8
Sa Tinioko Tanisa Ginilagilana Lohina
Va avoso! Sa ginilagilana lohina si korapa titioko!
Korapa hiva ta avoso sa ginilae.* ZT 1:20-21
Koari na siraṉa pa batu toqere,
meke turu nana koari na vari pazadi.
Tata pa sasada nuquru koari na vasileana nomadi;
koari na siraṉa la pa vasileana si kukili vura si asa:
“Koa gamu doduru tie si titioko vura si rau;
zama va ululae si arau koa gamu doduru tinoni,
Gamu pu pupuhu, mi vagia sa ginilae;
gamu na pekipeki si mi vagia sa ginilagilana.
Avoso mae, ura na ginugua arilaedi si kote zama ni rau;
na toṉotodi si kote zama ni sa beruqu.
Sa ṉuzuqu si zama va hinokara,
meke na kokoha si kaleana pude tozia pa beruqu.
Doduru zinama pa ṉuzuqu si toṉoto,
lopu keke si kaleana babe turaṉa va sea tie.
Koa rini pu vizavizata va toṉoto si toṉotodi mo sari qua zinama,
meke kalalasa koarini pu gilagilana.
10 Sa qua tinarae si mamu vizata vagia lopu sa siliva;
na tinumatumae lopu sa qolo arilaena.
11 Ura sa ginilagilana lohina si arilaena hola nia sa patu ṉedala,
meke loketoṉa sapu okoro nia goi si boka va padapada la nia goi koa sa.
 
12 Arau, sa ginilagilana lohina si koa turaṉia sa ginilae pude vizata valeana;
arau tagoa sa tinumatumae meke sa vinilasa toṉotona.
13 Pude pamaṉa nia se Zihova si na hinakohakona sa kinaleana;
arau kana ia sa vinahesi pule meke sa vina titie,
gua tugo sa hahanana kaleana meke sa kokoha.
14 Sa variponi binalabala meke sa vinizata toṉoto si taqarau;
arau tagoa sa ginilagilana meke sa ṉiniraṉira.
15 Koa rau si tuturaṉa sari na baṉara
meke sari koimata si tavete tinarae sapu ṉoṉo;
16 koa rau si totoli sari palabatu,
meke sari doduru koimata pu kopu nia sa kasia popoa.
17 Tataru ni rau sarini pu tataru nau,
meke arini pu hata au si dogoro au tugo.
18 Koa rau koa sari tinagotago meke vina lavata,
sa tinago sapu koa hola meke sa kinoa valeana.
19 Sa vuaqu rau si leana hola nia sa qolo viana,
sapu podaka vura koa rau si hola nia sa siliva arilaena.
20 Arau si lulia sa hahanana sapu ṉoṉo,
meke ene pa siraṉa sapu toṉoto,
21 va tago i sarini pu tataru nau,
meke va siṉi ni likakalae arilaedi rau sari dia vetu.
 
22 Se Zihova va podaka kekenu au si rau koari Nana tinavete,
sipu lopu ele sari doduru pule.* Rev 3:14
23 Arau si ta vizata pukerane latu,
pa pinodalaena sipu lopu ele podaka sa kasia popoa.
24 Sipu lopu ele koa sari na kolo lamana,
meke lopu ele koa sari bukaha sapu gavoro va soku kolo si podo si rau.
25 Sipu lopu ele tava garo la pa dia vasidi sari na toa,
meke lopu ele koa sari na toqere, si podo si rau.
26 Sipu lopu ele tavetia Sa sa kasia popoa meke sa pepesona,
babe sa kavuruna sa kasia popoa si podo si rau.
27 Arau si koa qua totoso va garo la nia Sa sa maṉauru pa nana vasina,
totoso gasi vura nia Sa sa hubi lamana,
28 totoso vekoa Sa sa galegalearane meke sari na lei panaulu
meke tukeli sari bukaha pa lamana peava,
29 totoso vekoa Sa vasina kote kokoi sa kolo hokara,
meke volosi Sa sari na kolo pude kopu ni dia boku,
meke totoso podalae kuria Sa sa kasia popoa.
30 Arau mo sa Nana tie tavetavete pu koa pa kalina Sa.
Siṉi au na qinetuqetu ninae rane,
qetuqetu lamo si rau pa kenuna Sa.
31 Qetuqetu nia rau sa kasia popoa Tanisa
meke qetu ni rau sari tiena sa kasia popoa.
 
32 Ego gamu na tuqu, mi avoso mae koa rau;
ta manae si arini pu kopu ni sari qua tinarae.
33 Va avoso mae koasa qua vina tumatumae pude mu gilae;
mi lopu kilu ia.
34 Ta manae sa tie pu va avoso mae koa rau,
pu kopu totoko nia sa qua sasada,
pu koa aqa pa qua sasada vetu.
35 Ura asa pu dogoro vagi au si vagia tugo sa sa tinoa,
meke kaqu qetu nia tugo e Zihova si asa.
36 Ba asa pu lopu boka dogoro vagi au si ṉovala pule nia;
meke doduru pu kana au si tataru nia rini sa minate.”

*8:1 ZT 1:20-21

*8:22 Rev 3:14