9
Sa Ginilagilana Lohina meke sa Dinuviduvili
1 Sa ginilagilana lohina si ele kuri ia sa nana vetu;
meke ka zuapa dedegerena.
2 Na inevaṉa si nama nia sa meke heni nia kolo sa sa vaeni;
meke sa tevolo si va nama ia sa.
3 Sari nana nabulu vineki si ele garuni sa pude ruvaruvata,
meke titioko si asa pa vasina ululuna koasa vasileana,
4 meke zama, “Mi mae gamu doduru pu lopu goto, nuquru mae tani!”
gua si asa koarini pu lopu tumae balabala.
5 “Mae mamu henai sari ginani hire
mamu napoa sa vaeni sapu ele heni vekoa rau.
6 Veko pani sari mia hahanana pupuhudi pude mi toa;
pude mi ene pa siraṉa tadi tie gilaedi.
7 Asa pu norea sa tie pesipesi hoboro si aqa ta ruba mo;
asa pu la tokea sa tie kaleana si aqa ta ṉovala mo.
8 Mu lopu norea sa tie pesipesi hoboro, na kote kana igo sa;
ba tokea sa tie gilagilana, meke kote tataru nigo sa.
9 Tarae nia sa tie gilaena, mani gilae nono latu si asa;
va tumatumae ia sa tie toṉoto meke kote tumae lala nana si asa.
10 Sa pinamaṉana e Zihova si na pinodalaena sa ginilagilana lohina,
meke pude tumae nia sa Tamasa Hopena si na ginilae.*Zob 28:28; Sam 111:10; ZT 1:7
11 Ura mi ene gua koa rau, pude soku sari mia rane,
meke soku vuaheni si kaqu ta tomo atu pa mia tinoa.
12 Be gilae si goi, sa mua ginilagilana lohina kote pia igo;
ba pana kilu au goi, si telemu mo kote ṉovala pule nigo.”
13 Sa barikaleqe, sapu e Duvili pozana si vevehe hola;
na lopu tumae balabala si asa meke loketoṉa gilania.
14 Habotu si asa pa sasada koasa nana vetu,
babe pa keke vasina ululuna koasa vasileana,
15 meke kukili vura la koa rini pu ene hola;
pu korapa ene pa dia siraṉa.
16 “Gamu pu pupuhu si mi nuquru mae tani!”
gua si asa koarini pu lopu tumae balabala.
17 “Na kolo ta hikona si lomoso;
meke na ginani ta hena tomena si hena lea hola!”
18 Ba lopu gilania rini sapu koa ia minate sa vasina asa;
na popoa tadi tie matedi sa vetu tanisa.