1 Keke rane Sabati totoso la henahena se Zisu pa vetu tana keke palabatu tadi na Parese, si kopu totoko nia ri na tie si Asa. 2 Na pa kenuna Sa si keke tie sapu kamoa na minoho loba. 3 Meke nanasi Zisu sari na tie va tumatumae koasa Tinarae te Mosese, meke sari na Parese, “Vegua, tava malumu pa nada tinarae si pude salaṉa tie pa rane Sabati? Ba lokari?” gua si Asa.

4 Ba lopu kulu si arini, ke taṉinia Zisu sa tie mohona, meke salaṉia Sa, meke va pule taloa ia. 5 Beto asa si zama la koa rini si Asa, “Be keke koa gamu si hoqa voi pa pou sa tuna*Sa zinama hie si lopu koa koari doduru kinubekubere pukerane, kaiqa si zama “doṉ'ki na bulumakao”. koreo, babe keke nana bulumakao pa rane Sabati, si vegua? Lopu kaqu tuturei la kave vura pule nia sa si asa pa rane Sabati tugo asa?” gua se Zisu.*Mt 12:11

6 Ba lopu olaṉia rini si Asa.

7 Meke doṉo gilania Zisu sapu sari na tie ta ruvatadi si vizati rini sari na habohabotuana arilaedi koasa tevolo henahenana, ke zama guahe si Asa koarini, 8 “Pana ta ruvata gamu pa keke inevaṉa vinarihaba, si mi lopu la koari na habohabotuana arilaedi. Sina be somana ta ruvata mae si keke tie sapu arilaena hola nigo,*ZT 25:6-7 9 si kote mae sa tie ari nana inevaṉa, meke zama koa goi, ‘Tio, mu habotu gore goi, pude mae habotu tani sa tie hoi,’ gua. Meke kote kurekure si agoi meke habotu gore la pa vasina sapu lopu arilaena. 10 Ba pana ta ruvata goi, si mu la habotu pa vasina pu lopu arilaena. Pude totoso mae sa tie pu ruvatigo, si kote zama si asa, ‘Qua baere, habotu sage pa vasina leana tani,’ kote gua si asa. Pa totoso tu asa si kote ta pamaṉae si goi pa kenudi ri doduru pu ta ruvatadi. 11 Ura asa sapu va lavalavata pule nia, si kaqu tava kurekure tugo, ba asa sapu va pepekae pule nia, si kaqu tava lavata,” gua si Asa.*Mt 23:12; Lk 18:14

12 Beto asa, si zama la se Zisu koasa tie pu ruvatana Sa, “Pana tavetia goi si keke hinenahena babe na inevaṉa, si mu lopu ruvati sari na mua baere, na tasimu koreo, na turaṉamu, meke sari na tie tagotagodi pu koa tata koa goi. Sina kote ruvata hobe igo rini keke totoso, meke ta lipu mo sapu gua tavetia goi koa rini. 13 Ba pana tavete inevaṉa goi, si mu ruvati sari na habahuala, na ike, na koele, meke na behu. 14 Pana gua asa si kaqu tamanae si goi. Sina lopu kaqu boka hobea rini sapu gua tavete poni ni goi, ba sa Tamasa tu si kote pia igo koasa rane tinuru pule pa minate tadi na tie toṉoto,” gua si Asa.

15 Totoso avosia keke ari kasa pu habotudi pa tevolo sapu gua asa, si zama la koe Zisu si asa, “Tamanae hola dia sarini pu kaqu somana habotu pa inevaṉa koa sa Binaṉara te Tamasa,” gua si asa.

16 Meke olaṉa la koa sa se Zisu, “Keke totoso si tavetia keke tie si keke inevaṉa lavata, meke soku hola tie si ruvati sa. 17 Sipu kamo sa totoso tanisa inevaṉa, si garunia sa sa nana nabulu pude la tozi ni sari na tie ta ruvatadi, ‘Mae gamu, tava nama beto sari doduru tiṉitoṉa,’ gua.

18 Ba hopeke podalae va ririunae sarini. Sa tie kekenu si zama koasa nabulu, ‘Keke vasi pepeso si tiqe holua mo rau, ke kaqu la hopiki nia rau, ke mu va malumau pude lopu atu,’ gua.

19 Keke pule si zama, ‘Ka manege puta bulumakao*Hire si na bulumakao ririhi geligeliana pepeso pa inuma pude lelete, karua bulumakao pa keke geligeliana. si tiqe holui rau, ke korapa ene la podeki rau, ke va malumau pude lopu atu si rau,’ gua.

20 Keke pule si zama, ‘Tiqe varihaba mo si rau, gua asa ke lopu boka atu,’ gua.

21 Ke pule sa nabulu meke la tozi ni koasa nana baṉara sari doduru gua pu zama ni rini. Ke ta ṉaziri sa baṉara, ke tozi nia sa sa nana nabulu, ‘Mu tuturei vura la koari na siraṉa nomadi, na ṉizupudi pa vasileana. Mamu turaṉa mae ni sari na habahuala, na ike, na behu, na koele,’ gua si asa.

22 Meke lopu seunae, si zama pule sa nabulu, ‘Baṉara, ele taveti rau gua sapu tozi nau goi, ba lopu ele siṉi sa vetu. Soku lolomo korapa koa dia,’ gua sa nabulu.

23 Ke zama sa baṉara koa sa nana nabulu, ‘Mu vura la pa sadana sa vasileana nomana, koari na siraṉa na vasidi pa seu, mamu turaṉa mae ni sari na tie, pude va siṉia sa qua vetu. 24 Tozini gamu rau, sapu lopu keke arini pu va karia sa qua rinuvata, si kaqu hena keke vasi toṉa koasa qua inevaṉa!’ gua,” gua se Zisu.

25 Meke keke totoso si keke puku vinarigara lavata si lulina se Zisu, ke taliri pule si Asa meke zama la koarini, 26 “Be mae koa Rau si keke tie, meke sa tataru tanisa koasa tamana, na tinana, meke koasa loana, meke koari na tuna, na tasina koreo na vineki, meke pa nana tinoa soti telena, si noma hola nia sa nana tataru koa Rau, si lopu boka koa na Qua disaepeli si asa.*Mt 10:37 27 Meke asa sapu lopu palekia sa nana korosi telena meke luli Au, si lopu garona pude koa na Qua disaepeli.*Mt 10:38, 16:24; Mk 8:34; Lk 9:23

28 Be keke gamu si hiva kuria si keke vetu, si kaqu habotu si asa meke tavete vura kekenu nia sa sa hinoluna sa vetu, pude gilania sapu be pada sa nana poata pude va hokotia sa tinavetena sa vetu, babe lokari. 29 Be lopu gua asa, si pana va turua sa sa sinokiraena, meke lopu boka va hokotia sa sa doduruna sa vetu si kote va sisire nia ri doduru tie pu dogoria sapu gua evaṉia sa. 30 Meke kote zama si arini, ‘Sa tie hie si podalae kuri vetu, ba lopu boka va hokotia sa,’ kote gua si arini.

31 Meke gua tugo, sapu be keke baṉara si ka manege puta tina mo nana tie varipera, meke namanama la varipera koa keke baṉara sapu ka hiokona puta tina tu nana tie varipera, si kaqu habotu paki si asa, meke vizavizata valeana, sapu kote boka raza ia sa sa baṉara hoi? Ba lokari? 32 Be gilania sa sapu lopu kaqu boka si asa, si kaqu garunu lani sa sari nana tie paleke inavoso, sipu korapa seu si arini, pude tepa ia sa binule. 33 Gua asa, ke kekeṉoṉo gua tugo si gamu, mi pada valeana kekenui sari na mia vinizata pude luli Au. Sina loke tie gamu si boka koa na Qua disaepeli, be lopu luara pani sa sari doduru nana ginugua soti, meke luli Au.

34 Soloti si leana, ba pana murimuri sa liṉiliṉi soloti tanisa, si vegua meke boka va liṉiliṉi pulea gamu si asa? 35 Lopu leana pude vala nia pa pepeso, babe heni nia pa remoremo muzidi pude tana linetelete. Padana sa si pude oki pania mo. Asa sapu ari taliṉana si mani va avoso!” gua se Zisu.