13
Sa Vina Kilasa te Babiloni
1 Hie sa kinorokorotae pa guguana Babiloni sapu vagia Aisea tuna Emosi koe Tamasa:* Ais 47:1-15; Zer 50:1 kamo hinia 51:64
2 Zama vura guahe se Zihova, “Va sagea sa pitipiti pa batu toqere sapu loke hudana,
mi kukili la i; tioko la i
pude nuquru pa sasada tadi na palabatu.
3 Arau ele garuni sari qua tie hopedi;
ele tioki Rau sari Qua varane pude va gorevura ia sa Qua tinaṉaziri,
arini pu kote qetu nia sa vina lavataqu Rau,” gua.
4 Va avoso, na vevehe si koari na toqere,
guana tadi na kobi tinoni!
Va avoso, na ṉoveoro si koari na butubutu,
guana kobi butubutu si vari kamoi!
E Zihova Tadi na Qeto Minate
si va nama i sari Nana tie varipera.
5 Na maedi pa popoa seu si arini,
pa vina betona sa kasia popoa,
e Zihova meke sari likakalae varipera pude gorevura ia sa Nana tinaṉaziri,
pude huara ia sa doduruna sa popoa.
6 Mi kabo gamu, ura sa rane te Zihova si tata kamo;
kote kamo guana tinahuara tanisa Tamasa pu tagoi sari doduru ṉiniraṉira.* Zol 1:15
7 Koasa ginugua hie, si kote mate beto sari doduru lima,
sari bulodia ri doduru tie si kote malohoro gore.
8 Na holoqoru si kote kamo koa rini,
tinasigiti meke tinalotaṉa si kote koa koa rini;
kote ta sigiti guana barikaleqe podopodona.
Kote vari doṉoi pa ninunala si arini,
sari isumatadia si kote kurekure sisigiti.
9 Doṉo la, sa rane te Zihova si korapa mae,
na rane kaleana sapu koa ia sa tinaṉaziri na binugoro ṉiṉirana,
pude huara pania sa popoa meke va mate pani sari na tie kaleadi.
10 Sari pinopino pa maṉauru,
si lopu kaqu va vura i sari dia kalalasa.
Sa rimata sapu gasa si kote tava huporo
meke sa sidara si lopu kalalasa.* Izk 32:7; Mt 24:29; Mk 13:24-25; Lk 21:25; Rev 6:12-13
11 Kaqu va kilasia Rau sa kasia popoa koasa nana kinaleana,
sari na tie kaleadi koari na dia tinavete sea.
Kaqu va kokoi ia Rau sa vinahesi pule tadi na tie va titiedi,
meke kote va kurekure i Rau sari tie loke dia tataru.
12 Sari tie koa holadi si kote visavisa guana qolo viana,
kote lopu ta dodogoro sigiti si arini, hola nia sa qolo pa Opira.
13 Gua ke, kote niu ia Rau sa maṉauru,
meke kote matagutu si asa gua na tie,
meke sa kasia popoa si kote niu na rizu pa nana vasina;
koasa tinaṉaziri te Zihova Tadi na Qeto Minate,
koasa rane sapu huruṉu vura sa Nana binugoro.
14 Kote guana kurukuru dia ta hukuena,
guana sipi sapu loke nana sepati,
kote hopeke hatai rini sari dia butubutu,
hopeke govete pule pa dia popoa.
15 Asa pu ta saputu vagi si kaqu ta hova va mate;
doduru pu ta raovo vagi si kote mate pa vedara.
16 Sari dia koburu si kote seke muzari rini sipu korapa doṉo dia mo;
kote ta vagi palae sari dia tinago pa vetu meke tavete va sea koari na dia barikaleqe.
17 Doṉo la, kote turaṉa mae ni Rau sari pa Media,
sarini pu lopu galagala nia sa laena sa siliva
meke lopu boka qetu nia sa qolo.
18 Pa dia bokala kote seke goreni rini sari tie vaqura;
kote loke dia tataru koari na haha
meke lopu kaqu balabala pule pana sekei rini sari koburu.
19 Babiloni, sa patu ṉedala koari na binaṉara,
sa tinolava meke vinahesi pule tadi tie Babiloni,
kote gona gore nia sa Tamasa si asa,
gua ri pa Sodomu meke Qomora.* Zen 19:24
20 Babiloni si lopu kote ta koa pule hokara
babe ta veko kinoa koari na sinage na sage;
loke tie Arebia d si kote la turu ipi vasina,
loke sepati kote la va magogoso sipi vasina.
21 Ba sari kurukuru pa qega si kote la koa vasina,
sari na siki kote la siṉi sari vetu;
vasina kote koa sari duduru,
meke vasina kote horu lamae sari na qoti pinomodi.* Ais 34:14; Zepa 2:14; Rev 18:2
22 Na siki ene boṉi si kote kabo koari na vetu ṉiṉiradi,
na siki si kote koa koari na vetu baṉara.
Sa totoso te Babiloni si ele kamo,
meke sari nana rane si tata hola dia mo.
*13:1 Ais 47:1-15; Zer 50:1 kamo hinia 51:64
*13:10 Izk 32:7; Mt 24:29; Mk 13:24-25; Lk 21:25; Rev 6:12-13
*13:21 Ais 34:14; Zepa 2:14; Rev 18:2