4
Sa Vuana sa Ginilagilana Lohina
Tuqu, mu va avosi sari tinarae tanisa tamamu,
va taliṉa pude mu vagia sa ginilagilana.
Na vina tumatumae leanana si ponigo rau,
ke lopu veko pani sari qua zinama.
Totosona koburu si arau pa vetu tanisa tamaqu,
hitekequ si rau meke na koburu ekei tanisa tinaqu,
si va tumatumae au sa meke zama,
“Mu tuqe va nabu i sari qua zinama pa doduruna sa bulomu;
kopu ni sapu tozi nigo rau pude mu toa.
Vagia sa ginilagilana lohina pude balabala valeana;
mu lopu muliṉi ni sari qua zinama babe kilui.
Mu lopu veko pania sa ginilagilana lohina, na kote lavelave nigo sa,
tataru nia meke kote kopu nigo sa.
Sa ginilagilana lohina si arilaena hola ni sari doduru, ke mu vagia sa ginilagilana lohina.
Be sage hola hinoluna sa ba holu vagia.
Tataru nia, meke kaqu ovulu igo sa;
hapahapa nia, meke kote va lavata igo sa.
Kote ta tatarue koe Tamasa si goi, guana va sage nigo havoro sa pude va leleana ia sa batumu;
meke ponigo na toropae tolavaena sa si agoi.”
10 Tuqu, avoso mae koa rau, va tabei sapu zama ni rau,
meke sari vuaheni pa mua tinoa si kote sokudi.
11 Maqu tozi nigo sa siraṉa tanisa ginilagilana lohina,
meke turaṉigo koasa siraṉa toṉotona.
12 Pana ene goi, si lopu kaqu soqo sari nenemu;
totoso haqala goi si lopu kaqu ta tubarae si agoi.
13 Tuqe va nabua sa tinarae, lopu luara pania;
kopu nia, na asa mo sa mua tinoa.
14 Lopu neti la vasina hoke ene gua sari tie kaleadi
babe ene luli koa rini.
15 Veko pania, lopu ene hokara la ia;
mu taliri va seu koasa, mamu ene taloa mua.
16 Ura lopu kaqu puta si isara laelae pu kaiqa tinavete kaleadi si taveti rini;
lopu boka magogoso osolae kaiqa tie si va hoqai rini.
17 Na kinaleana sa gedi ginani
meke na vinaripera variva mate si na dia napo vaeni.
 
18 Sa siraṉa tadi tie toṉoto si guana kalalasa pana vaqavaqasa,
sapu bakala hitehite vura osolae kamo sa rane.
19 Sa siraṉa tadi tie kaleadi si huporo dudukurumu;
lopu gilania rini sa si ta tubarae nia rini.
20 Tuqu, va avosi sapu zama ni rau,
va avoso va leana koari na qua zinama.
21 Mu lopu va rizui pa matamu,
kopu ni pa korapa bulomu.
22 Ura na tinoa si arini koari tie pu va bakali,
meke na minagogoso pa tini tie.
23 Lavelave nia sa bulomu;
ura vasina bukaha vura sa mua tinoa.
24 Veko pani sari zinama sapu lopu hinokara,
va seu i sari zinama sinekesekeidi.
25 Sari matamu si madi doṉo toṉoto la pa kekenu,
mu doṉo la vasina pu korapa ene la ia goi.
26 Mu vilitia sa siraṉa, mamu tiqe ene la,
mu vagia sa siraṉa sapu toṉotona.
27 Lopu taliri la pa kali matao babe kali gede,
kopu nia sa nenemu pude lopu neti vura koasa siraṉa toṉotona.