25
Kaiqa Zinama Tumatumae Pule te Solomone
1 Hire pule sari kaiqa zinama tumatumae te Solomone,
ta kubere vagi koari na tie te Hezikaea sa baṉara pa Ziuda:
2 Na vina lavata te Tamasa si pude va paere i si kaiqa ginugua;
ba pude hata vura ni sari ginugua si na vina lavata tadi na baṉara.
3 Gua sapu ululu gua sa maṉauru meke lohi sa lamana,
sari bulodia rina baṉara si lopu boka ta hata vura.
4 Via pani pakia sapu rida koasa siliva,
pude vura sapu boka tavete vura nia tiṉitoṉa tolavaena;
5 gua tugo sa tie totoli kaleana koasa baṉara si va rizu taloa ia sa,
pude sa hinabotu baṉara tanisa si kote nabu meke toṉoto.
6 Mu lopu va ululu pule nigo si goi pa kenuna sa baṉara,
lopu zukuru pule la nigo koari na tie nomadi.*Lk 14:8-10
7 Leana hola si pude zama igo sa, “Sage mae tani,”
hola nia sapu pude ta gegese pa kenudia rina palabatu.
8 Sapu dogoro nia agoi pa matamu
si lopu tuturei paleke la nia pa vetu varipitui,
ura sa si kote boka tavetia goi pa vina betona
be va sosodea sa turaṉamu sapu sea si goi, meke va kurekure igo?
9 Be tokea goi sa turaṉamu pa keke ginugua,
si lopu va vura ia si keketoṉa ta tomena tana votiki tie,
10 ba be kote avoso nia sa tie meke kote va kurekure igo,
meke sa pozapoza kaleana tamugoi si kote koa hola.
11 Na zinama pa totoso gotona si tolava
guana vinasari qolo pa peleta siliva.
12 Guana vikuvikulu qolo babe na pakupaku qolo
sa ginegese tanisa tie gilae la koasa taliṉa sapu okoro va avoso.
13 Guana ibuna sa tototolo totoso pakepakete
si sa tie ta ronuna sapu paleke inavoso, koa rini pu garununa.
14 Guana givusu meke lei loke rukuna,
si sa tie sapu vevehe nia sa vinariponi sapu lopu vala nia sa.
15 Pana hitehite agoi si kote boka va hinokara igo mo sa baṉara,
na zinama va mamamana si boka va moku susuri.
16 Pana dogoro zipale goi, si hena vasinahite mo,
lopu hena va hola, na kote lua mo si goi.
17 Kaiqa totoso mo mamu neti pa vetu tanisa turaṉamu
pana soku totoso, si kote hakohako nigo mo sa.
18 Guana vedara, na magu, babe na tupi ṉaruna
sa tie sapu va sosode kokoha la koasa turaṉana.
19 Guana sigiti livo babe na nene ikena
sa kinalavarae la koasa tie lopu ta ronuna pa totoso tasuna.
20 Guana ta vagi palae sa nobi totoso ibu,
babe na sile ta veko la pa bakora,
sa tie pu kera qetuqetu la koasa pu korapa talotaṉa.
21 Pana ovia sa mua kana, si mu ponia ginani;
be memeha si asa, si mu ponia kolo pude napo.*Rom 12:20
22 Pana gua asa goi, si kote va kurekure ia goi si asa,
meke kote pia igo e Zihova si agoi.
23 Gua sa givusu togarauru sapu paleke mae ruku,
si gua tugo sa mea nanaena sapu va gevuru binugoro.
24 Leana hola si pude koa pa keke hukihukirina sa batu vetu,
hola nia pude koa turaṉia pa keke vetu sa barikaleqe nominomina.
25 Guana kolo ibu koasa tie memehana,
sa inavoso leana sapu mae guana pa seu.
26 Guana ovuku mulakana babe na berukehe bonina
sa tie toṉoto pu va tabe la koasa tie kaleana.
27 Pude hena sigiti zipale si lopu leana,
babe hata vina lavata si lopu doṉo lea.
28 Gua sa vasileana lavata pu huara gore gobana
sa tie sapu lopu boka tuqea sa binugoro.