2
Sa Laena sa Ginilagilana Lohina
1 Tuqu, be va tabei goi sari qua zinama
meke va naqiti sari qua ginarunu,
2 meke va taliṉa la koasa ginilagilana lohina si goi,
podekia pude vagia sa ginilagilana lohina,
3 meke be tioko la si goi pude vagia sa binokaboka pude tumae nia
meke kaboa agoi sa ginilagilana,
4 meke be hata ia goi guana hata siliva
meke pitu lulia guana tinagotago tomena,
5 si kote gilania goi sa pinamaṉana e Zihova
meke kote boka tumae nia sa Tamasa.
6 Ura e Zihova si vari poni nia sa ginilagilana lohina,
meke koa Sa vura mae sa tinumatumae meke ginilagilana.
7 Na minataqara si poni ni Sa koarini pu koa va ṉoṉo,
na lave si Asa koarini pu ene pa tinoṉoto,
8 ura toketoke ni Sa sarini pu tavete va leana
meke kopu totoko ni sa sarini pu luli va leana ia si Asa.
9 Meke kote gilania goi gua sapu toṉoto meke gotogoto,
meke kote dogoria goi sa siraṉa toṉotona pude lulia.
10 Ura sa ginilagilana lohina si kote nuquru pa bulomu,
meke sa tinumatumae si kote lomoso pa maqomaqomu.
11 Sa binalabala leanadi kote kopu nigo si agoi,
meke ginilagilana kote lavelave nigo.
12 Ginilagilana lohina kote harupu igo koari na hahanana tadi na tie kaleadi,
meke koari tie sapu boni dia zinama,
13 saripu veko pani sari na siraṉa toṉotodi,
meke ene pa hahanana huporodi,
14 sarini pu hapahapa nia sa tinavete kaleana,
meke qetu nia sa boni pa korapana sa kinaleana,
15 saripu koqi dia siraṉa,
meke dia hahanana sekesekei si lopu toṉoto.
16 Kote harupu igo tugo sa pa binarabarata,
koari na zinama variva hoqadi tanisa barikaleqe maqota,
17 pu veko pania sa loana,
meke muliṉi nia sa vinariva egoi ta tavete koe Tamasa.
18 Ura sa vetu tanisa si turaṉa tie la pa minate,
meke sa siraṉa tanisa si la koari na maqomaqodi ri na tie matedi.
19 Loke tie pu la koa sa si hoke pule mae,
babe vagi pulea sa siraṉa tanisa tinoa.
20 Gua ke kaqu lulia goi sa hahanana tadi tie leadi,
meke enea sa siraṉa tadi tie toṉoto.
21 Ura saripu toṉoto si kote koa ia sa pepeso,
meke sarini pu loke tinazutudi si kote koa hola vasina.
22 Ba sari tie kaleadi si kote ta vagi palae koasa pepeso,
meke saripu lopu va tabe si kaqu ta rabutu taloa guana linetelete pa pepeso.