guana poko si arini;
kote gani pani na kikiti,” gua si Asa.
10 Esei koa gamu na pamaṉa nia se Zihova
meke va tabei sari zinama tanisa Nana nabulu?
Vekoa si asa pu ene pa huporo,
pu loke nana zuke,
mani raṉea sa Pozana e Zihova
meke kalavarae koasa nana Tamasa.
11 Ba kamahire, doduru gamu pu katu mia nika
pu poni pule ni gamu zuke halaladi,
mi la, ene pa korapana sa kalalasana sa mia nika
meke koari na zuke sapu huruṉi gamu.
Hie sa pinia sapu kote vagia gamu pa limaqu:
Kote hoqa eko si gamu pa tinasigiti nomana.

*50:6 Mt 26:67; Mk 14:65

*50:8 Rom 8:33-34