22
Sa Inavoso La Koari na Baṉara pa Ziuda
1 Hiera gua si zama nia e Zihova: “Gore la koasa vetu baṉara tanisa baṉara pa Ziuda; mamu tozi vura nia sa inavoso hie:
2 ‘Agoi na baṉara pa Ziuda, mu avosia sa zinama te Zihova, agoi pu habotu koasa habohabotuana baṉara te Devita, sari mua koimata, meke sari mua tinoni pu nuquru koari na sasada hire. 3 Hiera gua si zama nia e Zihova: Tavetia gua sapu toṉoto meke ṉoṉo. Harupu vagia pa limana sa tie ṉoṉovala si asa pu ta hiko. Lopu tavete va kaleana la babe raza ia sa tie karovona, asa sapu loke tamana, babe sa naboko, meke lopu va matei saripu loke dia ginugua sea koasa vasina hie. 4 Ura be kopu si agoi pude luli sari ginarunu hire si sari na baṉara pu habotu koasa habohabotuana baṉara te Devita si kote nuquru gua koari na sasadana sa vetu baṉara hie, koi koari dia totopili varipera meke koari dia hose, turaṉae koari dia koimata meke sari dia tinoni. 5 Ba zama vura gua si Arau Zihova, pana lopu va tabei goi sari ginarunu hire, si tokotokoro si Arau koasa Pozaqu Telequ sapu sa vetu baṉara hie si kote evaṉae na kobi remoremo.’ ”* Mt 23:38; Lk 13:35
6 Ura hiera gua si zama nia e Zihova pa guguana sa vetu baṉara tadi na baṉara pa Ziuda:
“Be leleamu gua sa popoa pa Qileadi si agoi koa Rau,
gua sa batu toqere pa Lebanoni,
ba hinokara kote la Arau meke guni nigo na qega,
guana vasileana ivuluna.
7 Sari tie huhuara si kote garunu atuni Arau koa goi
sapu hopeke paleke dia tiṉitoṉa varipera,
meke kote seke pani rini sari mia dedegere huda sida leanadi meke gona lani pa nika.
8 Na kobi tie mae guadi pa ninae butubutu si kote ene hola gua koasa vasileana lavata hie meke kote vari nanasi, ‘Na vegua ke tavete guni nia tu Zihova sa vasileana lavata hie?’ gua. 9 Meke sa inolaṉa si kote: ‘Sina kilu pania rini sa vinariva egoi te Zihova sa dia Tamasa, meke vahesi meke nabulu dia votiki tamasa tu,’ kote gua.”
Sa Inavoso pa Guguana Zoahazi
10 Mi lopu kaboa sa baṉara matena babe besu nia sa nana minate;
ba mi kabo sisigiti nia si asa pu ta raovo taloa,
sina lopu kote pule mae si asa
babe dogoro pule ia sa sa nana popoa.
11 Ura hiera gua si zama nia e Zihova pa guguana e Zoahazi, sa tuna koreo e Zosaea, sapu hobena sa tamana koasa binaṉara pa Ziuda ba sapu ele taluarae koasa vasina hie: “Lopu kote pule hokara mae si asa.* 2 Baṉ 23:31-34; 2 Koron 36:1-4 12 Kote mate si asa koasa vasina pu ta raovo la si asa; na lopu kote dogoro pule ia sa sa nana popoa.”
Sa Inavoso pa Guguana Zehoiakimi
13 “Mani ta levei sa tie sapu kuria sa nana vetu baṉara pa sinekesekei,
meke sari nana lose panaulu pa hahanana ṉoṉovala,
va tavetavete mokai sa sari turaṉana,
lopu tabari sa koari dia minabo.
14 Zama guahe si asa, ‘Kote kuria rau si keke qua vetu baṉara nomana
sapu soku losena panaulu,’ gua.
Ke tavete nia vuida nomadi sa,
meke goba nia huda sida sa
meke pedi ziṉara ia sa.
15 Vegua, la sa tinavete asa meke va baṉara igo si agoi
totoso tago va soku huda sida si goi?
Vegua, lopu tago va soku ginani na napo tu sa tamamu?
Toṉoto meke ṉoṉo sapu taveti sa,
ke mana nia Tamasa si asa.
16 Lavelave ni sa sari pu malaṉa meke loke gedi,
ke learane sa tinoa tanisa.
Vegua, lopu asa tu laena sapu pude gilana Au si Arau?”
zama vura gua se Zihova.
17 “Ba sari matamu meke sa bulomu
si okoro tinagotago ta hikodi,
va mate tie loke dia ginugua sea
meke tavetavete nia goi sa mua ṉiniraṉira pude ṉovali saripu malaṉa na malohorodi.”
18 Gua ke hiera gua si zama nia e Zihova pa guguana Zehoiakimi, sa tuna koreo Zosaea, sa baṉara pa Ziuda:* 2 Baṉ 23:36 kamo hinia 24:6; 2 Koron 36:5-7
“Loke tie kote kuliusu nia si asa, babe zama guahe:
‘Talotaṉa qua. Mate sa tasiqu!
Kuliusu qua. Mate sa tasiqu!’
Lopu kote kaboa rini meke zama:
‘Talotaṉa qua na mate sa qua baṉara! Beto mo sa tinolava tanisa!’ gua.
19 Kote ta gona palae guana doṉ'ki matena si asa,
sapu ta ririhi taloa
meke ta gona vura koari na sasadana sa popoa Zerusalema.”
Sa Inavoso pa Guguana Zerusalema
20 “Sage la pa Lebanoni, mamu kabo vura,
mani ta avoso pa popoa Basani sa tinaruqoqo,
kabo vura mae gua pa toqere Abarimi pa Moabi,
ura doduru butubutu pu kalavarae i goi si ele mate beto.
21 Ele va balau igo tu Arau totoso tagotago si goi
ba balabala si goi sapu loke kana kote raza igo, gua.
Ke zama si goi, ‘Lopu kote avoso Igo arau!’
Na asa mo sa mua hahanana podalae tu koburumu;
sapu lopu hite va tabe Au goi.
22 Kote ta givusu palae sari doduru mua sepati,
meke sari na butubutu pu tavete ni vinariva egoi agoi si kote ta raovo taloa.
Totoso asa si kote kurekure si agoi meke todoṉo sa batumu
koa gua koari doduru mua kinaleana.
23 Agoi pu koa valeana koari na vetu ta tavete pa huda sida,
guana sapu koa mu tu pa Lebanoni si goi,
kote variva taru si goi pana kamo ta sigiti si goi,
na kote kabo vura gua sa barikaleqe podopodona!”
Sa Inavoso pa Guguana Zehoiakini
24 Zama vura pule se Zihova pa guguana Zehoiakini, “Hinokara gua sapu toaqu si Arau, be agoi Zehoiakini, tuna koreo e Zehoiakimi sa baṉara pa Ziuda, si na riṉi binaṉara* Pana sitaba lania sa baṉara sa nana riṉi binaṉara koari na tinarae si kaqu ta luli si arini. pa lima mataoqu Rau, ba kote daku lobusu pani igo Arau.* 2 Baṉ 24:8-15; 2 Koron 36:9-10 25 Kote vala nigo Arau koarini pu hata hiva va mate igo, sarini pu matagutu ni agoi, sapu se Nebukaneza, sa baṉara pa Babiloni meke sari tie Babiloni. 26 Kote buli nigo Rau, agoi meke sa tinamu pu podo igo, la pa keke votiki popoa, sapu lopu keke gamu kara si podo vasina, meke vasina kote mate beto si gamu kara. 27 Lopu kote kekere pule mae ia goi sa popoa sapu hiva pule sisigiti mae ia goi,” gua se Zihova.
28 Lopu e Zehoiakini si hie, sa tie ta hakohakoena, sa raro huarana,
sa tiṉitoṉa loke tie hiva nia?
Na vea ke ta buli vura tu si asa meke sari nana koburu,
ta gona la pa keke popoa sapu lopu tumae nia rini?
29 Kei agoi na popoa pepeso, talotaṉa nigo qua!
Mu avosia sa zinama te Zihova!
30 Hiera gua si zama nia e Zihova:
“Kubere gore nia sapu sa tie hie si loke tuna,
sa tie sapu lopu kote bokaboka pa nana tinoa koa holadi,
ura lopu keke ari tuna si kote bokaboka,
lopu keke si kote habotu koasa habohabotuana baṉara te Devita
babe kote baṉara nia si pa Ziuda.”
*22:11 2 Baṉ 23:31-34; 2 Koron 36:1-4
*22:18 2 Baṉ 23:36 kamo hinia 24:6; 2 Koron 36:5-7
*22:24 Pana sitaba lania sa baṉara sa nana riṉi binaṉara koari na tinarae si kaqu ta luli si arini.
*22:24 2 Baṉ 24:8-15; 2 Koron 36:9-10