14
Sa Dada sapu Kaleana Hola
1 Hiera sa zinama te Zihova la koe Zeremaea pa guguana sa dada:
2 “Ziuda si besu,
sari na tie koari na vasileana si kuliusu na tata mate,
kaboa rini sa pepeso,
na tinaruqoqo si sagesage nana pa Zerusalema.
3 Sari koimata si garuni sari dia nabulu pude vagi kolo;
la si arini koari na pou ta gelidi vasina tava naqiti sa kolo, ba loke kolo si koa.
Ke paleke pule ni rini sari na zagi kokobadi;
kurekure meke nunala si arini, meke nobi rini sari batudia.
4 Sa pepeso si pokata
sina loke rukuna sa popoa;
nunala sari tie lelete pa inuma
meke nobi rini sari batudia.
5 Sa kurukuru dia mamaqota pa pezarana
si veko pania sa sa tuna sapu tiqe podoa sa
sina loke duduli si koa.
6 Doṉ'ki pinomodi si turu koari toqere loke hudadi
meke siṉo guana siki pinomo ṉaṉahadi;
sari matadi si lopu dodogorae valeana
sina loke ginani si koa.”
7 “Sari Qua tinoni si kabo vura mae koa Rau:
‘Sari mami sinea si zutu puleni gami si gami,
ba pa laena sa Pozamu, Zihova, si mamu tokani gami.
Ura ele taliri va seu hola taloa si gami koa Goi
meke ele tavete va sea si gami koa Goi soku totoso.
8 Agoi mo si raṉe Igo Izireli,
sa Hinarupu pa totoso tasuna,
ba vea ke guana tie karovomu si Goi koasa popoa,
guana tie ene maena meke puta keke boṉi?
9 Vea ke guana tie hodahodakana tu si Goi,
guana varane sapu loke nana ṉiniraṉira pude variharupi?
Zihova, Agoi si koa Mua pa vari korapa mami,
meke gami si na tie tamugoi mo;
mu lopu etulu gami!’ ”
10 Hiera gua si zama nia e Zihova pa guguadi sari Nana tinoni:
“Na ene va seu si okoro hola nia rini;
lopu boka tuqe puleni rini sari nenedia.
Ke lopu qetu ni e Zihova;
kamahire si kote balabala pulei Sa sari dia kinaleana meke va kilasi koari dia sinea.”
11 Meke zama se Zihova koa rau, “Lopu varavara pude va bulei dia kinoa sari tie hire. 12 Na be madi pa ginani sari tie hire, ba lopu kote avosi Rau sari dia kinabo; be vukivukihi va uququ na vinariponi huiti si arini, ba lopu kaqu qetuni Rau si arini. Na kote latu Rau meke huari tu pa vedara, na soṉe, meke pa oza.”
13 Ba zama si rau, “Baṉara Zihova, sari poropita si tozini sari tie sapu, ‘Lopu kote dogoria gamu sa vedara babe tasuna pa soṉe. Hinokara kote poni gamu Rau sa binule koa holana koasa popoa hie,’ gua.”
14 Ke zama se Zihova koa rau, “Sari poropita si korokorotae kokoha pa Pozaqu Rau. Na lopu Arau garuni, babe vizati babe zama la i si arini. Na korokorotae si arini koa gamu pa dinogodogorae kokohadi, na tepa tinokae koari tomate, vinahesi beku meke zinama hoboro pa dia binalabala soti mo. 15 Gua ke, hiera gua si zama nia Arau Zihova pa guguadi sari na poropita pu korokorotae pa pozaqu Rau: Arau lopu garuni si arini, ba zama si arini, ‘Loke vedara babe soṉe kote tiqua sa popoa hie,’ gua. Sari poropita tugo hire si kote mate pa vedara meke pa soṉe. 16 Meke saripu korokorotae la i rini si kote ta gona vura la koari na siraṉa pa Zerusalema totoso kamo sa vedara meke soṉe. Kote loke tie si koa pude pomunu ni si arini babe sari dia barikaleqe, sari tudia koreo babe vineki. Kote va kamo ni Arau sa tinasuna sapu garo koari na dia tinavete.
17 Ke garunau e Zihova si rau pude tozia sa qua tinalotaṉa koa rini:
‘Mani sa mataqu si zoloria na kolomata
boṉi na rane meke lopu noso;
sina sari qua tinoni, si ta seke
meke bakora va kaleana.
18 Be vura la si arau pa pezara,
si kote dogori mo rau sari tie ta sekedi pa vedara;
be nuquru la si rau koasa vasileana nomana,
si kote dogori rau sari tie matedi pa soṉe.
Sari poropita meke hiama
si ele ta vagi taloa la koasa popoa sapu lopu gilania rini.’ ”
Tepa Sisigiti sari Tie Koe Zihova
19 Vegua, ele kilu pani hinokaria Goi se Ziuda?
Vegua, etulia mo Goi si pa Zaione?
Na vegua ke va bakora gami Goi
meke lopu boka ta salaṉa?
Hata ia gami sa binule
ba loke lineana si kamo mae,
na totoso pude salaṉa
ba si holoqoru tu.
20 Zihova, sari mami kinaleana si tumaeni gami
meke sari na sinea tadi na tamamami;
gami si hinokara ele sekea gami sari na Mua tinarae.
21 Ba pa laena sa Pozamu si Mu lopu veko pani gami;
Mu lopu va kamo nia kinurekure sa Mua habohabotuana tolavaena,
Mu balabala ia sa Mua vinariva egoi koa gami;
Mamu lopu kumatia.
22 Vegua, ele keke rina beku koari na butubutu huporo garunu mae nia sa ruku?
Vegua, boka sa galegalearane telena pude hoqa gore mae nia sia?
Lokari, Zihova mami Tamasa, na Agoi tu bisa.
Gua asa ke koa Goi mo si raṉe atu gami,
ura na Agoi mo vata evaṉi sari doduru hire.