39
1 Gilania tugo goi totoso hoke hira sari na qoti pinomodi?
Ele dogoria goi totoso sa kote podoi sa kurukuru ta pozae ‘dia’ sari tudia?
2 Gilania goi visa sidara meke tiqe hira si arini?
Gilania tugo goi sa totoso pu kaqu podopodo rini?
3 Gilania tugo goi sa totoso sapu kaqu horodidi si arini
meke hira vura ni sari tudia pa kasia popoa?
4 Toqolo sari tudia, ṉiṉira meke toa va leana;
taluarae si arini meke lopu hite pule mae.
5 Esei va taloai sari na doṉ'ki pinomodi?
Esei na rupahi sari ikudi?
6 Ele ponini Rau sa qega koa rini pude na dia popoa,
sa lolomo koa ia na soloti meke loke duduli boka toa ia pude dia kokoana.
7 Hegere ni rini sari ṉoveoro pa vasileana nomadi;
lopu avosi rini sari kukili tadi na tie kopu.
8 Pa toqere si ene hata nia ginani rini,
meke henai mo rini sari vasi elo buma.
9 Kote malumu tavetavete ponigo sa bulumakao pinomona si agoi?
Kote hiva va hola boṉi si asa pa mua vetu hose?
10 Boka tuqe nia iku goi sia meke va tavetavetia pa inuma?
Boka geli iliri pepeso sia pa mua inuma?
11 Boka kalavarae ia goi sa nana ṉiniraṉira lavata?
Boka vala nia goi sa doduruna sa mua tinavete pude tavete ponigo sa?
12 Boka ronu ia goi si asa pude pakepakete meke paleke ponigo,
meke la vekoi koasa vasina tana vari paqaha kiko huiti koari na qaqalotodi?
13 Sari tatapuruna sa ositiriki, sa kurukuru nomana si qetu meke nebe!
Ba lopu boka ta padapada la koasa kurukuru sitoko.* Keke kurukuru pule sapu noma tatapuruna meke kopu va leana tuna.
14 Hira ni sa ositiriki pa pepeso sari vovoto,
pude sa pepeso kote va maṉini, gua.
15 Lopu balabala ia sa sapu kote boka ta neti poraka sari,
koari kaiqa kurukuru pinomo.
16 Kopu va kaleani sa sari tuna, guana lopu tanisa tu,
lopu tupiti balabala i sa sapu mate sari ba vea,
17 sina lopu ponia ginilagilana sa Tamasa
babe poni vala nana hinia koasa binalabala leadi.
18 Ba pana repahi sa sari tatapuruna meke haqala,
si hegere nia sa sa hose meke sa tie koina.
19 Vea, agoi Zobi vala ni sari ṉiniraṉira koari na hose
meke poni ni sari na kalu gele pa kizudi?
20 Agoi va boka i pude horu gua rina kupokupo
meke va mataguti sari na tie koa ri na sitoṉodi?
21 Nenedi si puza pa pepeso, qetu na ṉiṉiradi;
meke qeto taloa dia mo pa vinaripera.
22 Hegere nia rini sa minatagutu, na loketoṉa dia minatagutu;
na vedara si lopu govete nia rini.
23 Sa vovoina tupi si hake pa kalidia
meke gua tugo sari na hopere.
24 Kamoi na malagigiri meke rerege taloa si arini;
lopu boka koa noso si arini totoso kabo sa buki.
25 Koasa kabona sa buki,
si siṉo vagia rini sa hibina sa vinaripera pa seu.
Meke avosi rini sari kukili tadi na koimata.
26 Vegua agoi va tumatumae ni tapuru sari nae,
tia la pa kali matao meke repahi rini tatapurudia?
27 Vegua agoi tozi ni sari atata pude tapuru sage,
pude taveti pana uluna sage sari dia vori?
28 Pa kali toqere koadi, vasina va hola boṉi;
koari na popoa pa kali toqere patupatu, vasina sa dia ṉati kokoana.
29 Vasina koa meke kote doṉo hata ginani;
pa seu tu, ba kote poho vagi rini.
30 Sari tuna atata si hoke inevaṉa ni sari ehara,
meke vari likohae ni rini sari tomatedi rina tie matedi.”* Mt 24:28; Lk 17:37