7
Kerania Devita se Saula sapu pa Butubutu Benisimane
1 Ke Zihova, qua Tamasa,
koa Agoi mo si kalavarae si arau.
Mu harupau koari doduru qua kana pu hata au na rapata nau,
mamu va sare au.
2 Pudedi lopu va mate au rini,
gua sapu hoke garata luraia na laione sa tie,
meke hoke ririhi taloa nia sa vasina loke tie pude va sare au.
3 Ke Zihova, qua Tamasa,
be ele evaṉia rau si keke kinaleana koa keke tie,
be ele tavete va sea si rau,
4 ba be ele tavete va kaleana la si rau koasa pu koa baere koa rau,
meke be ele hobe la nia kinaleana sapu lopu toṉoto koasa pu kukiti nau,
5 be guana arini si evaṉi rau,
si ego, leana, maqu govete ni sari na qua kana,
madi tuqe vagi au meke neti va konekone au rina qua kana si rau.
Madi va mate au rini meke pomunu nia sa tiniqu pa pepeso.
6 Ke Zihova, tuturei mae, mamu toka nau pa Mua tinaṉaziri;
Mamu toketoke hukata nau koari na binugoro tadi na qua kana.
Ke Zihova, tuturei mae, mamu toka nau,
Mu va vura nia Goi gua sapu toṉoto.
7 Mu varigara ni sari doduru tinoni pa vari likohaemu,
Mamu koa baṉara ululu hola koa rini si Agoi.
8 E Zihova, Mu varipitui ni sari na tinoni.
Mu varipitui nau Zihova, koasa qua tinoṉoto,
ura gilania Mua Goi sapu loke qua kinaleana si rau.
Agoi sina Tamasa Ululumu Hola koari doduru.
9 Na Tamasa toṉoto si Goi,*Rev 2:23
meke varipitui ni Goi sari na mami binalabala na hiniva,
Mu va betoi Goi sari na kinaleadi tadi na tie kaleadi,
ba Mamu piai Goi sari na tie toṉoto.
10 Sa Tamasa Ululuna Hola si na qua lave,
harupi Sa saripu toṉoto pa bulodi.
11 Varipitui va toṉoto sa Tamasa,
doduru totoso si va kilasi Sa sari na tie kaleadi.
12 Be lopu kekere si arini,
si kaqu vilu va ṉarua Tamasa sa Nana magu varipera,
meke va namanama malosia meke ṉavea Sa sa Nana bokala.
13 Ele va namanama i Sa sari Nana tiṉitoṉa varipera variva matedi;
ele va ṉarui Sa sari Nana tupi huruṉudi.
14 Dotu! Sari na tie kaleadi si va podoi rini sari na kinaleadi;
va namanama i rini sari na tinavete pude ṉoṉovali na sekeseke ni sari na tie.
15 Taveti rini sari na pou lohidi pude va hoqani votiki tie gua,
ba teledia tugo hoqa pulei si arini.
16 Sari na dia kinaleadi si hoqa pule pa batudia;
meke sa dia ṉinovaṉovala pa tie si kaqu vata sigiti pulei teledia.
17 Zama leana si rau koe Zihova koasa Nana tinoṉoto,
meke kaqu kera vahesia rau se Zihova,
sapu Ululuna Hola koari doduru.