26
1 Guana sinou pa totoso maṉini meke ruku pa totoso pakepakete,
sa vina lavata si lopu garona sa tie pekipeki.
2 Guana omehe na kakia sapu tapuru holadi
sa lineveleve hoborona si kote hola taloa nana.
3 Guana sekesekeana hose meke kalakalahana doṉ'ki,
sa kolu pa mudina sa tie pekipekina!
4 Mu lopu olaṉia sa tie pekipekina koasa nana zinama hoboro,
na kote meke gugua mo asa si agoi.
5 Olaṉia sa tie pekipeki gua sapu garona sa zinama hoboro tanisa,
pude lopu kote balabala ia sa sapu gilaena si asa, gua.
6 Guana gomu palae kali nene babe napo nelaka,
si pude va garunu inavoso pa limana sa tie pekipeki.
7 Guana nenena sa tie mate nene,
sa zinama tumatumae pa ṉuzuna sa tie pekipeki.
8 Guana patu sapu ta pusi koasa kurukuru paqala,
sa vina lavata sapu ta vala koasa tie pekipeki.
9 Guana duduli rakihi pa limana sa tie vivirina
sa zinama tumatumae pa ṉuzuna sa tie pekipeki.
10 Guana tie gona tupi sapu gona hoboro mo,
sa tie pu tabara hoboro tie pekipeki babe tie ene holadi.
11 Gua sa siki sapu taliri pule la ia sa luana,
sa tie pekipeki sapu tavete pulei sari nana pinekipeki.
12 Dogoria goi keke tie sapu gilaena, gua telena?
Na tie pekipeki si boka tava tumatumae hola nia sapu asa.
13 Na tie hakohako si zama, “Na laione si pa siraṉa,
na laione variva matagutuna si ene pa siraṉa nomana!”
14 Guana tukutuku sasada sapu sigoto koari na hinisi,
sa tie hakohako sapu taliri pa nana teqe.
15 Sa tie hakohako si taṉini la pa ginani,
ba hakohako si asa pude vala nia sa ginani pa ṉuzuna.
16 Sa tie hakohako si gilaena, gua si asa telena
hola ni ka zuapa tie bokabokadi balabala.
17 Guana tie sapu saputu vagia sa siki pa taliṉana
sa tie sapu la somana pa vinari tokei sapu lopu nana.
18 Guana tie duviduvilina sapu gona tupi variva mate
19 sa tie pu sekesekei nia sa turaṉana meke zama, “Na va sisire qua mo!”
20 Pude loke huda si kote mate sa nika;
pude lopu nanae si loke vinari tokei.
21 Guana motete sapu la pa eba, meke na huda pa nika,
sa tie bubugorona sapu podalae varitokei.
22 Sari zinama nanae si guana ginani lomosodi;
ta onolo gore kamo la pa korapa tinina sa tie.
23 Guana raro patu sapu tavasari na
sa beru avoso lea koasa bulo kaleanana.
24 Sa tie ṉoṉovala si tome pule nia koasa beruna,
ba pa bulona si nobi sa sari hiniva kaleadi.
25 Ve avoso lea gua sari nana zinama, ba lopu va hinokaria,
ura sa bulona si siṉia na kinukiti.
26 Sa kinuhana si va paere ia sa koari nana kinohakoha,
ba sari nana hiniva kaleadi si kote ta poho mo koari na tie.
27 Asa pu gelia sa pou, si kote hoqa voi ia mo sa;
sa patu sapu topili sage nia sa tie, si kote topili gore pule la mo koasa.
28 Sa mea kokohana si kanai saripu va sigiti sa,
meke sa ṉuzu sapu zama va lomolomoso si va kamo vinari huari.