50
Sa Kinorokorotae pa Guguana Babiloni
1 Hiera sa inavoso sapu zama nia e Zihova koe Zeremaea sa poropita pa guguana sa vasileana pa Babiloni meke sa popoa tadirini.* Ais 13:1 kamo hinia 14:23, 47:1-15
2 “Tozi vura nia meke zama vura nia koari na butubutu,
ovulu sage nia sa pitipiti, mamu tozi vura nia;
mu lopu tomea si keke ginugua, ba mu zama guahe,
‘Babiloni si kote ta vagi;
se tamasa Belo si kote tava kurekure,
se tamasa Maraduku si kote matagutu;
sari nana beku si kote kurekure
meke sari nana kineha si kote matagutu.’
3 Keke butubutu pa kali gede si kote rapatia si asa meke huara pania si asa.
Na loke tie si kote koa vasina;
sari tie na kurukuru ṉame si kote govete taloa beto.”
Sa Pinule Tadi na Tie Izireli
4 Zama vura se Zihova, “Koari rane arini, pa totoso asa,
sari na tinoni pa Izireli meke pa Ziuda
si kote kabokaboi meke hata ia se Zihova sa dia Tamasa.
5 Kote nanasa hata nia rini sa siraṉa la pa Zaione
meke kote taliri meke ene la vasina.
Kote mae si arini meke va soto puleni koe Zihova
pa keke vinariva egoi sapu koa hola
sapu lopu kote boka ta muliṉae.
6 Sari Qua tinoni si na sipi muliuṉudi;
na turaṉa va seu i ri dia sepati
meke va talahuarae ni koari na toqetoqere.
Ene muliuṉu si arini koari na toqere na toa
meke muliṉi nia rini sa dia magomagogosoana soti.
7 Arini pu dogori si va matei mo rini;
sari dia kana si zama, ‘Gami si lopu sea,
sina arini si tavete va sea la koe Zihova, sa dia magomagogosoana hinokara,
se Zihova, sapu raṉea ri tiatamadia,’ gua.
8 Mi govete vura pa Babiloni;
mi luaria sa popoa tadi na tie Babiloni,
guana qoti kokoreo sapu ene kekenu meke turaṉia sa rovana.* Rev 18:4
9 Ura na kote sovutu ia Rau meke turaṉa la nia pa Babiloni
si keke vinarigarae butubutu pa kali gede.
Arini kote mae rapatia sa vasileana pa Babiloni,
meke kote vagia rini si asa.
Sari dia tupi si kote guana varane bokabokana
sapu lopu hoke pule moka.
10 Sa popoa Babiloni si kote ta zalo;
sarini pu zaloa si kote vagi soku dia likakalae,”
zama vura gua se Zihova.
Sa Hinoqa te Babiloni
11 “Sina qetu si gamu meke hegehegere kumana,
gamu pu zalo vagia sa Qua tinago,
sina horuhoru si gamu guana bulumakao vaqurana
meke vevehe guana hose,
12 sa tinamu si kote kurekure hola;
asa pu podo igo si kote doṉo gore eko mo.
Kote guana hitekena mo si asa koari na butubutu;
kote ta evaṉae na soloso, na popoa popana, na qega.
13 Koa gua koasa tinaṉaziri te Zihova si kote loke tie koa ia si asa
na kote ta huara va kaleana.
Doduru pu ene hola pa Babiloni si kote matagutu meke va sisire nia
sina ta huara meke doṉo hikare si asa.
14 Vagi sari mia tuturuana pa vari likohaena Babiloni,
doduru gamu pu ṉavea sa bokala.
Gona la ia! Lopu veko holaia keke tupi,
ura ele tavete va sea la si asa koe Zihova.
15 Mi kukili pa doduru vari kalina koasa!
Isana! Ele hoqa sari vetu hakehakei ululuna tanisa!
Isa, va malumu pule nia si asa pude lopu varipera!
Ta huara gore sari gobana sa.
Koa gua sapu hiera sa vina tubehe te Zihova,
si mi hobe mia koasa;
tavete la nia koasa gua sapu tavete lani sa koari kaiqa.
16 Noso i koe Babiloni sari tie lelete,
meke sari tie pakepakete si va taloa i.
Koa gua koasa vedara tanisa kana
si va pulei sari tie la koari dia butubutu soti,
va pulei sari doduru tie la pa hopeke dia popoa.”
Pule sari Tie Izireli
17 Zama vura pule se Zihova, “Izireli si na sipi talahuaraedi
sapu hadu pani rina laione.
Sa tie kekenu pude ṉoṉovalia
si sa baṉara pa Asiria;
sa tie mumudi pude muzari susurina
si e Nebukaneza sa baṉara pa Babiloni.”
18 Gua ke, hiera gua si zama nia e Zihova Tadi na Qeto Minate:
“Kote va kilasia Rau sa baṉara pa Babiloni meke sa nana popoa
gua sapu va kilasa guni nia Rau sa baṉara pa Asiria.
19 Ba kote turaṉa pule mae nia Rau se Izireli pa nana popoa
meke kote henahena si asa pa toqere Kameli meke pa Basani;
kote deṉa pule si asa
koari na toqere pa Iparemi meke Qileadi.”
20 Zama vura pule se Zihova, “Pa totoso asa,
kote hata ia rini sa sinea te Izireli,
ba loketoṉa si kote ta dogoro,
meke sa sinea te Ziuda,
ba loketoṉa si kote ta dogoro,
ura na kote taleoso ni Arau sari ka visavisa tie pu va toa hola i Rau.
21 Rapatia sa popoa pa Merataimi
meke sarini pu koa pa Pekodi.
Hadu luli, va matei meke huara pani,”
zama vura gua se Zihova.
“Taveti sari doduru gua pu garununi gamu Arau.
22 Sa vevehena sa vinaripera si ele kamo,
sa vevehena sa tinahuara nomana hola si podalae!
23 Moku meke ta huara inete sa hama
sapu seke va kaleani sari doduru butubutu pa kasia popoa!
Kamahire Babiloni si koa ta huarana mo koari na butubutu!
24 Agoi Babiloni, na sipata si va nama veko ponigo Rau,
meke totoso lopu gilania goi si kote ta saputu vagi mua mo;
dogorigo rini meke vagi igo sina va gugue la si agoi koe Zihova.
25 Tukelia e Zihova sa lose veko nia tiṉitoṉa varipera Sa
meke vagi vura ni Sa koasa Nana tinaṉaziri,
ura koa dia Nana tinavete sa Baṉara se Zihova Tadi na Qeto Minate koasa popoa pa Babiloni.
26 Topue mae pa seu, mamu mae raza ia.
Tukeli sari nana vetu ginani;
mamu va kobi vekoi sari tinagotago guana huiti.
Huara ilasa toṉotia gana
meke lopu veko hola ia keke tie.
27 Va mate betoi sari na tie varipera,
va mate guni ni na tuna bulumakao;
turaṉa lani vasina kote va eoṉo i gamu!
Mani ta levei gedi! Ura sa dia rane si ele kamo,
sa dia totoso pude tava kilasa.
28 Avoso la i sari tie govetedi pa Babiloni
korapa helahelae pa Zaione
korapa tozia sapu tubehe se Zihova nada Tamasa,
hobena koasa Zelepade Tanisa sapu huaria rini.
29 Sari tie gona tupi si tioko lani pa Babiloni,
doduru pu ṉavea sa bokala.
Mi va turu ipi pa vari likohaena sa;
lopu va malumia si keke tie pude govete.
Hobe mia koari nana tinavete;
tavete lani gua sapu tavete atuni sa koa gamu.
Ura na ele va gugue la si asa koe Zihova,
Asa sapu Hopena pa Izireli.* Rev 18:6
30 Gua ke sari nana tie vaquradi si kote hoqani pa sisiraṉa;
meke sari nana tie varipera si kote mate koasa rane asa,”
zama vura gua se Zihova.
31 Zama vura pule sa Baṉara, e Zihova Tadi na qeto minate: “Isa, Arau kamahire si kana igo, sapu agoi tie va titiemu,
ura sa mua rane si ele kamo,
sa totoso pude tava kilasa si agoi.
32 Sa tie vahesi pule nia si kote tubarae nia meke hoqa
meke loke tie kote toka nia pude va turu pulea;
kote va katuni nika Rau sari nana vasileana
sapu kote sului sari doduru pa vari likohaena sa.”
33 Hiera gua si zama nia e Zihova Tadi na Qeto Minate:
“Sari tie pa Izireli si ta ṉoṉovala,
meke sari tie pa Ziuda ba gua tugo.
Sari votiki butubutu pu zau vagidi si kopu eko ni mo rini si arini,
meke korodia pude vata rupahi.
34 Gua ba sa dia Hinarupu si ṉiṉira;
e Zihova Tadi na Qeto Minate sa Pozana Sa.
Na kote lavelave hinokara ni Sa
meke turaṉa puleni pude la magogoso pa dia popoa,
ba sari tie Babiloni si lopu kote magogoso.”
35 Zama vura pule se Zihova, “Na vedara pude sekei sari tie Babiloni!
Na vedara pude sekei sarini pu koa pa Babiloni
meke sari nana koimata meke tie tumatumaedi!
36 Na vedara pude sekei sari nana poropita kokohadi!
Madi ta evaṉae na tie pekipekidi.
Na vedara pude sekei sari nana varane!
Madi koa holoqoru.
37 Na vedara pude sekei sari nana hose meke totopili varipera
meke sari tie varipera karovodi pu ta holudi,
sapu kote matagutu guana barikaleqe.
Na vedara pude sekei sari nana tinagotago!
Kote ta zau vagi si arini.
38 Na soṉe si kote kamo!
Sari kolo si kote popa.
Ura na popoa tadi na beku,
beku sapu kote pupuhu meke matagutu.
39 Ke sari kurukuru pa qega meke siki pinomo si kote koa vasina,
meke vasina si kote veko kinoa sa duduru.
Na lopu kote koa pule ia na tie
babe ta koa pule koari na sinage na sage.”* Rev 18:2
40 Zama vura se Zihova, “Gua sapu ta huara sari pa Sodomu meke Qomora,
meke sari na vasileana pa vari kalidia,
si kote loke tie si koa vasina;
loke tie si kote veko kinoa vasina.* Zen 19:24-25
41 Dotu, na qeto minate si korapa mae gua pa kali gede;
na butubutu nomana meke somana ni ri na baṉara,
ta gevuru mae guadi koari na popoa pa seu.
42 Na paleke bokala na hopere si arini;
na tie kaleadi meke loke dia tataru.
Vevehe guana bogusu puzakadi si arini
totoso koi rini pa dia hose;
mae va namanama si arini pude varipera
pude rapata igo si agoi, agoi na vasileana pa Babiloni.
43 Sa baṉara pa Babiloni si ele avosi sari vivineidi rini,
meke isu hoboro mo sari limana sa.
Kamo va hodaka ia na sigiti,
sigiti gua sa barikaleqe podopodona.
44 Gua sa laione sapu vura mae pa hiqohiqo Zodani
meke la koasa pezara duduli tana sipi,
si kote hadua Rau se Babiloni pa nana pepeso pa vasi totoso hite mo.
Esei si ta vizatana sapu kote tozi nia Arau pude tavetia si hie?
Esei si gugua Arau meke esei kote boka raza Au?
Meke na sepati savana kote toke mae Au?”
45 Gua ke, avosia sa si kote hiva balabala tavetia e Zihova koe Babiloni,
sa si va egoa Sa pude tavete la nia koasa pepeso tadi na tie Babiloni:
Sari koburu hite si kote ta ririhi taloa guana sipi;
meke sari dia vetu si kote ta huara palae hokara.
46 Pa mamalaiṉina sa hinoqa te Babiloni si kote madidiri sa popoa pepeso;
sa kinabo tanisa si kote ta avoso kamo la koari na butubutu pa seu.