56
Kaqu Somana Tugo sari Doduru Butubutu koari na Tie te Zihova
1 Hiera gua si zama nia e Zihova:
“Kopu nia sa ṉinoṉo
meke tavetia sapu toṉoto,
ura sa Qua hinarupu si tata kamo mae
meke sa Qua tinoṉoto si tata ta dogoro.
2 Ta manae si asa pu taveti si arini,
sa tie pu kopu ni,
asa pu va madia na kopu nia sa Rane Sabati,
meke kopu nia sa limana pude lopu tavete va sea.”
3 Sa tie karovona pu somana vahesia se Zihova, si mani lopu zama guahe,
“Hinokara kote va vura au e Zihova koari Nana tinoni,” gua.
Meke sari tie ta puzaladi si madi lopu nominomi guahe,
“Arau si na huda popana,” gua.
4 Ura hiera gua si zama nia e Zihova:
“Koa gamu na tie ta puzala mia pu kopu ni sari Qua Sabati,
pu vizati sapu qetuni Rau
meke tuqe va nabu koasa Qua vinariva egoi,
5 koa rini si kote poni Rau, pa korapana sa Qua Zelepade meke sari gobana sa,
si keke vina tigono meke na pozapoza
sapu leana hola ni sari soku koburu koreo meke na vineki;
kote poni Rau si keke pozapoza sapu koa hola ninae rane,
sapu lopu kaqu ta kumata palae.
6 Meke sari tie karovodi pu soto va nabu koe Zihova,
pude nabulu nia si Asa,
pude tataru nia sa Pozana e Zihova,
meke pude vahesia si Asa,
doduru pu va madia na kopu nia sa Rane Sabati,
meke saripu soto va nabu koasa Qua vinariva egoi,
7 arini tu si kote turaṉa lani Rau koasa Qua toqere hopena
meke poni qinetu koasa Qua vetu varavara.
Sari dia vinukivukihi na vinariponi
si kote qetu ni Rau koasa Qua hope;
ura sa Qua vetu si kote ta pozae
na vetu varavara tadi doduru butubutu.”*Mt 21:13; Mk 11:17; Lk 19:46
8 E Zihova sa Baṉara si zama vura,
Asa pu varigara ni sari tie ta raovodi pa Izireli:
“Kote varigara pule ni Rau si kaiqa koa rini pu
ele somana ta varigara la koari na tie Izireli.”
Ta Zutu sari na Koimata Izireli
9 Mae, gamu doduru kurukuru ṉame koari na pezarana,
doduru gamu na kurukuru ṉame pa hiqohiqo,
mae mamu gani sari Qua tie!
10 Sari tie kopu tadi pa Izireli si behu,
na ginilagilana si lopu tagoa rini;
guana siki kae kulu si arini,
lopu boka hohou;
eko lamae meke putagita mo,
na puta si hiva hola nia rini.
11 Na siki si arini sapu noma hola bogudi;
lopu hoke boka deṉa.
Na sepati si arini sapu loketoṉa gilania;
doduru si hopeke taliri la pa dia siraṉa soti,
pavei boka vagi meke va boka pule ni.
12 Hopeke zama, “Mae, mada vagi vaeni!
Mada naponapo gada!
Meke vugo si kote gua mo ṉinoroi,
babe kote leana hola la tu.”