49
Sa Nabulu te Zihova
1 Sa Nabulu te Zihova* Pa korapana sa hinia hie sari zinama “Sa nabulu te Zihova” si korotae nia se Zisu. si zama, “Avoso mae koa Rau, gamu pa nunusa* Zer 1:5
mi avosia si hie, gamu na butubutu pa seu:
Sipu lopu ele podo Arau si tioko Au e Zihova si Arau;
pa tiana sa tinaqu si tioko Au sa Pozaqu.
2 Sa Ṉuzuqu si tavete guni nia Sa na vedara ṉaruna,
meke tome Au Sa pa maqomaqona sa Limana;
tavete Au Sa guana tupi ṉaruna
meke tome Au Sa pa Nana vovoina tupi.* Hib 4:12; Rev 1:16
3 Zama si Asa koa Rau, ‘Agoi si na Qua nabulu,
se Izireli, sapu koa Goi kote ta vahesi si Arau.’
4 Ba zama si Arau: Arau si guana tavetavete hoboro mo;
sa Qua ṉiniraṉira si guana ta okipalae hoboro mo meke loketoṉa va gavoria.
Ba sapu kote vagi nia Rau si pa Limana e Zihova,
meke sa Qua pinia si koa koasa Qua Tamasa.
5 Asa pu tavete Au pa tiana sa tinaqu pude Nana nabulu
pude turaṉa pule lani sari na butubutu te Zekopi koa Sa
meke varigara pule lani sari na butubutu Izireli koa Sa,
ura Arau si tava lavata koe Zihova
meke sa Qua Tamasa si na Qua ṉiniraṉira.
6 Kamahire si zama se Zihova:* Ais 42:6; Lk 2:32; TTA 13:47, 26:23
‘Na tiṉitoṉa hitekena mo sapu pude Agoi si na Qua nabulu
pude va ṉiṉira pulei sari na butubutu te Zekopi
meke pude turaṉa pule mae i sari na tie Izireli saripu koa holadi.
Ba kote tavetavete Nigo tugo Rau pude na kalalasa koari na tie Zenitailo,
pude agoi boka paleke la nia sa Qua hinarupu koari na tie pa vina betona sa popoa pepeso.’
7 Hiera gua si zama nia e Zihova,
sa Hinarupu meke Asa pu Hopena pa Izireli,
koa Sa pu ta hakohakoe meke lopu ta hivae koari na butubutu,
koa Sa pu nabulu ni sari na baṉara:
‘Sari baṉara kote dogorigo meke gasa turu,
sari koburu tavia kote dodogorae meke todoṉo,
koa gua koe Zihova, sapu kopu ni sari Nana zinama,
Asa pu Hopena pa Izireli, Asa pu vizata Igo.’ ”
Sa Vinaleana Pulena sa Popoa Zerusalema
8 Hiera gua si zama nia e Zihova:* 2 Kor 6:2
“Pa totoso tanisa Qua tataru variharupi si kote olaṉigo Rau,
meke koasa rane tanisa Qua hinarupu si kote toka Nigo Rau;
Arau kote kopu Nigo meke tavete Igo
pude na vinariva egoi si agoi tadi na tinoni,
pude valeana pule ia sa popoa
meke pude veko pulei sari tie koari na dia pepeso,
sa pepeso ta huarana,
9 pude zama koari na tie ta pusidi, ‘Mi ta rupaha,’
meke koa rini pa hupohuporona, ‘Vura mae pa kalalasa!’
Kote henahena va deṉa dia pa kali siraṉa
meke kote gua ri na sipi pu gani duduli koari na toqere.
10 Lopu kote hite ovia babe memeha si arini,* Rev 7:16-17
babe raza i na maṉini pa qega babe koasa rimata.
Asa pu tataru ni kote totoli ni
meke turaṉa lani koari na kolo tototolo.
11 Na siraṉa vari karovae popoa si kote tavetia Rau koari na toqere,
meke na siraṉa tadi na tie pude enea.
12 Doṉo la, kote mae gua pa seu si arini,
kaiqa kote mae gua pa kali gede, kaiqa pa lodu rimata,
kaiqa si pa kali mae gua pa Izipi.”
13 Agoi na maṉauru, mu kukili qetuqetu;
agoi na popoa pepeso, mu koa qetu;
gamu na toqere, mi poraka vura pa kinera!
Ura e Zihova si korapa va manoti sari Nana tinoni
meke kote tataru ni Sa sari Nana tie pu korapa koa pa tinasigiti.
14 Ba Zaione* Zerusalema si zama, “E Zihova ele kilu au si arau,
sa Baṉara ele muliṉi nau.”
15 Zama vura se Zihova, “Vegua boka muliṉi nia sa barikaleqe sa tuna soti
meke lopu tataru nia sa sa koburu sapu podo sotia sa?
Gina kote boka muliṉi nia sa,
ba Arau lopu kaqu muliṉini gamu Rau!
16 Doṉo la, Arau ele kuberia pozamu koari na ola Limaqu,
sari goba pa vari likohaemu si korapa balabala i Rau doduru totoso.
17 Sari mua koburu koreo si bebeno pule mae,
meke sarini pu huara gore nigo si taluarae koa goi.
18 Mu eṉa sage ni matamu, mamu doṉo vari likohae;
sari doduru tumu koreo si varigara meke mae koa goi.
Hinokara gua sapu toaqu si Rau si kote va sagei goi si arini guana vinasari. Kote pokopoko ni goi, guana vineki nama varihaba,” zama vura gua se Zihova.
19 Zama pule si Asa, “Na ta huara tugo si goi meke ivulu
meke ta huara inete sa popoa,
ba kamahire si kote hiteke tugo na kote soku sari na mua tie
meke sarini pu ṉovala igo si kote koa latu pa seu.
20 Sari na koburu pu podo pa tinaraovo
si kote zama koa goi,
‘Sa popoa hie si hiteke hola koa gami;
poni va sokuni gami lolomo pude koa mami.’
21 Totoso asa kote zama si goi pa bulomu,
‘Esei podoi sari koburu hire?
Arau si koa talotaṉa meke tige;
Ta raovo taloa si arau meke ta kiluqu.
Esei va noma sagei sari koburu hire?
Arau si koa eke telequ,
ba sapu hire si pae mae guadi?’ ”
22 Hie si zama nia e Zihova sa Baṉara:
“Doṉo la, kote tioki Arau sari tie Zenitailo,
kote ovulu sage nia Rau sa Qua pitipiti koari na butubutu;
meke kote turaṉa pule mae ni rini sari tumu koreo pa limadia
meke kote paleki rini sari tumu vineki pa avara dia.
23 Sari baṉara si kote guana tamamu agoi,
meke sari dia kalaho si kote guana tinamu agoi.
Kote todoṉo si arini pa kenumu, sari isumata dia si kote kamo la pa pepeso;
sa kavuru pa nenemu si kote mea ia rini.
Gua meke tiqe kote gilania goi sapu Arau se Zihova;
arini pu raṉe Au si lopu kaqu talotaṉa.”
24 Esei boka saputu vagi sari na vinagi pa vinaripera koari na tie varane,
babe harupi sari na boso koasa qeto minate?
25 Ba hiera gua si zama nia e Zihova:
“Uve, sari na boso si kote ta vagi pule koari na varane,
meke sari na vinagi pa vinaripera si kote ta saputu vagi koari na qeto minate;
Arau kote razai sarini pu raza igo si goi,
meke sari mua koburu si kote harupi Rau.
26 Arau kote vari taliri ni sari mua kana meke kote hena pulei rini sari masa dia teledia;
kote napoi rini ehara dia meke viviri ni guana napo vaeni.
Gua meke tiqe kote gilania ri doduru tie
sapu Arau, se Zihova, Arau sa mua Hinarupu,
mua Tinarupaha, sa Tamasa ṉiṉirana te Zekopi.”