33
1 Ba kamahire Zobi, mamu avosi sari qua zinama,
avoso valeani doduru pu kote zama ni arau.
2 Namanama si rau pude zama;
ele pa meaqu rau sari zinama.
3 Sa buloqu tozi nau sapu zama si rau pa tinoṉoto,
meke sa beruqu si zama pa hinokara.
4 Sa Maqomaqona sa Tamasa tavete au,
sa Tamasa pu tagoi sari doduru ṉiniraṉira, meke Asa siṉo mae nia sa qua tinoa.
5 Olaṉau, be boka goi;
va namanama pule nigo, mamu toke au.
6 Na pa kenuna sa Tamasa si na tie gugua mo agoi si arau;
arau ba ta tavetequ pa pepeso.
7 Gua ke, mu lopu matagutu nau;
sa limaqu si lopu kaqu osonigo.
8 Ba ele zama pa taliṉaqu si agoi,
avoso valeani rau sari mua zinama.
9 Zama guahe si agoi, ‘Loke tina zutuqu si rau meke loke qua sinea. Na viaqu.
10 Ba sa Tamasa si hatahata siraṉa pude bugoro nau,
meke balabala nau guana keke Nana kana Sa si arau.
11 Pusi nia seni sa sari nenequ;
meke kopu totoko ni Sa sari doduru qua inene.’* Zob 13:27
12 Ba maqu tozi nigo, Zobi, lopu toṉoto sari na mua zinama,
ura sa Tamasa si noma hola nia sa tie.
13 Na vegua ke nominomi la ia goi sa Tamasa
sapu lopu olaṉi Sa sari mua ninanasa?
14 Ura, sa Tamasa si zama lamo, ba pa soku siraṉa,
na tie mo si lopu va avoso la pude vagi.
15-16 Pa pinutagita meke dinogodogorae pana boṉi,* Zob 4:13
totoso puta muliuṉu sa tie pa nana teqe,
si boka zama sa Tamasa koari na tie,
meke va mataguti koari na vina balau,
17 pude va kekeria sa tie koari nana tinavete kaleadi,
meke hukatia pa vinahesi pule,
18 pude harupia sa nana tinoa koasa lovu,
pude lopu mate pa vinaripera.
19 Boka va toṉoti Tamasa sari na tie pa tinasigiti koasa minoho,
na tinasigiti pa susuri sapu lopu boka beto,
20 ke sa ginani ba kilu ia mo sa,
sari ginani hoke okoro ni sa si hakohako ni sa.
21 Meke goregore nana sa tini osolae viviqe va kaleana tu,
sari na susuri sapu tomedi, si boka ta dogoro beto.
22 Sa maqomaqona si rizu tata la mo koasa lovu,
meke sa nana tinoa si aqa nia rini pu mae pude va matea.
23 Ba be koa nana si keke mateana pa nana kalina guana tie vari karovae,
keke koari tina mateana te Tamasa,
pude tozia sa tinoṉoto tana tie,
24 pude toka nia sa tie meke zama:
‘Vata rupahia, lopu va gore vala nia pa lovu;
ele koa nana sa hinolu pulena sa.’
25-26 Pana varavara la si asa koasa Tamasa meke va tabea Sa,
si kaqu dogoria sa sa Isumatana Tamasa meke kukili na qetu,
meke doduru nana ginugua si va toṉoto pulei Tamasa gua tatasana,
meke kaqu tava vaqura pule sa tinina guana tini koburu,
toa va leana meke ṉiṉira guana tie vaqura.
27 Meke pa totoso asa si mae si asa koari tie meke zama,
‘Ele sea si rau, lopu tavetia rau gua sapu toṉoto,
ba harupau sa Tamasa.
28 Vagi pule nau Sa pa minate,
ke kamahire toa si rau pude qetu nia rau sa kalalasa.’
29 Uve, gua asa si hoke tavetia sa Tamasa koasa tie.
Tavete pilipule ponia Sa sa tie,
30 pude vagi pule nia sa maqomaqona koasa lovu,
meke pude sa zuke tanisa tinoa si boka kalalasa la koasa.
31 Kopu nia si hie, Zobi, mamu avoso mae,
mokomoko, sina kote zama si rau.
32 Ba be guana hiva zama si agoi, si mu olaṉau;
zama vura, sina hiva dogoria arau sapu toṉoto si agoi.
33 Ba pude lopu gua, si mamu avoso mae koa rau;
koa noso, maqu va tumatumae nigo sa ginilagilana lohina.”