37
1 Mamata sa buloqu,
meke ta duaṉa.
2 Avoso la! Avosia sa tubilina sa mamalaiṉi te Tamasa,
koasa dugalana sa paka sapu vura koe Zihova.
3 Rupahi Sa sari Nana kapi pa kauruna sa maṉauru,
meke garunu lani Sa koari na hukihukirina sa kasia popoa.
4 Mudina asa si mae sa tubilina sa paka maṉauru,
sa kurumuna sa mamalaiṉi te Tamasa,
totoso zama si Asa,
si lopu tuqe pule sa mamalaiṉina.
5 Variva avoso sa dugaladi rina paka maṉauru te Tamasa,
variva magasa sari na tinavete te Tamasa, hola nia sapu gua gilana gunia gita!
6 Zama ia Tamasa sa sinou, ‘Hoqa gore la pa pepeso,’
meke koasa ruku, ‘Hoqa goi na luturu.’
7 Pude gilania doduru tie sa tinavete te Tamasa,
si va magogosi Sa sari doduru tie koari dia tinupiti,
8 meke sari na kurukuru si hata aqoro;
la koa si arini koari na dia bae.
9 Sa raneboṉi si mae gua pa kolo lamana,
meke ibu hola sari na tie pa givusu ṉiṉirana.
10 Sa siniṉo te Tamasa si tavete aesi,
meke sa beru kolo si evaṉae aesi ṉirana.
11-12 Va mamata ni kolo Sa sari na lei;
meke vura vasina sari malakapi.
Pa ginarunu te Tamasa si viloro lamae sari lei
meke ale beto ia rini sa doduruna sa kasia popoa,
13 Garunu gore nia Tamasa sa ruku pude va kilasi sari na tie,
babe va bobosia sa pepeso koasa Nana tataru.
14 Va avosia si hie, Zobi;
noso mamu balabala i sari tinolava te Tamasa.
15 Tumae nia tugo goi vea kopu gunia Tamasa sa raneboṉi,
meke va kalalasa va hodakia Sa sa kapi?
16 Tumae nia goi vea meke ale sari lei,
sari tinavete variva magasa Tanisa pu gotogoto pa ginilagilana?
17 Agoi pu gorego na ṉataṉata koasa maṉini,
totoso raza pa popoa sa givusu maṉinina meke rimata hola;
18 boka somania goi sa Tamasa pude repahia sa maṉauru,
meke tavete va ṉira ia guana aeana ṉedalana?
19 Tozini gami sapu gua kote zama la nia gami koa Sa,
lopu boka tavete vura ni gami sari mami zinama na nunala si gami.
20 Kaqu ta tozi paki sa Tamasa, sapu hiva zama si rau?
Esei hiva tepa mate koe Tamasa?
21 Kamahire si loke tie boka doṉo la koasa rimata,
na keana hola si asa pa maṉauru,
mudina sapu va rizu pani givusu sari na lei.
22 Pa kali gede* Kali gede be tia la pa kali lodu rimata. si vura mae si Asa pa tinolava qolo,
sa Tamasa pa korapa Nana ṉinedala variva magasana.
23 Sa Tamasa pu tagoi sari doduru ṉiniraṉira si lopu boka ta ṉana kamo, na ululu pa Nana ṉiniraṉira,
pa nana ṉinoṉo meke tinoṉoto
si lopu hoke ṉoṉovala si Asa koari na tie.
24 Gua asa ke turu pamaṉa nia ri doduru tinoni,
meke lopu galagala ni Sa si arini pu gilagilana gua, pa dia binalabala.”