11
Sa Rinaṉeraṉe Hinokara koe Zihova
(Keke kinera te Devita)
Koe Zihova si aqorae si rau.
Na vegua ke zama si gamu,
“Mu govete guana kurukuru tapuru la koari na toqere,
ura dotu, malosi rina tie kaleadi sari na dia bokala,
meke ṉave va totoanae ni rini sari na dia tupi,
pude gona golomi pa hupohuporona saripu toṉoto pa bulodia.
Be ta huara palae sari na sinokirae nabudi pa tinoa,
si loketoṉa si kaqu boka evaṉia rina tie toṉoto,” gua?
 
Ba se Zihova si koa Nana pa Nana Zelepade Hope,
meke pa Nana habohabotuana baṉara pa Maṉauru.
Hakehakei ni Sa sari na tinoni pa doduru vasina
meke gilani Sa gua sapu korapa taveti rini pa pepeso.
Podeki e Zihova sari na tie toṉoto na tie kaleadi,
meke etuli Sa sari na tie kaleadi pu hoke seke tinarae.
Kaqu va rukuni motete na patu leradi Sa sari na tinoni kaleadi,
meke kaqu va kilasa ni givusu maṉinina Sa si arini.
 
Ura na toṉoto se Zihova,
meke qetu ni Sa sari na tinavete toṉoto,
ke tale saripu toṉoto mo si kaqu dogoria sa Isumatana Sa!