24
1 Vegua ke lopu va nama vekoi Tamasa pu tagoi sari doduru ṉiniraṉira sari totoso varipitui?
Vegua ke aqa ni saripu gilania si Asa ba lopu kamoi tu sari rane arini?
2 Va rizui rini sari na voloso pepeso pude boka vagi va noma dia,
pausi rini sari na rovana sipi sapu hikoi rini.
3 Vagi pani rini sari na doṉ'ki tadi na koburu eapadi,
meke kopu ni sari bulumakao tadi na barikaleqe nabokodi, osolae ta hobe sari na dia gale.
4 Sari na tie malaṉa si tupele pani rini pa siraṉa,
meke zukuri sari na habahuala pude la tome.
5 Ke guana doṉ'ki pinomodi pa soloso,
pudiki hata ginani pa ninae vasina sari na malaṉa;
pa qega ba hata poni ginani rini sari dia koburu.
6 La vagi gedi ginani tana kurukuru pa inuma sapu lopu dia,
meke varigara qurepi pa inuma vaeni tadi na tie kaleadi.
7 Doduruna sa boṉi si dododohodi meke puta, na loke poko,
loke nobi pude hukatia sa ibu.
8 Teteroko nia rini sa ruku gorena pa soloso,
ke la nuziki kapae koari na patu nomadi pude aqoro.
9 Sari koburu loke tamadia si ta vagi palae koari tinadia;
vagi ri na tie kaleadi sari koburu tadi pu malaṉa pude hobe gale.
10 Ba sari na malaṉa si ene vura dodohodi na loke dia poko;
oviadi mo totoso paleke huiti tadi na tie.
11 La munala olive pude va vura oela, na qurepi pude vagi vaeni;
ba arini teledia si koa memeha eko mo.
12 Sagesage nana koasa popoa lavata sa kabo alili;
saripu bakora na tata mate si kabo hata tinokae, meke lopu ta harupu;
ba lopu zutui Tamasa saripu ṉoṉovali sarini.
13 Sari tie kaleadi si kana ia sa kalalasa;
korodia gilania sa nana siraṉa,
ba be pude ene luli valeania.
14 Sipu tata rane sa popoa si gasa turu sa tie variva mate,
meke va matei saripu habahuala,
meke panaboṉi si hiko si asa.
15 Sa matana sa tie barabarata si aqa nia sa opokaputu;
zama si asa, ‘Loke mata kote dogorau,’ gua.
Va paeria sa isumatana pude loke tie gilania.
16 Totoso huporo si haele nuquru pa vetu sari tie hiko,
pana rane si puta si arini.
Lopu manavasa nia rini sa kalalasa.
17 Sa huporo dudukurumu si guana munumunu koa rini;
na baeri rini saripu variva matagutu pa huporo.
18 Guana elelo pa beru kolo si ta paleke taloa si arini,
sari dia kukuru pepeso si ta levei koe Tamasa;
ke loke tie si la pude kopu ni sari na dia inuma vaeni.
19 Sa maṉinina sa dada si nono vagia sa kolona sa sinou;
si gua tugo sa lovu sapu saputu vagidi sari tie kaleadi.
20 Ari tinadia ba kote muliṉi ni,
ke hena va kamoi rina uloso;
sari tie kaleadi si loke tie kote balabala pulei,
ba guana huda ta maho goredi si arini.
21 Na ṉoṉovali rini sari barikaleqe sapu tige meke loke dia koburu,
meke lopu tataru ni rini sari na naboko.
22 Sa Tamasa pa Nana ṉiniraṉira si daku pani Sa saripu ṉiṉiradi;
be ele sokirae, ba sa tinoa si lopu dia pude lalae nia.
23 Boka va malumi Tamasa pude koa manoto pa dia tinoa,
ba sari matana si korapa kopu totoko eko lamo koarini.
24 Pa totoso hite si kote ta ovulu sage si arini, meke kote lopu koa,
kote tava pepekae meke ta vagi varigara gua ari kasa doduru,
kote guana kiko huiti sapu ta seke palae.
25 Pude lopu hinokara si hire, si esei kote boka va sosodea sapu kohaqu si rau?
Esei kote boka tozia sapu sea si rau?”