34
Tavahesi sari na Tinavete Leadi te Tamasa*1 Samuela 21:13-15
(Keke kinera te Devita totoso pekipeki si asa meke tavasare si asa koasa baṉara Abimeleki.)
1 Kaqu va lavatia rau se Zihova doduru totoso.
Lopu kaqu makudo sa qua vinahesi la koa Sa.
2 Kaqu va lavatia rau se Zihova, koari doduru Nana tinavete,
sarini pu ta ṉoṉovala si kaqu avosia meke koa qetu.
3 Aria mada tozi vura nia sa vina lavatana e Zihova;
mada keke gua vahesia sa pozana Sa!
4 Tepa la ia rau se Zihova meke olaṉia Sa sa qua vinaravara;
vata rupahau Sa koari doduru qua minatagutu.
5 Sarini pu ta ṉoṉovala si kalavarae koa Sa meke koa qetu,
lopu kaqu hite tava kurekure si arini.
6 Koa pa tinasuna nomana si rau meke tepa la koe Zihova,
meke avosau Sa si rau.
Harupau Sa si rau koari doduru qua tinasuna.
7 Sa mateana te Zihova si koa kapae meke kopu ni sarini pu pamaṉa nia si Asa,
meke harupi Sa pa dia tinasuna.
8 Podekia mamu tumae nia, sapu leana sa hahanana te Zihova.*1 Pit 2:3
Qetu tugo si asa sapu kalavarae koa Sa.
9 Mi pamaṉa nia se Zihova, gamu na tie toṉoto,
ura sa tie sapu va tabea se Zihova si lopu kaqu ehaka nia keke tiṉitoṉa.
10 Sari na laione si hoke malohoro na ovia,
ba arini pu va tabea se Zihova si lopu ehaka nia si keketoṉa leana.
11 Ke gamu kasa na koburu, mi avoso mae au,
maqu va tumatumaeni gamu sa pinamaṉana e Zihova.
12 Esei gamu si okoro nia sa tinoa gelenaena meke sa kinoa learane,*1 Pit 3:10-12
pude toa va gelenae nana pa qinetuqetu?
13 Mamu kopu nia sa meamu, meke sa berumu,
pude lopu zama va kaleana na zama kokoha.
14 Luaria sa kinaleana,
mamu tavetia gua sapu leana,
mamu lopu makudo hata sisigitia sa binule koari na tie.
15 Kopu ni e Zihova sari na tie toṉoto,
meke va avosi Sa sari na dia tinepatepa.
16 Ba kana i e Zihova sarini pu tavete va sea,
pude va mate pani si arini
meke lopu sana ta muliṉae palae si arini.
17 Sari na tie toṉoto si tepa la koe Zihova, meke avosi Sa.
Va sarei Sa koari doduru dia tinasuna.
18 Koa tata se Zihova koarini pu koa talotaṉa sisigiti nia sa dia sinea,
meke harupi Sa sarini pu lopu kalavarae pa dia binokaboka soti.
19 Sa tie toṉoto si koa ta sigiti koari soku tinasuna,
ba tava leseve koe Zihova si asa koari doduru.
20 Kopu nia e Zihova si asa,
meke lopu keke ri na susurina si ta moku.*Zn 19:36
21 Kaqu tava mate koari na dia kinaleadi sari na tie va gugue,
meke sarini pu kukiti ni sari na tie toṉoto si kaqu tava kilasa.
22 Harupi e Zihova sari Nana nabulu,
meke sarini pu aqorae koa Sa si kaqu tava sare tugo!