8
Bilidadi
1 Zama se Bilidadi, sa tie mae guana pa popoa Sua,
2 “Vea seunae gua kote zama ni goi sari zinama gua arini,
sapu hiru gua tugo na givusu?
3 Sa ṉinoṉo si lopu hite va sire ia sa Tamasa pu tagoi sari doduru ṉiniraṉira,
meke sa tinoṉoto si lopu hite va koqi ia Sa.
4 Sari na tumu si gina va sea la koe Tamasa,
ke va kilasi Sa gua sapu garodi.
5 Ba be doṉo la si goi koasa Tamasa,
meke tepa zoṉazoṉa la si agoi koa Sa pu tagoi sari doduru ṉiniraṉira,
6 be toṉotomu meke viamu si goi,
si kote mae sa Tamasa meke toka nigo
meke va pule vatu ni Sa koa goi saripu tagoi goi tatasana.
7 Doduru mua tinago pu ta vagi palae si hiteke,
ba noma hola tu sapu kote poni pule nigo sa Tamasa.
8 Hata ia sa ginilagilana tadi tie pukerane,
mamu viliti gua sapu tumae nia ri tiatamada.
9 Ura norae mo si podo gita, meke loketoṉa gilania;
meke sari rane toa ni gita pa kasia popoa si hola taloa gua tugo na maqomaqo.
10 Ba va malumi goi sari na tie pukerane pude tozi nigo,
va avoso la koari na dia zinama.
11 Na kuli si toa vasina koa sa kolo,
lopu hoke ta dogoro vasina sapu loke kolona.
12 Totoso popa sa kolo, lopu sana mate kekenu hokara,
kote harahara tuturei hola si arini.
13 Arini pu muliṉi nia sa Tamasa si gua tugo na kuli;
sari dia hiniva si murimuri taloa, totoso muliṉi nia rini sa Tamasa.
14 Sapu kalavarae ia rini si malohoro meke huara,
guana aba tanisa kaqa.
15 Pana kalavarae ia rini sa aba si vegua kote tuqe sia?
Pana saputu la i rini sari na lozina si kote ta tokae pude turu si arini?
16 Sari tie kaleadi si toqolo vura guana duduli pa rimata,
guana duduli sapu araha pa inuma.
17 Sari na karosodi si ilupae koari na patu,
meke tuqe va nabu koari na patu.
18 Ba totoso ta rabutu palae si arini,
sari vasidi arini si kote zama, ‘Gami lopu gilana gamu.’
19 Uve, gua mo arini sari qinetuqetu tadi na tie kaleadi;
meke toqolo hobe mo si kaiqa koari dia vasidi.
20 Ba sa Tamasa si lopu kote kilu pania si keke tie toṉoto
babe tokani sari tie kaleadi.
21 Kote va hegere igo Sa si goi,
na va kukili pule igo Sa.
22 Ba kote va kurekure i Sa saripu kana igo,
meke sari vetu tadi na tie kaleadi si kaqu tava murimuri palae.”