23
Zobi
1 Olaṉa se Zobi,
2 “Korapa ta sigiti nia mo rau sa qua ninominomi kamo ṉinoroi,
hilala si rau ba sa lima Tanisa si mamata eko mo.
3 Be gilania mo rau pavei kote boka dogoria rau si Asa;
be boka rau, maqu kamo la vasina koa si Asa!
4 Kote tozia rau sa qua ginugua pa kenuna Sa.
Kaqu va bakalia rau guguana sa qua tinoa.
5 Kaqu vagi vura nia rau sa Nana inolaṉa,
meke boka gilani sari Nana zinama mae koa rau.
6 Be toke au Sa si kote tavetavete nia Sa sa Nana ṉiniraṉira nomana beka?
Lokari, kote va avoso si Asa totoso zama si rau, meke lopu zutu au.
7 Arau na tie ṉoṉo si boka va vura binalabala koa Sa,
meke kote koa ta rupaha ninae rane si rau koasa tie varipitui.
8 Ba pude la hata ia rau pa kali gasa rimata, si lopu koa si Asa vasina,
meke pude la arau pa kali lodu rimata si lopu dogoria tugo rau.
9 Hata ia rau pa kali gede meke kali matao vasina sapu tavetavete si Asa,
ba lopu boka ta dogoro si Asa.
10 Ba gilania Sa sa siraṉa korapa enea rau,
meke pana ele podekau Sa si kote vura mae guana qolo viana si rau.
11 Sari nenequ si ene luli valeani sapu tanisa;
kopu nia rau sa Nana siraṉa meke lopu paza.
12 Lopu hite rizu taloa si rau koari Nana ginarunu;
va naqiti rau sari Nana zinama, hola nia sa qua hinia ginani.
13 Asanana mo si Asa;
esei boka hobea Nana hiniva?
Tavetia Sa gua sapu hiva tavetia Sa.
14 Korapa va hokotia Sa gua sapu vizata poni nau Sa,
meke soku sari Nana hiniva mae gua koa rau.
15 Gua asa ke matagutu nia rau si Asa,
totoso balabala ia rau si holoqoru si rau.
16-17 Sa Tamasa pu tagoi sari doduru ṉiniraṉira si va malohoro ia Sa sa buloqu.
E Tamasa, lopu sa huporo, si va matagutuqu rau,
ba sa hinuporo si moata hola, meke lopu boka dodogorae si arau.