27
1 Mu lopu haro ia sa rane vugo,
sina lopu gilania goi sa si kote ta evaṉa pa rane asa.*Zem 4:13-16
2 Mani votiki tie vahesi igo, lopu sa ṉuzumu telemu;
votiki tie tu, lopu sa berumu telemu.
3 Na patu si mamata, meke na onone si gua tugo,
ba sa vina karikari tanisa tie pekipeki si mamata hola ni sari karua.
4 Binugoro si ṉoṉovala meke tinaṉaziri si huhuara,
ba esei boka va tia ia sa kono?
5 Leana hola sa vari gegese vurai,
hola nia sa tataru tomena.
6 Na bakora koasa mua baere si leanana,
ba balau ni sari hinapahapa sokudi tanisa mua kana.
7 Asa pu ele deṉa si lopu kote hiva hena zipale,
ba koasa tie oviana si sa pasana ba kote lomoso gunia sa.
8 Guana kurukuru sapu koa va seu koasa nana vori
sa tie sapu ene va seu pa nana vetu.
9 Na lumu meke na oela humaṉa lea si va qetuna sa bulo,
meke sa lineana tanisa mua baere si guana ginani lomosona.
10 Mu lopu luara pania sa mua baere meke sa baere tanisa tamamu,
meke lopu la pa vetu tanisa tasimu pana raza igo tinasuna,
sa turaṉamu pa kalimu si leana hola nia sa tasimu pa seu.
11 Tuqu, mu gilae, mamu va qetua sa buloqu;
pude qu olaṉi sarini pu zama va gore au.
12 Sa tie balabala valeana si dogoria sa tinasuna meke tome;
ba sa tie pupuhu si totoro la meke ta raza nia sa.
13 Vagia sa poko tanisa tie pu va egoa pude lipua sa gale tanisa votiki tie;
tuqe vekoa osolae lipua sa sa gale tanisa tie karovona.*Sa tie karovona babe sa barikaleqe barabaratana.
14 Be pana munumunu hokara si mana nia sa tie si keke turaṉana, meke velavela nia sa,
si kote ta avoso guana lineveleve mo.
15 Na barikaleqe nominomi si guana
honihoni pa vetu totoso rukuruku.
16 Sa vina nosona si guana vina nosona sa givusu,
babe guana taṉini vagi oela pa lima.
17 Gua sapu sa aeana va ṉarua sa aeana,
sa tie va tumatumae ia sa si keke tie pule.
18 Asa pu kopu nia sa huda piqi si kote hena ia tugo sa vuana,
meke sa nabulu pu kopu nia sa nana palabatu si kaqu tava lavata.
19 Gua sapu dogoria goi sa isumatamu pa kolo,
sa bulona sa tie si ta dogoro koasa tie.
20 Na minate meke na tinahuara si lopu boka deṉa,
meke gua tugo sa matana sa tie.
21 Na siliva meke qolo si tava via pa nika,
ba sa tie si ta podeke koari na vinahesi pu vagi sa.
22 Be nuqaria goi sa tie pekipeki pa hao,
guana talo sapu nuqara nia tutu goi,
ba lopu kote boka vari paqaha nia goi si asa koasa nana dinuviduvili.
23 Kaqu tumae nia goi vegua sari mua sipi na qoti,
mamu kopu valeanani sari mua bulumakao;
24 ura sa tinagotago si lopu koa hola ninae rane,
meke sa binaṉara si lopu koa hola koari na sinage na sage.
25 Mudina sapu ta koto vagi sa duduli bulumakao, meke toqolo vura sari vaquradi,
meke ta koto vagi tugo sari duduli koari na toqere,
26 si sari na lami kote boka ponigo poko,
meke sari na qoti boka holu pule ponigo pepeso.
27 Kote soku nigo na meleke qoti
pude tamugoi meke sa mua tatamana,
gua tugo sari mua nabulu vineki.