57
Ta Zutu sa Vinahesi Beku Tadi pa Izireli
1 Sari tie toṉoto si mate,
meke loke tie si balabala i si arini pa bulona;
saripu va madi pule ni koe Tamasa si ta vagi taloa,
meke loke tie si va bakalia
sapu sari tie toṉoto si ta vagi taloa
pude madi lopu ta kamo ni rini sari tinasuna pu korapa mae.
2 Sarini pu ene pa tinoṉoto
si kote kamo pa binule;
magogoso dia totoso eko si arini pa minate.
3 Zama se Zihova, “Ba gamu isara; mae tani, gamu na tudia koreo ari na barikaleqe vakuvakutae,
gamu pu ta podo pa binarabarata meke koari na maqota!
4 Esei si va sisire nia gamu?
Koe sei si vikoviko la
meke va vuravura mea la gamu?
Vea, lopu na puku tie va karikari
na tudia ri na tie kokohadi si gamu?
5 Koari na mia vinahesi beku si tavete va kaleana koari na maqota pa kauru huda oaku
meke pa doduru kauru huda aqaqoro si gamu;
vukivukihi ni gamu sari mia koburu koari na lololomo
meke koari na bae pa kauru taba.
6 Sari na beku koari na patu memehedi koari na lololomo si na mia hinia gamu;
uve arini, arini si na hinia tamugamu.
Koa rini si la vahesi si gamu meke zoropo vaeni
meke variponi la kiko huiti.
Koari na mia tinavete arini si vea, balabala ia gamu sapu qetu si Rau?
7 Mia teqe si taveti gamu koari na batu toqere,
vasina si la gamu meke la vukivukihi.
8 Pa mudi sasada meke koari na mia dedegere sasada
si vekoi gamu sari mia beku huporodi.
Kilu Au gamu, meke va nama i sari mia teqe pa vasina vahesihesi beku,
haele sage la si gamu meke eko turaṉi sari na maqota;
meke taveti gamu sari vinari va toṉoti koa ri na beku,
meke okoro hiva dogori gamu sari tini dodohodi tadi na maqota.
9 La si gamu koasa beku Moleki, paleke mia oela olive
meke soku votivotiki oela humahumaṉa lea.
Ene va seu si gamu,
koari na lovu ba hata kamo la tugo,
koasa hinata tamasa pude vahesi mia.
10 Mabo sisigiti si gamu koari mia hinata beku,
ba koromia zama, ‘Na loke laena sa hinata hie,’ gua.
Sa inokoro si va ṉiṉira pule gamu,
ke lopu mabubulu si gamu.
11 Savadi sari beku hire ke matagutu ni gamu
ke va kokoha mae si gamu koa Rau,
meke lopu balabala Au
babe viliti gamu si hire pa bulomia?
Hokara na seunae lopu kulu si Rau
ke lopu matagutu Nau gamu?
12 Kote tozi vurani Rau sapu lopu toṉoto meke sari na mia tinavete kaleadi,
na loketoṉa si kote vagi gamu koa rini.
13 Pana hata tinokae gamu meke kabo vura,
si mani harupu gamu ri na mia vinarigarae beku!
Sa givusu kote paleke taloa beto ni,
na siṉo maṉini mo ba kote ta paleke taloa dia mo.
Ba sa tie pu mae koa Rau pude nana tometomeana
si kote tagoa sa pepeso
meke vahesi Au sa pa Qua toqere hopena.”
Va Tatara nia sa Tamasa sa Tinokae meke Sinalaṉa
14 Meke kote ta zamae si hie:
“Kuri ia, kuri ia, kuria sa siraṉa!
Rizu pani sari na patu koasa siraṉa tadi na Qua tinoni.”
15 Ura gua hie si zama nia si Asa pu koa panaulu sage,
Asa pu koa hola ninae rane, sapu hopena pozana:
“Arau si koa pa vasina sapu ululu meke hopena,
ba koa turaṉia Rau sa tie sapu va pepekae pule nia meke kekere meke okoro nia pude taleosoni Rau sari nana sinea,
pude va ṉiṉira pule ia sa maqomaqona sa tie sapu va pepekae pule nia
meke pude taleosoni sari nana sinea meke va ṉiṉira pule ia sa bulona.
16 Lopu kaqu zutu lamo gamu Rau,
babe bugoro lamo si Rau,
ura kote malohoro mo pa kenuqu sa maqomaqona sa tie
sa siniṉo tanisa tie sapu Arau tugo mo va podakia.
17 Namu ta ṉaziri sisigiti nia Rau sa pinuhi tanisa,
ke va kilasia Rau meke tomea Rau sa isumataqu,
ba korona kekere meke nono lamo koari nana hahanana kaleadi.
18 Arau ele dogori sari nana hahanana, ba kote salaṉia Rau;
kote turaṉia Rau meke va manoto pule ia Rau si asa.
19 Kote poni vinahesi Arau sari berudi rina tie talotaṉadi pa Izireli.
Bule, bule koa gamu pu koa va seu na tata.
Kote salaṉa gamu Rau,” gua se Zihova.* Epi 2:17
20 Ba sari tie kaleadi si guana kolo nakili pa lamana,
sapu lopu boka bule,
meke sari bogusuna si oki sage boni meke remoremo.
21 “Loke binule si koa koari na tie kaleadi,” gua sa Tamasa.* Ais 48:22