SA BUKA TE
ZOILI
Sa Vinabakala
Vasinahite mo si ta gilana guguana sa poropita Zoili, meke lopu bakala tugo sapu totoso sa si koa ia sa. Ba gina ta kubere sa buka hie pa kalina mae sia gogoto babe gore kamo vuaheni made gogoto sipu lopu ele podo se Zisu Karisito, totoso koa baṉara sari tie Pesia. Vivinei nia Zoili sa guguana sa ninuquru mae tadi na kupokupo kaleadi hola meke sa dada lavata pa Palesitaeni. Koari na ginugua hire si dogoria sa si keke vina gilagila koasa Rane Tanisa Baṉara; totoso sapu kaqu va kilasi e Zihova sarini pu kilua sa Nana hiniva toṉotona. Tozi vura nia sa poropita sa tinioko te Zihova koari na tie pude kekere, meke sa vina tatarana sa Nana vinaleana pule meke sa Nana minana koari na Nana tie. Bakala valeana sa vina tatara sapu kaqu garunu gore mae nia Tamasa sa maqomaqona koari doduru tinoni, palabatu na barikaleqe, tie vaqura meke na barogoso na kaleqe.
Sari na Ṉati Pinaqapaqahana sa Buka
Sa oza tana kupokupo. Hinia 1:1 kamo hinia 2:17
Sa vina tatarana sa vina leana pule. Hinia 2:18-27
Sa Rane Tanisa Baṉara. Hinia 2:28 kamo hinia 3:21
1
1 Hie sa inavoso te Zihova koe Zoili sa tuna e Petueli.
Kuliusu nia ri na Tinoni sa Tinahuara tadi na Linetelete
2 Mi va avoso mae gamu na tie komiha mia,
meke gamu doduru pa Ziuda.
Vegua ele hoke ta evaṉa tugo si keketoṉa pa totoso tamugamu
babe pa totoso tadi na tiatamamia pukerane sapu guahe?
3 Vivinei nia koari na mia koburu sa guguana sa;
meke arini kaqu tozini sari na tudia,
meke arini pule kaqu tozini sari kasa tumia vugo repere.
4 Rovana na rovana kupokupo si hake koari na linetelete;
meke be kaiqa elelo si koa hola saripu lopu ta gani koa keke rovana, si kaqu ta gani va mate koa keke rovana votikaena si asa.
5 Vaṉunu, mamu kabo gamu na tie mari naponapo mia;
mi kabo gamu na tie pu hoke napo vaeni;
sari na qurepi pu hoke taveteni vaeni vaqura si ta ṉovala palae beto.
6 Keke puku minate kupokupo si raza ia sa popoa;* Rev 9:8
ṉiṉira hola si arini meke lopu boka ta nae sina soku hola;
sari na livodi rini si ṉaru gua tugo na livo laione.
7 Ṉovala betoi rini sari nada huda vaeni
meke gani va matei rini sari na nada huda piqi,
ṉurihi rini sari na kapudi rina huda osolae keoro beto sari na lelaṉadi.
8 Mi kabo gamu na tinoni,
gua puta tugo keke vineki
sapu kuliusu nia sa sa minate tanisa koreo sapu hiva haba ia sa.
9 Namu loketoṉa huiti babe na vaeni si kaqu ta vala pa Zelepade;
sari na hiama ba kuliusu tugo sina loketoṉa sa dia vinariponi la koe Zihova.
10 Qega sari na inuma;
kuliusu sa pepeso,
sina ta ṉovala sari na huiti,
popa sari na qurepi
meke harahara sari na huda olive.
11 Mi kuliusu gemi si gamu na tie uma;
mi kabo gamu pu hoke kopuni sari na inuma vaeni,
sina sari na huiti, na bale,
uve meke sari doduru linetelete si ele ta ṉovala beto.
12 Sari na huda vaeni meke na huda piqi si harahara;
sari doduru huda vuvua si egoro meke mate beto.
Sa qinetuqetu tadi na tie ba ele beto tugo.
13 Gamu na hiama pu tavetavete koasa hope,
mi va sagei sari mia poko tinalotaṉa mamu kabo!
Mi nuquru la pa Zelepade,
mamu kabo doduru boṉi vasina!
Loke huiti na vaeni pude vukivukihi lani koe Tamasa.
14 Tozini sari na tinoni pude madi pa hinenahena;
mamu tiokia si keke vinarigara!
Varigarani sari na koimata
meke sari doduru tinoni pa Ziuda,
mamu nuquru la pa Zelepade te Zihova sa mia Tamasa,
mamu kabo na varavara tepatepa la koa Sa.
15 Ele tata mae sa rane te Zihova;* Ais 13:6
na rane sapu kaqu va maea sa Tamasa pu tagoi sari doduru ṉiniraṉira
sapu sa rane tana tinahuara.
Variva holoqoruna hola sa rane asa.
16 Malaṉa si gita sina ta ṉovala sari nada linetelete.
Loke qinetuqetu tugo si koa pa korapana sa Zelepade tanisa nada Tamasa.
17 Mate sari na kiko koasa pepeso popana.
Loke vasi kiko si boka tava naqiti,
ke sari na vetu vekovekoana kiko si kokobadi,
ke ta huara palae.
18 Kabo pa tinalotaṉa sari na bulumakao,
sina loketoṉa hokara sa duduli tadirini pu koa;
malaṉa tugo sari na rovana sipi.
19 Kabo atu koa Goi si rau, ke Zihova,
sina sari na duduli na huda si mate beto,
gua na sului nika si arini.
20 Sari na kurukuru pinomo ba kabo atu tugo koa Goi,
sina popa beto sari na leana.