6
Zobi
1 Zama se Zobi,
2 “Be ta veko sari na qua tinasigiti koari na padapadana mamata,
3 si kote mamata hola ni rini sari na onone pa masa,
gua ke bebeno sari qua zinama.
4 Sari na tupi tanisa Tamasa pu tagoi sari doduru ṉiniraṉira si soto dia koa rau,
meke sari na pasapasa tadirini si herere pa doduru tiniqu.
Va nama i Tamasa sari na ginugua variva matagutudi pude va raza ni pa qua tinoa.
5 Vea, hoke kabo sa doṉ'ki pana gani duduli si asa,
babe kabo sa bulumakao totoso gani duduli si asa?
6 Ba esei boka hena sa ginani sapu lopu ta vala soloti ke loke liṉiliṉina?
Vea, koa ia liṉiliṉi sa keorona sa vovoto?
7 Lopu equ henai sari ginani gua arini,
arini ginani si sea mae koa rau.
8 Kei, be vagia mo rau gua sapu tepa ia rau,
be poni au mo Tamasa gua sapu hiva nia rau,
9 be malumu sa Tamasa be va mate au mo,
be lopu aqa ba va mate au mo Sa kamahire pa Limana.
10 Be gua asa sa Tamasa, be kote qetu hola si rau pa korapana sa qua tinasigiti,
ba gilania rau sapu sa Tamasa si hopena.
Na lopu ele hoke toke i arau sari Nana zinama.
11 Na ṉiniraṉira savana si tagoa rau, ke kote boka toa nono la tu?
Na sa sari kaiqa hiniva leadi sapu kote ta evaṉa koa rau ke kaqu aqa tu si rau?
12 Vea, ṉiṉira guana patu si rau?
Meke, na boronizi sa tiniqu?
13 Loke qua ṉiniraṉira si arau pude harupu pule nau;
loke tie si koa pude toka nau.
14 Pa totoso tasuna gua hie, be guana veko pania rau sa vina tabena sa Tamasa pu tagoi sari doduru ṉiniraṉira babe lokari,
ba na tataru tadi qua baere si okoro nia rau.
15 Ba gamu na qua baere, si sekesekei nau gamu,
guana tototolo sapu popa totoso dada sa popoa,
16 meke pa totoso ibu si siṉi sage sari na ovuku na tukui na aesi na sinou.
17 Ba totoso mae sa maṉini si murimuri taloa,
meke popa sari na taqele.
18 Sari na tokele kameli pu paleke likakalae si ene karovo pa qega;
pa hinata kolo si hoke muliuṉu si arini osolae mate pa soloso qega.
19 Sari na tokele kameli tadi na tie holuholu pu mae guadi pa Siba meke Tema si hata kolo,
20 ba balabala mamata totoso kamo si rini koari na tototolo popadi.
21 Gamu si kekeṉoṉo gua tugo rina tototolo,
dogoria gamu sa qua tinasuna meke matagutu si gamu.
22 Vea, ele tepa gamu rau pude poni au vinariponi,
babe holu vagia sa qua tinoa,
23 babe pude harupau koari na qua kana,
babe holu vura nau pa limadi rina tie kaleadi?
24 Leana, mi va tumatumae au, maqu noso;
va dogoro nau pavei si sea si rau.
25 Variva sigiti pana hinokara sari na zinama,
ba gamu hire si zama hoboro sisigiti.
26 Hiva va toṉoti gamu sari na qua zinama,
meke va guni ni na givusu sari na zinama tanisa tie talotaṉana?
27 Gamu boka mudumudukeda ni mo sari koburu loke tamadia,
meke holuholu pania sa mia baere soti.
28 Ba kamahire, si mi doṉo toto mae au,
na lopu kote koha gamu rau.
29 Noso si gamu. Mi lopu ṉoṉovalau;
Lopu zutu au, sina korapa toṉoto qua si rau.
30 Ba balabala ia gamu sapu kokohaqu si rau.
Balabala ia gamu sapu lopu boka gilania tu rau sapu ta ṉoṉovala si rau?