7
1 Na tinoa tie si gua tugo na qeto tie pu ta zukuru tinavete tasunadi,
gua sa tie tavetavete pa limana doduru rane,
2 gua sa pinausu pu aqa nia sa puluvelu,
babe gua tugo sa tie tavetavete pu aqa nia sa nana tinabara.
3 Vari luli sidara ba loke laena si toa nia rau;
vari luli boṉi si koa talotaṉa mo si rau.
4 Totoso eko rau pude puta si hitehite hola sa totoso:
doduru boṉi si taliri mo si rau, osolae kamo sa vaqavaqasa.
5 Sa tiniqu si siṉia na nokinoki,
meke tale tubuna,
sapu puzaka meke vura i na muzi.
6 Sari qua rane si tuturei hola taloa dia,
pa vina betodi si loketoṉa sapu leadi si ta evaṉa.
7 Mu balabala ia Tamasa, sapu sa qua tinoa si guana keke siniṉo mo;
sari qua qinetuqetu si ele murimuri palae.
8 Kamahire si dogorau sa tie, meke lopu kaqu dogoro pule au sa.
Totoso hatau sa si kote ele taloa tu si rau.
9-10 Kekeṉoṉo guana lei sapu murimuri taloa,
sa tie sapu la pa lovu si lopu pule mae,
meke ta muliṉae koari pu gilania.
11 Gua ke kaqu zama si rau, lopu va mokomoko au;
kaqu zama vura si rau koasa tina sigiti pa maqomaqoqu.
12 Na vegua ke kopu totoko nau tu Goi?
Nasa guni nau Goi si rau, na kurukuru malivi pa lamana?
13 Eko si rau meke podekia pude magogoso,
hata ia rau pude va mamaheloa sa tina sigiti.
14 Gua ba hoke la tu Goi meke va matagutau koari na pinutagita,
hoke puta dogori rau saripu variva matagutudi,
15 osolae equ hiva ta kunele si rau, maqu mate.
Koroqu koa ia rau sa tiniqu hie.
16 Beto nia rau sa tinoa hie; ele mabo nia rau.
Veko pani au. Sa qua tinoa si loke guguana.
17 Mua sa sa tie ke va arilaena hola ia tu Goi?* Sam 8:4, 144:3
Na vea ke kopu totoko nia tu Goi?
18 Ke vilitia tu Goi doduru munumunu,
meke podekia Goi doduruna sa rane.
19 Vea, lopu kaqu hite doṉo va seu paki Mua
pude maqu hite onolo loro si rau?
20 Agoi pu kopu tie, vea ta sigiti ni Mua sari na qua sinea?
Na vegua ke arau si guni nau Agoi na Mua gonagonana?
Vea, va tasuna Igo rau?
21 Vea ke lopu taleoso nau mo koari qua sinea?
Ura, kote tata mate mo si arau,
meke kote hata au Goi ba lopu kote koa si arau.”