15
Ta Levei sari Tie Ziuda
1 Meke zama se Zihova koa rau, “Be e Mosese babe e Samuela si turu pa Kenuqu, ba lopu kaqu taleoso ni Rau sari tie hire. Na lopu kote tokani Rau, garunu taloa ni!* Ekd 32:11-14; Nab 14:13-19; 1 Samuela 7:5-9 2 Meke pana nanasa igo rini, ‘Pavei kote la si gami?’ gua, si mu tozini, ‘Hiera gua si zama nia e Zihova:* Rev 13:10
Sarini pu ta hia nia pude mate, si la pa minate;
sarini pu tana vedara, si la pa vedara;
sarini pu tana soṉe, si la pa soṉe;
sarini pu tana ta turaṉa taloa, si la pa tinaraovo.’ ”
3 Hiera gua si zama vura nia e Zihova, “Ka made tiṉitoṉa huhuara si kote garunu atu ni Arau koa rini: na vedara pude seke va mate, sari siki pude ririhi taloa ni sari tinidia, sari kurukuru pa galegalearane meke kurukuru ṉame pude gani sari tomatedi. 4 Kote va doṉo hikare i Arau koari na butubutu pa popoa pepeso si arini, koa gua koari tinavete kaleadi pu taveti Manase, sa tuna koreo Hezikaea sa baṉara pa Ziuda, pa popoa Zerusalema.* 2 Baṉ 21:1-16; 2 Koron 33:1-9
5 Esei kote tataru nigo, Zerusalema?
Esei kote besu nigo?
Esei kote noso meke nanasa sapu vegua si goi?”
6 Zama pule se Zihova, “Gamu ele kilu Au si Arau,
meke va mudi mae Au gamu.
Ke kote tuqe vagi gamu Rau meke ilasa gamu;
kamahire lopu boka va vura tataru si Rau koa gamu.
7 Kote oki sage ni Arau pa givusu guana duduli popana
pa hopeke dia vasileana pude mani ta paleke taloa la pa ninae popoa.
Kote va kamo ni tinalotaṉa Rau meke tinahuara sari Qua tinoni,
ura lopu ele hobei rini sari dia hahanana kaleadi.
8 Kote va sokui Arau sari dia naboko
hola ni sari na onone pa masamasa.
Sari mia tie vaqura si kote va matei Rau
meke va tasuna i sari tinadia.
Kote va kamo va hodakia Rau koa rini
sa tinasigiti meke minatagutu.
9 Sa tinadia ri ka zuapa si mabubulu,
meke siṉo mamata sina loke tuna kamahire,
guana lodu sa rimata tanisa sipu korapa rane sa popoa.
Sari pu koa hola si kote va matei Arau pa vinaripera pa kenudi rina dia kana,” zama vura gua se Zihova.
Nominomi se Zeremaea
10 Tinaqu, talotaṉa si rau, vea ke podo au goi si rau?
Na koa vari tokei qua mo koasa doduruna sa popoa!
Lopu hite tepa babe variponi poata si rau,
ba leve beto au doduru tie.
11 Zama se Zihova,
“Hinokara kote va maluara igo Arau koari na mua kana;
hinokara kote tepa tinokae si arini koa goi
koari totoso tasuna meke talotaṉa.
12 Vea, boka moku aeana sa tie,
aeana mae guadi pa kali gede, babe na boronizi?
13 Sari mia poata na tinagotago
si kote variponi ni Rau koari mia kana,
koa gua koari mia sinea pa doduruna sa mia popoa.
14 Kote va pinausu gamu Rau koari mia kana pa popoa sapu lopu gilania gamu,
ura sa Qua tinaṉaziri si huruṉu guana nika sapu kote sulu eko la mo.”
15 Meke zama si arau:
“Zihova, gilania Mua mo;
balabala au; Mamu toka nau.
Tubehe poni au koari kasa pu hiva va mate au.
Mu lopu tataru ni sari qua kana, lala si kote mate mo si rau;
balabala ia sapu pa ginuguamu Agoi si kurekure si rau.
16 Totoso kamo mae sari Mua zinama si henai rau;
na qua qinetuqetu si arini pa buloqu,
ura ta pozae na poropita te Zihova si arau,
sa Tamasa Tadi na Qeto Minate.
17 Lopu hite habotu turaṉi rau saripu zokoro meke hegehegere,
lopu hite qetuqetu turaṉi arau;
koa eke si rau koa gua sapu vizata au Goi si arau,
meke va siṉi nau binugoro Goi koari na dia sinea.
18 Na vegua ke sa qua tina sigiti hie si lopu boka beto meke sa bakora si lopu boka ibu?
Hiva va talotaṉau Goi guana bukaha sapu noso,
na tototolo sapu popa?”
19 Gua ke, hiera gua si zama nia e Zihova:
“Be kekere pule goi si kote vagi pule nigo Rau
pude mu nabulu Nau;
be sari mua zinama si arilaedi meke lopu hoborodi,
si kote zamazama poni Au goi si Arau.
Sari tie hire si madi kekere pule atu koa goi,
ba agoi si mu lopu kekere la koa rini.
20-21 Kote guni nigo Arau na goba koari na tie hire,
na goba sapu tava ṉiṉira pa boronizi;
kote raza igo rini ba lopu kote bokaboka si arini,
ura Arau koa turaṉigo si agoi
pude harupu igo meke lavelave nigo.
Kote harupu igo Rau pa limadia ri na tie kaleadi meke rupaha vagi pule nigo pa dia ṉiniraṉira,”
zama vura gua se Zihova.