12
Vinaravara Tinepa Tinokae
(Keke kinera te Devita)
1 Ke Zihova, mae Mamu tokani gami,
sina ele murimuri palae sari na tie toṉoto,
meke lopu ta dogoro sari na tie ta ronuedi pa pepeso.
2 Hoke varikokohai sari doduru tinoni,
zama vura ni rini sari na zinama lomosodi,
pude sekesekei ni sari na turaṉadia.
3 Ke Zihova, Mamu va mate pani sarini pu zama va lomolomoso,
Mamu va betoi sarini pu vahesihesi puleni,
4 saripu zama guahe:
“Kaqu vagi gami sapu gua hiva ni gami koari na mami zinama lomosodi,
kaqu mataqara sari na mami zinama.
Loke tie si kaqu boka va noso gami,” gua.
5 “Ba kaqu mae si Rau kamahire
pude tokani saripu habahuala na ta ṉoṉovala,
meke sarini pu silava na ta sigiti pa tinoketoke.
Kaqu kopu ni Rau si arini koari na tie ṉoṉovala,” gua se Zihova.
6 Sari na vina tatara te Zihova si hinokara tugo,
guana siliva sapu ta kina va via ka zuapa totoso koasa nika.
7-8 Koa vari likohaeni gami ri na tie kaleadi,
ari doduru si okoro nia sa kinaleana.
Kei Zihova, mu kopuni gami,
Mamu va sare gami koasa sinage kaleana hie!