3
Tinarae koari na Tie Vaqura
1 Tuqu, mu lopu muliṉi ni sari qua vina tumatumae,
ba kopu ni sari qua tinarae pa bulomu.
2 Ura kote toa soku vuaheni meke gelenae sa mua tinoa,
meke kote toa va leana si goi meke bokaboka.
3 Mani lopu ta luarae koa goi sa tataru nabuna meke rinaṉeraṉe;
paku i pa ruamu,
mamu kuberi pa bulomu.
4 Gua asa si kote leana sa pozamu meke ta qetuqetue
koasa Tamasa meke koari na tie si goi.*Lk 2:52
5 Raṉea se Zihova pa doduruna sa bulomu,
mu lopu kalavarae ia sa mua ginilagilana soti telemu,
6 pa doduru vinizata pa mua tinoa si mu balabala ia sa Tamasa,
meke kote turaṉigo Sa pa siraṉa toṉotona.
7 Mu balabala ia telemu sapu tie gilagilana si agoi;
ba mu va tabea se Zihova mamu kilu pania sa kinaleana.*Rom 12:16
8 Be gua asa si kote ta salaṉa sa tinimu,
meke ṉiṉira sari susurimu.
9 Va lavatia se Zihova koari mua tinagotago,
meke koari na vua kenudi ri na mua linetelete;
10 kaqu siṉi ta luluapae sari mua vetu kopu ginani,
meke sari mua vovoina vaeni si kote siṉi hola.
11 Tuqu, mu lopu hakohako totoso va toṉotigo e Zihova
meke lopu kilua sa Nana ginegese,*Zob 5:17*Hib 12:5-6
12 sina e Zihova si va toṉoti mo sarini pu tataru ni Sa,
gua sa tamana sapu gegesia sa tuna sina qetu nia sa.*Rev 3:19
13 Ta manae sa tie sapu vagia sa ginilagilana lohina,
asa sapu ta poni ginilagilana.
14 Ura sa vinagi asa si hola nia sa siliva
meke vua katakata, hola nia sa qolo.
15 Sa ginilagilana lohina si arilaena hola ni sari na patu ṉedala;
loketoṉa pu okoro nia goi si boka ta padapada la koa sa.
16 Na tinoa va gelenaena si koa pa kali mataona,
meke pa kali gedena si na tinagotago meke vina lavata.
17 Sari siraṉa tanisa si na siraṉa variva qetu,
meke bule sari doduru nana inene.
18 Guana huda tinoa si asa koa rini pu hapahapa nia;
arini pu harupu vagia si kote ta manae.
19 Kuria e Zihova sa pepeso koasa Nana tinumatumae;
koasa nana ginilagilana si vekoa Sa sa maṉauru pa nana vasina.
20 Pa Nana ginilagilana si va hoqa kolo sari na lei,
meke varipaqaha ni Sa sari na kolo pa lamana na ovuku.
21 Tuqu, mu va naqitia sa ginilae meke sa binokaboka pude mu balabala valeana,
lopu va seu i pa matamu.
22 Kote toa ni agoi si arini,
na vina sari pude va doṉo lea ia sa ruamu.
23 Gua si kote tiqe topue ene va bulei si agoi pa mua inene,
meke lopu kaqu ta tubarae sa nenemu.
24 Pana eko goi si lopu kote matagutu;
pa mua teqe si kote lomoso sa mua pinuta.
25 Mu lopu matagutu pana raza va hodaka sa tinasuna
babe sa tinahuara pu kamo koari na tie kaleadi.
26 Ura kote raṉea agoi se Zihova,
meke kote kopu nia Sa sa nenemu pude lopu neti pa sipata.
27 Tavete valeana la koa rini pu garo pude ta tokae,
pana koa koa goi sa ṉiniraṉira pude tavete va leana.
28 Mamu lopu zama koasa turaṉamu,
“Pule mae vugo; meke kote ponigo,”
totoso koa nana mo kamahire koa goi.
29 Mu lopu kuhana nia sa turaṉamu,
pu raṉego meke koa kapae mo koa goi.
30 Lopu zutu hoboria si keke tie
totoso loke sinea si tavete atu nia sa.
31 Lopu okoro nia sa hahanana tanisa tie ṉiṉira,
babe hiva tavete luli sari ginugua tanisa.
32 Ura sea hola koe Zihova sa tie sapu boni nana hahanana,
ba raṉea Sa sa tie sapu toṉoto.
33 Sa lineveleve te Zihova si koa koasa vetu tanisa tie kaleana,
ba mana nia Sa sa vetu tanisa tie toṉoto.
34 Va sisire ni Sa sari na tie va sisire pu vahesi pule ni,
ba va mae ia Sa sa tataru lopu ta ṉana kamona koa rini pu va pepekae pule ni.*Zem 4:6; 1 Pit 5:5
35 Sa tie gilae si kote tava lavata,
ba sari tie pekipeki si kote tava kurekure.