SA BUKA TE
ZEREMAEA
Sa Vinabakala
Sa buka hie si e Zeremaea sa poropita kuberia. Sa zinama te Zihova si kamo koe Zeremaea pa totoso sapu baṉara pa Ziuda sari Zosaea, Zehoiakimi, Zehoiakini, meke kamo la koe Zedekaea. Pa doduruna sa nana totoso si korotae nia Zeremaea sa vina balau te Tamasa sapu keke tinasuna nomana hola si kote kamo koari na tie te Tamasa koa gua koasa dia vinahesi beku meke sari na sinea sapu okoro taveti rini. Meke toa kamoa tugo Zeremaea sa totoso sapu mae sa baṉara pa Babiloni, se Nebukaneza, meke rapatia si pa Zerusalema, meke huaria sa sa vasileana nomana asa. Sa Zelepade si huara ia tugo sa meke turaṉa lani sa pa Babiloni sari na tiena meke sa dia baṉara pa totoso asa, sapu se Zedekaea. Ba korotae nia tugo Zeremaea sapu kote pule mae si arini koasa tinaraovo meke kuri pule ia sa dia popoa sina tataru ni sa Tamasa si arini. Meke tozia sa sapu kote tavetia Tamasa koa rini si keke vinariva egoi vaqurana.
Tataru hola ni Zeremaea sari turaṉana pa Izireli meke hoke ta sigiti nia sa pude korotae ni sari tinasuna sapu kote kamo la koa rini meke pude zama vura ni sari inavoso sapu ta garunu ni sa koe Tamasa. Ba sa zinama te Tamasa si guana nika pa bulona ke lopu boka tuqe pule nia sa, kaqu zama vura nia sa.
Soku ri na zinama si huhuku la pa kenuna e Zeremaea pa totoso sapu kote kuberia sa Tamasa si keke vinariva egoi vaqurana pa bulodi ri na tie meke lopu pa patu. (Hinia 31:31-34)
Sari Ṉati Pinaqapaqahana sa Buka
(1) Sa tinioko te Zeremaea. Hinia 1:1-19
(2) Sari inavoso te Tamasa la koari na tie meke sari na baṉara pa Ziuda. Hinia 2:1 kamo hinia 25:38
(3) Sari kinubekubere te Baruku sa tie kubekubere te Zeremaea. Hinia 26:1 kamo hinia 45:5
(4) Sari na kinorokorotae te Zihova pa guguadi ri na votiki butubutu pu kana ia sa butubutu Ziuda. Hinia 46:1 kamo hinia 51:64
(5) Sa tina huara pa Zerusalema meke sapu ta raovo taloa la pa Babiloni sari tiena. Hinia 52:1-34
1
Totoso sapu Poropita se Zeremaea
1 Hire sari zinama te Zeremaea sa tuna koreo e Hilikaea, sapu keke ri na hiama pa vasileana Anatoti koasa pinaqaha popoa te Benisimane. 2 Sa zinama te Zihova si kamo koe Zeremaea podalae pa vina manege ṉeta vuaheni sipu koa baṉara se Zosaea, sa tuna Amoni, pa butubutu Ziuda,*2 Baṉ 22:3 kamo hinia 23:27; 2 Koron 34:8 kamo hinia 35:19 3 meke kamo la pa totoso baṉara se Zehoiakimi, sa tuna e Zosaea, meke hola la pa vina manege eke vuahenina sa binaṉara te Zedekaea, keke tuna koreo tugo e Zosaea, pa popoa Ziuda. Koasa vina lima sidara pa vina manege eke vuahenina sa binaṉara te Zedekaea si ta raovo taloa sari tinoni pa Zerusalema.*2 Baṉ 23:36 kamo hinia 24:7, 24:18 kamo hinia 25:21; 2 Koron 36:5-8, 11:21
Ta Tioko se Zeremaea
4 Sa zinama te Zihova si kamo mae koa rau, sapu zama guahe,
5 “Ele gilanigo tu Rau si agoi sipu lopu ele tavetigo Rau pa tiana sa tinamu,
sipu lopu ele podo tu agoi si ele vizata vata kale igo tu Rau;
na ele vizatigo Rau pude na poropita koari na butubutu,” gua.
6 Olaṉa si rau, “Kei, Zihova Baṉara, ba lopu tumae zama si rau; na koburu mo si rau.”
7 Ba zama se Zihova koa rau, “Mu lopu zama sapu ‘Na koburu mo si rau,’ gua. Na kaqu la si agoi koari doduru pu garunu lani igo Arau meke zama lani koa rini gua sapu tozi nigo Rau. 8 Mu lopu matagutu ni sari tie, ura Arau korapa koa turaṉa igo si agoi meke kote harupu igo,” zama vura gua se Zihova.
9 Meke qaqama mae nia e Zihova sa Limana meke tiqua Sa sa ṉuzuqu meke zama si Asa koa rau, “Isa, ele vekoi Arau pa korapa ṉuzumu sari na Qua zinama.
10 Dotu, pa rane ṉinoroi si ponigo Rau sa ṉiniraṉira
pude turu va tia i sari na butubutu na binaṉara,
pude rabuti meke pude va hoqai,
pude huari meke va kilasi,
pude kurikuri meke pude lelete.”
Karua Dinogodogorae
11 Sa zinama te Zihova si kamo mae koa rau: “Zeremaea, na sa si dogoria goi?”
“Na lelaṉa huda alamoni si dogoria rau,” olaṉa gua si rau.
12 Zama se Zihova koa rau, “Goto tugo sapu dogoria goi, ura korapa kopu*Sa zinama hiburu sapu ta iliri, “korapa kopu” sa mamalaiṉina si gua na pozapoza huda Alamoni. si Arau pude dogoria sapu gorevura sari Qua zinama.”
13 Sa zinama te Zihova si kamo pule mae koa rau: “Na sa si dogoria goi?”
“Na raro qototona si dogoria rau, sapu habotu kale mae gua pa kali gede meke tata zoropae mae gua tani,” olaṉa gua si rau.
14 Zama se Zihova koa rau, “Pa kali gede kote mae gua sa tinahuara meke kote zoropae vura koari doduru tinoni pu koa tani, pa popoa Ziuda meke Zerusalema. 15 Na lopu seunae kote tioki Rau sari tiedi ri na butubutu baṉara pa kali gede,” zama vura gua se Zihova.
Zama pule si Asa, “Sari dia baṉara si kote mae meke va turu i sari dia habohabotuana baṉara
koari na sasadana sa vasileana Zerusalema;
kote huari rini sari doduru gobana sa
meke gua tugo sari doduru vasivasileana pa Ziuda.
16 Kote zama vura atuni Arau sari Qua vinilavilasa koari na Qua tinoni
sina kilu Au rini koari na dia hahanana kaleadi pu taveti rini,
koari na vina uququ oto huda humaṉa lea pa vinahesidi ri votiki tamasa
meke koari na dia vinahesidi ri na beku pu taveti rini pa limadia.
17 Mu va namanama si agoi! Gasa turu, mamu la zama ni koa rini, sari doduru gua pu garunu nigo Rau. Mu lopu matagutu hokara ni, pude lopu gua si kote va matagutu igo Rau pa kenudia rini. 18 Koasa rane ṉinoroi si ele tavetigo Arau si agoi pude guana keke vasileana sapu ta goba vari likohaena, na dedegere aeana, meke na gobagoba boronizi pude turu va tia ia sa doduruna sa popoa. Kote va tia i goi sari na baṉara pa Ziuda, sari nana koimata, sari nana hiama meke sari tiena sa popoa asa. 19 Kote raza igo arini si agoi, ba lopu kaqu boka igo rini, ura Arau kote koa turaṉa igo meke kote harupu igo si agoi,” zama vura gua se Zihova.
*1:2 2 Baṉ 22:3 kamo hinia 23:27; 2 Koron 34:8 kamo hinia 35:19
*1:3 2 Baṉ 23:36 kamo hinia 24:7, 24:18 kamo hinia 25:21; 2 Koron 36:5-8, 11:21
*1:12 Sa zinama hiburu sapu ta iliri, “korapa kopu” sa mamalaiṉina si gua na pozapoza huda Alamoni.