1 Zama koe Mosese se Zihova, 2 “Mu turaṉa la nia pa sasadana sa Ipi Hopena pa kenuqu Rau se Eroni meke sari na tuna koreo; paleki sari na poko hiama na oela vina madi, meke sa bulumakao kokoreo pude na vina vukivukihi tana sinea, karua sipi kokoreo meke sa huneke bereti sapu loke isitina; 3 mamu tioko varigara nia vasina sa doduru butubutu Izireli.”

4 Tavetia Mosese sapu zama nia e Zihova koasa, meke sipu varigara sa butubutu, 5 si zama koarini si asa, “Kaqu tavetia rau kamahire gua sapu ele tozi nau e Zihova.”

6 Turaṉa lani e Mosese pa kenudia sari Eroni meke sari na tuna koreo meke huvei sa. 7 Va sage nia na poko keoro doduru meke keke poko gele sa se Eroni meke dokoho pule nia pule keke poko dokoho, meke keke poko tana hiama sapu ta pitie vinasari meke pusi nia pa kopetena. 8 Va sage nia sa sa poko raqaraqa, meke vekoi sa sari karua tiṉitoṉa hitekedi sapu ta pozae Urimi meke Tumimi*Sa hiama si tavetavete nia sa Urimi meke sa Tumimi pude vagia sa vinizavizata te Zihova. pa korapana sa. 9 Va sage nia sa sa toropae batu tana hiama pa batuna meke pa kenuna si pusi nia sa sa vina gilagila*Ta kubere koasa vina gilagila hie si sa zinama, “Ele tava madi koe Zihova,” gua. Mi tiro Ekd 29:6: qolo madina, gua puta tugo sapu tozi nia e Zihova koasa.

10 Beto asa si vagia Mosese sa oela vina madi, meke la va madia sa Ipi Hopena meke sari doduru tiṉitoṉa pu ele koa pa korapana; meke pa siraṉa gua asa si va madi sa koe Zihova sari doduru. 11 Vagi sa sari kaiqa oela meke siburu lani sa ka zuapa totoso koasa hope vina vukivukihi, meke sari na tiṉitoṉa tavetaveteana meke koasa besini boronizi nomana meke sa hubina sa hope ka zuapa totoso. Pa siraṉa gua asa si va madi lani sa koe Zihova si arini. 12 Kaiqa oela si zoroponi sa pa batuna e Eroni meke va madia sa si asa. 13 Beto asa si turaṉa lani Mosese sari na tuna koreo e Eroni meke va sageni poko keoro doduru sa si arini, dokohoni poko lineni sa, meke va sage ni toropae batu tana hiama sa, gua puta tugo sapu zama nia e Zihova.

14 Beto asa si paleke mae nia e Mosese sa bulumakao vaqurana pude na vina vukivukihi tana sinea. Se Eroni meke sari na tuna koreo si va opoi limadi koasa batuna. 15 Va matea Mosese si asa meke vagi sa si kaiqa eharana meke va boboso nia ehara sa sa kakarutuna meke va honi lania sa koari ka made kikihona sa hope pude va madia. Sari na ehara koa holadi si zoropo ni sa pa hubina sa hope. 16 Vagi Mosese sari doduru deana pa korapa tinina, sa kukuruna sa bero sapu leanana hola, sari na leleqata meke sari na deana pu koa koa rini, meke va uqu betoi pa hope. 17 Vagi sa sari kaiqa toṉana sa bulumakao kokoreo koa holadi meke na kapuna, na masana, meke sari na laguna, meke va uqui sa pa valena sa vasina pu koa sari na tie, gua puta tugo sapu zama nia e Zihova.

18 Beto asa si turaṉia Mosese sa sipi kokoreo tana vina vukivukihi va uququ la koe Eroni, meke va opoi Eroni meke sari na tuna koreo sari na limadia pa batuna. 19 Va matea Mosese si asa meke siburu beto la nia sa sa eharana koari ka made kalina sa hope vina vukivukihi. 20-21 Magumagu va hitehitekia sa sa sipi kokoreo, ṉuzapa va via i sa sari na tiṉitoṉa pa korapana meke sari na nenena, meke va uqua sa sa batuna, na deanana meke sari doduru tinina pa hope, gua puta tugo sapu zama nia e Zihova. Sa vina vukivukihi va uququ hie sina vinariponi koe Zihova, meke sa hibi lea tanisa si variva qetu koa Sa.

22 Beto asa, si turaṉa mae nia e Mosese sa sipi kokoreo vina rua pude va madi sari na hiama; sapu se Eroni, meke sari na tuna koreo si va opoi pa batuna sari na limadia. 23 Va matea Mosese si asa meke vagi sa si kaiqa eharana meke vekoi sa koasa hubi taliṉa mataona e Eroni, meke koasa gugulavata pa kali lima mataona, meke koasa gugulavata pa kali nene mataona. 24 Beto asa, si turaṉa maeni sa sari na tuna koreo e Eroni meke vekoi sa si kaiqa ehara koari na boboa taliṉa mataodi, meke koari na gugu lima mataodi, meke gua tugo koari na gugulavata pa kali nene mataodi. Beto asa, si siburu beto lani e Mosese sari na ehara koa holadi koari ka made kalina sa hope. 25 Vagia sa sa deana, deana pa pikutuna, meke sari doduru deana saripu nobi tamuni sari na laguna, meke sa kukuruna sa bero leanana hola, meke sari na leleqata meke sari na deana pu koa koarini, meke sa pudapuda nene mataona, 26 beto hoi si vagia sa si keke bereti sapu loke isitina koasa huneke sapu ele tava madina koe Zihova, keke keki sapu ta henie oela, meke keke bisikiti manivisina, meke va hakei sa koasa pudapuda nene mataona, meke koari na deanana. 27 Beto asa si va taṉini ni sa koa rina limana Eroni meke koari na tuna koreo sari doduru ginani hire, beto asa si ovulu sage ni rini pude na ṉati vinariponi sapu kaqu vala nia rini koe Zihova. 28 Beto asa, si vagi Mosese sari na ginani koa rini, meke va uqui sa koasa vina vukivukihi va uququ pa batuna sa hope, na vina madidi ri Eroni meke sari na tuna koreo. Meke sa hibi lea tanisa si qetu nia e Zihova. 29 Beto asa, si vagia Mosese sa masa raqaraqana meke vala nia pude na vinariponi koe Zihova. Asa tugo sa kukuruna sa vinariponi sipi kokoreo sapu te Mosese. Tavete va gorevura betoi Mosese sari doduru gua pu zamani e Zihova koasa.

30 Vagi Mosese sari kaiqa oela meke kaiqa ehara sapu koa pa hope, meke siburu lani koe Eroni meke sari na tuna koreo, meke koari na dia poko tugo. Pa siraṉa gua asa si va madi sa si arini koe Zihova.

31 Zama la koe Eroni meke sari na tuna koreo se Mosese, “Mi vagia sa masa meke paleke la nia pa sasadana sa Ipi Hopena pa kenuna e Zihova, mamu raro va qototia, mi hena turaṉae nia sa bereti, sapu koana pa huneke, sapu na vinariponi tana vina madi, gua puta tugo sapu zama nia e Zihova. 32 Beto asa si mi va uqu pani sari na masa babe na bereti saripu koa hola. 33 Lopu kaqu luaria gamu sa sasadana sa Ipi Hopena koari ka zuapa rane, osolae hokoto sa mia vina madi koe Zihova. 34 Gua sapu tavetia gita pa rane ṉinoroi, si gua puta tugo sapu ele zama nia e Zihova koa gita pude tavetia, pude boka taleosae sari na mia sinea. 35 Kaqu koa mo si gamu pa sasadana sa Ipi Hope, pana rane meke boṉi koari ka zuapa rane, meke taveti mo sapu gua zamani e Zihova. Be lopu tavete gua asa si gamu, si kaqu mate si gamu. Ura arini tu si zamani e Zihova koa rau.” 36 Gua asa ke taveti Eroni meke sari na tuna koreo sari doduru ginugua pu zamani e Zihova koe Mosese.