1 Kamo la pa kali karovona sa kopi Qaleli pa popoa Qerasa se Zisu, meke sari Nana disaepeli. 2 Meke totoso neti gore tugo Sa pa masa, si lopu sana vura mae gana koari na bae popomunuana, si keke tie pude mae tutuvia se Zisu. Sa tie hie si koa ia na tomate kaleadi, 3 na kokoana koari na bae popomunuana si asa. Loke tie boka va noso ia, na seni ba lopu padana. 4 Ele soku totoso pusi nia seni rini limana na nenena, ba hoke kumati sa sari na seni, meke mokui sari na aeana tava sage pa nenena. Loke tie si ṉiṉira pada pude va noso ia. 5 Rane na boṉi si ene limilamae si asa koari na bae popomunuana, meke koari na toqere, meke hoke gagaemana, na va bakora pule nia pa patu ṉarudi si asa.

6 Sipu koatu sa pa seu si dogoria sa se Zisu, meke haqala mae kokotuṉu pa kenuna Sa. 7 Meke velavela va ululae si asa meke zama, “Zisu, Tuna sa Tamasa Ululuna Hola! Nasa si hiva nia Goi koa rau? Pa pozana Tamasa, si tepa igo rau, pude Mu lopu va kilasa au pa tinasigiti!” gua si asa. 8 Ura ele zama ia tu Zisu si asa, “Tomate kaleamu, mu vura taloa koasa tie hie!” guni nia Sa.

9 Meke nanasia Zisu si asa, “Esei sa pozamu?”

Meke olaṉa sa tie, “E Rerege sa pozaqu, sina na soku mami si gami!” gua si asa. 10 Meke tepa ososo nia sa se Zisu, pude lopu hitu lani pa votiki popoa pa seu sari na tomate kaleadi, gua.

11 Koanana vasina si keke rovana boko lavata, sapu korapa ganigani gedi pa kali toqere tata koa rini. 12 Meke tepa ia rina tomate kaleadi se Zisu, “Mu garunu lani gami koari na boko, pude mami la nuquru koa rini,” gua si arini. 13 Ke va malumi Sa si arini, meke vura taloa si arini koasa tie, meke la nuquru koari na boko. Tata karua tina sari na boko koasa rovana sana, sapu haqala gorea rini sa kali taba meke la hoqa suvu pa kopi, meke lodu mate beto.

14 Sari na tie pu kopudi rina boko si govete, meke la tozia rini sa inavoso koasa vasileana, meke koari na tie pa vari likohaena sa popoa sana. Ke vura la sari na tie pude dogoria gua sapu ele ta evaṉa. 15 Meke totoso mae si arini koe Zisu, si dogoria rini sa tie pu koa ia na rerege, pokopoko valeana na gilae, meke habotu nana, ke matagutu sarini. 16 Ba arini pu dogorona sapu gua ta evaṉa koasa tie pu nuquria na rerege, meke gua sapu ta evaṉa koasa rovana boko, si vivinei nia koari na tie.

17 Ke tepa ososo nia rina tinoni se Zisu, pude rizu taloa pa dia popoa.

18 Meke totoso korapa va namanama suraṉa pa koaka se Zisu, si mae tepa luli koa Sa sa tie pu tiqe luaria na rerege, “Va malumau maqu luli qua koa Goi,” gua si asa.

19 Lopu va malumia Zisu, ba tozi nia Sa, “Lokari, mu pule la pa mua popoa, koari na turaṉamu, mamu vivinei nia koarini sa tinokae nomana, meke sa Nana tataru va tukana sapu tavetia Tamasa koa goi,” gua si Asa.

20 Ke taluarae sa tie, meke ene gua pa doduru vasileana pa korapa popoa Dikapolisi, meke vivinei nia sa sa tinokae nomana sapu tavetia Zisu koasa. Meke magasa hola sari doduru tie.

21 Meke sipu karovo pule pa kali karovona sa Kopi Qaleli se Zisu, si mae vari likohae nia keke puku vinarigara lavata si Asa pa masa. 22 Meke mae kamo se Zaerasi sapu keke rina koimata koasa sinaqoqi koasa vasileana sana. Totoso dogoria sa se Zisu, si todoṉo pa nenena Sa si asa, 23 meke tepa ososo nia sa se Zisu, “Sa tuqu vineki si moho sisigiti. Mae mamu va opo nia limamu, pude mani magogoso na toa si asa!”

24 Ke luli koasa se Zisu, meke gua tugo sa puku vinarigara lavata, ke zukuru varikali nia rini si Asa.

25 Koanana si keke barikaleqe sapu kamoa minoho*“Kamoa minoho tana barikaleqe” ginuana si va goregore ehara. tana barikaleqe, meke koa ta sigiti si asa ka manege rua vuaheni. 26 Soku tie salaṉa si ele dogori sa, meke doduru nana poata si ele tabarani sa koa rini, ba si kaleana nono latu sa minoho koa sa. 27 Avoso nia sa sapu hoke salaṉa tie se Zisu, ke ene mae pa mudina Sa si asa, pa korapana sa kobi tie. 28 Na balabala guahe si asa, “Be tiqua mo rau sa Nana poko, ba kote ta salaṉa qua mo si rau,” gua si asa.

29 Meke totoso tiqua sa sa Nana poko, si ta salaṉa mo sa nana minoho, meke va nonoga ia tu sa pa korapa tinina, sapu ta salaṉa si asa koasa nana tinasuna. 30 Meke tumae va hodaka nia Zisu sapu vura taloa koa Sa sa ṉiniraṉira, ke taliri la koasa kobi tie si Asa, meke nanasa, “Esei tiqua sa Qua poko?” gua.

31 Ke zama sari Nana disaepeli, “Dotu, sa kobi tinoni lavata si korapa zukurigo, ba vegua ke boka nanasa tu si Goi sapu, ‘Esei tiqu Au?’ gua.”

32 Ba doṉo hatahata ia tugo Zisu, sina hiva gilania Sa sapu esei tugo tiqua si Asa, gua. 33 Tumae nia sa barikaleqe gua sapu ta evaṉa koasa, ke matagutu sisigiti na neneqara si asa, ke la kokotuṉu pa kenuna Zisu, meke helahelae nia sa sa hinokara koa Sa. 34 Meke zama la koa sa se Zisu, “Tuqu, sa mua rinaṉeraṉe si ele salaṉigo. Mu lopu talotaṉa, mu taloa pa binule, ele ta salaṉa si goi koasa mua tinasuna,” gua si Asa.

35 Sipu korapa zama koasa barikaleqe se Zisu, si mae kamo mo si kaiqa tie, pu taluarae mae guadi pa vetu te Zaerasi, meke tozi nia rini si asa, “Sa tumu vineki si ele mate tu, ke mu lopu va tupitia pude va mae ia sa Titisa,” gua si arini. 36 Ba lopu va gunagunana ni Zisu sari dia zinama, ba tozi nia Sa se Zaerasi, “Mu lopu matagutu, ba mu va hinokara mo,” gua si Asa. 37 Loke tie si va malumu luli Sa koa Sa, ba sari Pita, e Zemisi meke e Zone mo, sapu sa tasina e Zemisi. 38 Totoso kamo la rini pa vetu te Zaerasi, si dogori Zisu viṉohaedi sari kobi tie vasina pu korapa takatakala pa mate, meke kabo va ululae. 39 Meke sipu nuquru Sa, si zama la koa rini si Asa, “Na vegua ke takatakala, na kabo sisigiti si gamu? Lopu mate sa koburu sana, na puta gana mo!” gua si Asa.

40 Ba hegehegere nia rini si Asa, ke hitu vura betoni Sa si arini. Sari ka ṉeta Nana disaepeli mo, meke sari karua tiatamana sa koburu, si turaṉa nuquru lani Sa pa korapa lose, vasina korapa eko sa koburu.

41 Taṉinia Sa limana sa koburu meke zama ia Sa si asa, “Talitha, koum* Zinama Arameiki.,” gua. Sa ginuana si, “Vineki hite, zama igo Rau si goi, mu tekulu!”. 42 Meke pa totoso tugo asa si tekulu si asa, meke ene vari likohae nia sa sa lose, ke magasa sisigiti si arini. Ka manege rua vuahenina si asa, pa totoso asa. 43 Ba va balaui Zisu si arini, pude lopu vivinei nia koari na tie sapu gua ta evaṉa, meke zama si Asa, “Mi ponia ginani pude mani henahena,” gua si Asa.