9
Sa Zinama Leana koe Tamasa koasa Nana Vinilasa Va Toṉoto
(Keke kinera te Devita)
1 (Aleph)* Hopeke pukudi koari na Sam 9 meke 10 si podalae koa keke leta pa “A Ba Da” pa Vinekala Hiburu. Kaqu vahesi zoṉazoṉa Igo rau si Agoi Zihova pa doduru buloqu.
Kaqu tozi vurani rau sari doduru Mua tinavete variva magasadi.
2 Kaqu qetuqetu si rau meke va lavata Igo,
kaqu kera vahesia rau sa Pozamu, ke Zihova Ululumu Hola!
3 (Bet) Sipu vura mae si Agoi si govete pule taloa sari na qua kana,
meke hoqa mate pa kenumu Goi si arini.
4 Vilavilasa va toṉoto si Agoi koa rina Mua vinaripitui,
meke sipu korapa koa pa Mua habohabotuana Baṉara
si ele varipitui toka nau Goi koasa Mua vinizata toṉotona.
5 (Gimel) Ele norei Goi sari na butubutu huporodi,
meke ele va mate pani Goi sari na tie kaleadi.
Loke tutidia si koa ninae rane ka rane.
6 Ele tava mate palae pa tinahuara sari na kana ninae rane.
Ele huara pani Goi sari na dia vasivasileana,
meke ele ta muliṉae hokara sa binalabaladi rini.
7 (He) Ba se Zihova si koa Baṉara ninae rane ka rane,
ele va turua Sa sa Nana habohabotuana varipituina.
8 Meke varipitui va toṉoto nia Sa sa kasia popoa.
Kaqu vilavilasa va toṉoto si Asa koari doduru tie.
9 (Vav) E Zihova si na aqoroana tadi doduru pu koa ta ṉoṉovala,
meke na bara patu ululuna pa vasileana pa totoso tasuna.
10 Meke sarini pu gilania sa Pozamu si kaqu kalavarae zoṉazoṉa koa Agoi,
ura Agoi Zihova si lopu kilui sarini pu hata Igo.
11 (Zain) Mi kera vahesia se Zihova sapu koa Baṉara pa Zaione;
tozi vurani koari doduru tie sari Nana tinavete.
12 Ura balabala i sa Tamasa sarini pu koa ta sigiti meke mate,
meke lopu muliṉi nia Sa sa dia kinabo.
Meke va kilasi Sa sarini pu ṉoṉovala la koarini.
13 (Het) Ke, Zihova, Mu tataru nau,
dogoria Goi sa qua tinasigiti pu evaṉa nau rina qua kana.
Mu va sare au pa minate,
14 pude maqu tozi vurani rau pa vinarigara tie pa Zerusalema sari doduru vinahesimu Goi,
meke kaqu qetuqetu nia rau sa Mua hinarupu.
15 (Tet) Sari na butubutu si gelia rini si keke pou pude va hoqa au, gua,
meke ṉovala puleni teledia,
tavetia rini si keke sipata pude vagi au,
ke koari na dia binalabala kaleadi pu tavete tomei rini si ta vagi tugo si arini.
16 Ele vata gilana pule nia telena koa gita se Zihova pa Nana vinaripitui toṉotona.
Ele ṉovala puleni teledia sari na tie kaleadi koari na dia tinavete kaleadi pu va pada ni rini pa votiki tie.
17 (Yod) Kaqu kekere la pa minate sari na tie kaleadi,
meke sari na tie huporo pu hoke muliṉi nia sa Tamasa.
18 (Kaph) Sari na habahuala si lopu kaqu ta muliṉae koe Zihova,
meke sa inokoro nabuna tadi na habahuala pude tava sare,
si kaqu koa hola ninae rane ka rane.
19 Kei Zihova, mae toka nau pude madi lopu koa va mataqara sari na tie.
Madi ta pitu gedi pa kenumu Goi sari na butubutu huporodi.
20 Kei Zihova, va mataguti gedi si arini,
pude madi gilania sapu na tie mo si arini.