8
Sa Tamasa si Ululu Hola nia sa Tie
(Keke kinera te Devita)
1 Ke Zihova, mami Baṉara,
sa Mua vina lavata si ta dogoro pa doduruna sa kasia popoa,
meke tavahesi si Goi koari na Maṉauru.
2 Ele kera vahesi Igo rina koburu na haha koasa Mua ṉiniraṉira.*Mt 21:16
Koa gua koari na Mua kana si hukati na va nosoi Goi si arini pu hiva va kilasa hobe Igo.
3 Sipu doṉo la i na balabala i rau sari na Mua maṉauru pu kuri Goi pa limamu,
meke sari na sidara na pinopino pu ele va turui Goi,
4 nasa sa tie ke balabala sisigitia Goi,*Zob 7:17-18; Sam 144:3; Hib 2:6-8
meke na tie hokara ba kopu nia Goi?
5 Ura ele tavetia Goi sa tie pa kinehamu Goi,
pude koa pa kauruna sa Mua ṉiniraṉira, pa kaurudi sari na mateana.
Meke ele ponia ṉiniraṉira na vina lavata Goi koa rina tie pude koa totoli.
6 Ele vekoa Goi pa kinopudi rini sari doduru Mua vina podaka pu kuri Goi pa limamu.*1 Kor 15:27; Epi 1:22; Hib 2:8
Ele vekoa Goi pa kinopudi sari doduru likakalae,
7 doduru sipi, na bulumakao, meke doduru kurukuru ṉame pa pepeso,
8 sari na kurukuru tapuru, meke na igana pa kolo,
meke sari doduru tiṉitoṉa pule pu koa koari na lamana peava.
9 Ke Zihova, mami Baṉara,
sa Mua linavata si ta dogoro pa doduruna sa kasia popoa.