11
Sari na Ginani Viana meke Bonina
(Diutironomi 14:3-21)
Zama se Zihova koari Mosese e Eroni, “Mi zama la koari na tinoni Izireli: Boka henai gamu sari doduru kurukuru ṉame saripu paqaha rua kakarutu nenedi, meke hamu va memehe sari ginani pa totoso vina rua. 4-7 Ba gamu si lopu kaqu henai sari na kurukuru ṉame pu hamu va memehi sari na ginani pa totoso vina rua, ba lopu paqaha rua kakarutu nenedi kekeṉoṉo guana kameli na rabiti, meke lopu kaqu henai gamu sari na kurukuru pu paqaha rua kakarutu nenedi ba lopu hamu va memehi sari na ginani pa totoso vina rua, kekeṉoṉo gua na boko na kurezu* Sa kurukuru sapu ta pozae Hyrax pa zinama English si doṉo guana keke kurezu nomana.. Lopu via si arini pa dinoṉo te Zihova. Mu lopu henai sari na kurukuru ṉame arini, babe tiqui mo tomatedi, na bonidi si arini.
Kaqu henai gamu sari na igana pu ari nebenebedi na kapudi, 10 ba sarini pu koa pa korapa kolo loke nebenebedi na kapudi si lopu kaqu henai. 11 Sari na tiṉitoṉa toadi hire si kaqu ta pozae bonidi. Namu lopu kaqu henai gamu si arini, babe tiqui mo saripu matedi. 12 Namu lopu kaqu henai gamu si keketoṉa sapu koa pa korapa kolo, saripu loke nebenebedi na kapudi. Kote kaleadi si arini koa gamu.
13-19 Hire sari na kurukuru tapuru saripu lopu leadi sisigiti meke namu lopu kaqu henai gamu: Sari na atata, duduru, nae, manuvu, nao, seṉeṉe, soa, meke na veke.* Kaiqa votiki kurukuru tapuru, saripu ta pozae bonidi si loke zinama Roviana, ke koa sari na pozadi pa zinama English pa kinubekubere hie: na falcon, buzzard, vulture, crow, ostrich, stork, pelican, hoopoes. Kaiqa tie si balabala ia sapu bonidi si arini sina gani rini sari na tiṉitoṉa bonidi kekeṉoṉo sari na tomate meke ehara.
20 Doduru nokinoki hitehitekedi saripu ari tatapurudi si bonidi, 21 ba lopu sarini pu hoke horuhoru. 22 Sari na kupokupo si kote boka henai mo gamu. 23 Ba sari doduru pule pu hitehitekedi pu ene pa pepeso pu soku nenedi meke ari tatapurudi meke lopu horu si ta pozae bonidi.
24-28 Esei sa tie sapu tiqui sari na nokinoki matedi hire si kaqu boni osolae kamo totoso lodu sa rimata: Doduru kurukuru ṉame saripu lopu paqaha rua kakarutu nenedi meke lopu hamu va memehe sari na ginani pa totoso vina rua, meke sari doduru kurukuru ṉame pu ka made nenedi meke ari visuvisudi si bonidi. Sa tie sapu paleki saripu matedi, si kaqu ṉuzapa va via i sari nana poko, ba lopu kaqu ture via tugo si asa osolae kamo totoso lodu sa rimata.
29-30 Sari kurukuru ṉame guana kurezu. Meke sari na kurukuru pu doṉo guana na kilikozo, na varilazu, na kive, regu, si ta pozae bonidi. 31 Be esei sa tie sapu tiqui si arini babe saripu matedi si kaqu ta pozae bonidi osolae kamo totoso lodu sa rimata. 32 Meke be hoqa koa keketoṉa saripu matedi, sa tiṉitoṉa kaqu ta pozae boni si asa, gua tugo na tiṉitoṉa guana huda, poko, na kapu kurukuru ele tava popana, na baika, babe sa sa tiṉitoṉa sapu tavetavete nia koasa. Kaqu tava lodu pa korapa kolo, meke kaqu ta pozae boni si asa, osolae kamo totoso lodu sa rimata. 33 Meke be hoqa voi pa korapa raro patu sari na tinidi, sari doduru tiṉitoṉa saripu koa pa korapana si boni beto mo, meke kaqu porakia goi sa raro patu sana. 34 Kaiqa ginani saripu hoke boka henai, ba tava boboso koasa kolo sapu koa pa korapa raro patu sana sapu bonina, si kaqu ta pozae boni tugo. Ba be kaiqa toṉa saripu hoke ta napo si koa pa korapa raro, ba boni tugo si asa. 35 Be sa saripu hoqai ri pu matedi si boni tugo. Be na kinakinana sapu ta tavete patu ba kaqu ta poraka tugo. 36 Ba na bukaha babe na berukehe popana si lopu kaqu hite ta pozae boni, ba be na tie meke kaiqa toṉa pule tu si tiqui saripu matedi, si boni si arini. 37 Be keke toṉa matena si hoqa koasa kiko sapu tava namanama pude ta lete, sa kiko asa si korapa viana. 38 Ba be ta poṉa pa korapa kolo sa kiko, meke be keke toṉa bonina si hoqa gore koasa, si boni sa kiko.
39 Be keke kurukuru ṉame sapu boka ta hena si mate, sa tie sapu tiqua si asa, si kaqu boni osolae kamo totoso lodu sa rimata. 40 Be henaia keke tie sa vasi kukuru tinina sa kurukuru ṉame asa, si kaqu ṉuzapa va via i sa sari nana poko, meke kaqu boni tugo si asa osolae lodu sa rimata. Be keke tie palekia sa sa kurukuru matena, si kaqu ṉuzapi sa sari nana poko; meke lopu kaqu tuture via si asa, osolae kamo totoso lodu sa rimata.
41 Namu lopu kaqu henai gamu sari na kurukuru ṉame hitehitekedi saripu ene pa pepeso: 42 saripu ṉameṉame, babe eneneni ka made nenedi, babe arini pu soku nenedi. 43 Mu lopu va boni puleni gamu koari na hinenadi rini. 44 Arau tugo se Zihova sa mia Tamasa, mamu va madi sari na mia tinoa, sina na Hopequ si Rau. 45 Arau tugo se Zihova sapu turaṉa vurani gamu pa popoa Izireli. Ke Arau tugo sa mia Tamasa, meke gamu si kaqu va madi sari na mia tinoa, sina na Hopequ si Arau.* Liv 19:2; 1 Pit 1:16
46 Arini tugo sari na tinaraedi rina kurukuru ṉame na kurukuru tapuru, meke saripu koa pa korapa kolo, meke sari doduru pu ene pa pepeso. 47 Kaqu kopu sisigiti si gamu, pude gilani saripu tava via pa dinoṉo te Zihova, meke saripu boni. Mamu gilani sari na kurukuru toadi saripu boka ta hena, meke saripu bonidi pu lopu boka ta hena.”

*11:4-7 Sa kurukuru sapu ta pozae Hyrax pa zinama English si doṉo guana keke kurezu nomana.

*11:13-19 Kaiqa votiki kurukuru tapuru, saripu ta pozae bonidi si loke zinama Roviana, ke koa sari na pozadi pa zinama English pa kinubekubere hie: na falcon, buzzard, vulture, crow, ostrich, stork, pelican, hoopoes. Kaiqa tie si balabala ia sapu bonidi si arini sina gani rini sari na tiṉitoṉa bonidi kekeṉoṉo sari na tomate meke ehara.

*11:45 Liv 19:2; 1 Pit 1:16