5
Sa Kinopudi rina Tie te Tamasa
1 Ele dogoro sotia rau sa tinasigiti te Karisito, meke kote somana tagoa tugo rau sa tinoa tolavaena te Karisito pu kaqu vata dogoro vura pa Nana minae. Arau sapu keke koimata pa ekelesia, si tepa atu koa gamu na koimata pa ekelesia, 2 mi kopu ni sari na tie te Tamasa saripu koa pa mia kinopu, kekeṉoṉo gua na sepati sapu kopu ni sari nana sipi. Mi tavetia pa qinetuqetu gua sapu hiva nia sa Tamasa, ba lopu sina asa mo sa mia tinavete, sapu lopu qetu nia goi. Mi lopu tavetavete pa inokorona sa tinabara mo, ba mi okoro nia pude koa va nabulu koari na tie.* Zn 21:15-17 3 Mi lopu podekia pude lalae ni sari na tinoa tadirini pu koa pa mia kinopu, ba mi koa na kineha leamia koari na tie te Tamasa. 4 Meke pana vura mae se Zisu sa Ṉati Sepati sapu kopuni gita, si kote ta poni nia gamu sa pinia tanisa tinoa tolavaena sapu lopu kote rida hokara.
5 Gamu na tie vaqura ba gua tugo, mi va tabei sari na tie koadi. Gamu doduru si mi va pepekae puleni gamu pa mia ninabulu, ura gua hie si zama nia sa Kinubekubere Hope:* ZT 3:34
“Kanai Tamasa saripu vahesi pule ni,
ba va mae ia Sa sa tataru lopu ta ṉana kamona koa rini pu va pepekae pule ni,” gua.
6 Gua asa ke, mi va pepekae puleni gamu pa kauruna sa Lima ṉiṉira tanisa Tamasa pa vina tabena Sa, meke kote va lavata gamu Sa pa Nana totoso garona.* Mt 23:12; Lk 14:11, 18:14 7 Mi valani koa Sa sari doduru mia tinalotaṉa, sina korapa tataru ni gamu na kopuni gamu Sa.
8 Mi totoli puleni gamu, mamu kopu! Sina se Setani sa mia kana si korapa ene la mae pude ṉoṉovala gamu, guana laione oviana, pude doṉo hata ia si keke tie pude va matea, gua. 9 Mi turu va nabu pa mia rinaṉeraṉe, mamu kana ia se Setani. Sina gilania mia gamu sapu sari kasa turaṉamia koe Karisito pa kasia popoa, ba va kamoi tugo sari na tinasigiti gugua sapu ele va kamoi gamu pa linulina e Karisito. 10 Ba pa mudina sa mia tinasigiti pa totoso papakana, si sa nada Tamasa telena kote va gotogoto gamu, meke va ṉiṉira gamu pa rinaṉeraṉe, pude turu va nabu koasa sinokirae hinokara. Asa tugo si tagoa sa tataru lopu ta ṉana kamona, meke sapu tioko gamu Sa pude somana tagoa sa Nana tinoa tolavaena pa kineke koe Karisito. 11 Tanisa tugo sa ṉiniraṉira ninae rane ka rane. Emeni.
Sari na Zinama Tataru Vina Betobeto
12 Garunu atu nia rau sa qua leta papakana hie, sapu kubere poni au e Saelasi. Balabala gunia rau na keke tasiqu ta ronuena koe Karisito si asa. Hiva sovutu va ṉiṉira gamu rau, maqu tozini gamu sapu hie tugo sa tataru variharupi hinokara te Tamasa, ke mi turu va nabu koa sa.* TTA 15:22,40
13 Sari na tiena sa ekelesia turaṉa mia pa Babiloni* Kaiqa tie balabala ia sapu Roma si poza nia Babiloni e Pita. sapu ele ta vizatadi tugo koe Tamasa, si va atui sari na dia tataru, meke gua tugo sa tuqu koe Karisito sapu se Maka.* TTA 12:12, 25, 13:13, 15:37-39; Kol 4:10; Plm 24 14 Mi vari hapahapai na vari qetuqetui pana vari tutuvi gamu. Sa binule si mani koa koa gamu doduru tie te Karisito.