60
Sa Tinolava te Zerusalema Vugo Repere
1 Gasa turu Zerusalema, mamu ṉedala vura, ura sa mua kalalasa si ele kamo,
ke ṉedala vura se Zihova koa goi.
2 Doṉo la, sa hinuporo si nobia sa popoa pepeso
meke moatana sa huporo sapu opo la koari na tie,
ba sa kalalasa te Zihova si kamo atu koa goi
meke sa Nana ṉinedala si vura koa goi.
3 Sari butubutu si kote mae koasa mua kalalasa,
meke sari baṉara si kote mae koasa maraqatana sa mua rane vaqura.
4 Va eṉa sagei sari matamu, mamu doṉo varikali:
Doduru si varigara meke atu koa goi;
sari tumu koreo si mae pa seu,
meke sari tumu vineki si paleki rini guana koburu hitekedi.
5 Meke kote doṉo la si agoi meke kote bakala sa mua qinetuqetu,
kote magasa sa bulomu meke siṉi ia na qinetuqetu;
sari tinagotago sapu karovo kolo lamana si kote ta paleke atu koa goi,
koa goi kote atu sari tinagotago tadi na butubutu.
6 Rovana kameli si kote siṉi pa mua popoa
sari kameli vaquradi pa Midiani meke pa Epaha.
Meke doduru pa Siba si kote mae,
paleke qolo meke oto huda humaṉa lea
meke kote zama nia rini sa vinahesina e Zihova.
7 Doduru sipi te Kedara si kote varigara atu koa goi,
sari sipi kokoreo te Nebaioti si kote ta turaṉa atu koa goi;
Kote qetu ni Rau sari na vinukivukihi arini pa Qua hope,
meke kote va sari ia Rau sa Qua Zelepade tolavaena.
8 Esei si hire sapu taputapuru mae guana lei,
guana kukuva pule la pa dia vori?
9 Hinokara doṉo mae koa Rau sari na nunusa;
pa kekenu si sari na vaka tadi pa Tasisi,
turaṉa mae ni rini sari tumu koreo pa seu,
turaṉae dia siliva na qolo,
pude va lavatia se Zihova sa mia Tamasa,
Asa pu Hopena pa Izireli,
ura ele va siṉi nigo Sa sa tinolava.
10 “Sari tie karovodi kote kuri pule i sari mua goba,
meke sari dia baṉara si kote nabulu nigo.
Pa Qua binugoro si seke igo tugo Rau si agoi,
ba kamahire kote va dogoro nigo Rau sa Qua tataru.
11 Sari sasada tamugoi si kote koa tukele eko lamo,
lopu kaqu tava tuku si arini, boṉi na rane,
pude sari tie si kote boka paleke mae ni koa goi sari tinagotago tadi na butubutu,
sari dia baṉara si kote ta turaṉa guana tie ta raovodi.*Rev 21:25-26
12 Ura sa butubutu na binaṉara sapu lopu hiva nabulu nigo si kaqu ta huara;
kote ta huara inete hokara si arini.
13 Sa tinolava te Lebanoni si kote kamo atu koa goi,
sari huda paeni, zunipa, meke saeparasi,
si pude va sari ia sa vasina tanisa Qua Zelepade;
meke kote va tolavaena ia Rau sa vasina tana nenequ Rau.
14 Sari tudia koreo rina mua kana si kote mae todoṉo pa kenumu;*Rev 3:9
doduru pu hakohako nigo si kote mae todoṉo pa nenemu,
meke kote poza nigo rini sa Vasileana Lavata te Zihova,
Zaione sa vasileana Tanisa pu Hopena pa Izireli.
15 Luara panigo Rau meke bugoro nigo, meke ta huara meke ivulu si goi,
ba kamahire si kote tavete igo Arau pude na vina lavata loke vina betona si agoi,
meke na qinetuqetu koari doduru sinage na sage.
16 Kote napoi goi sari na meleke tadi na butubutu
meke ari kalaho kote kopu nigo.
Gua meke kote gilania goi sapu Arau, se Zihova, Arau sa mua Hinarupu,
pu vata rupaha igo, na Tamasa Ṉiṉirana te Zekopi si Arau.
17 Lopu na boronizi ba na qolo si kote paleke poni igo Rau,
meke na siliva lopu na aeana.
Meke lopu huda ba na boronizi,
meke na aeana lopu na patu si kote paleke mae nia Arau.
Na binule si kote vekoa Rau pude na mua koimata
meke sa tinoṉoto si kote mua baṉara.
18 Lopu kote ta avoso pule sa vinaripera pa mua pepeso,
babe na kinolura babe tinahuara pa korapana sa mua voloso,
ba sa hinarupu te Zihova si gua rina mua goba,
meke sa vinahesina Sa si koa koa rini pu nuquru koari mua sasada.
19 Sa rimata si lopu kote na mua kalalasa pana rane,*Rev 21:23, 22:5
babe sa sidara si pude ṉedala atu pana boṉi,
ura e Zihova sa mua kalalasa ninae rane ka rane,
meke sa mua Tamasa asa sa mua tinolava agoi.
20 Sa mua rimata si lopu kote lodu pule,
meke sa mua sidara si lopu kote nae tada pule;
ura e Zihova sa mua kalalasa ninae rane ka rane
meke sari mua rane talotaṉa si kote beto mo.
21 Gua meke kote koa toṉoto sari mua tinoni
meke tagoa rini sa pepeso ninae rane ka rane.
Arini sari na linetelete sapu letei Rau,
na tinavete pa Limaqu soti
pude na vinahesiqu Rau.
22 Sa tatamana sapu visavisa hola si kote ta evaṉae na tina tie,
sa puku tatamana si kote na butubutu ṉiṉirana.
Arau se Zihova;
pa nana totoso kote tuturei taveti Arau si gua arini.”