2
Sa Patu Toana, meke sa Nana Butubutu Madina
Mi veko pani sari doduru mia kinaleadi: na kinohakoha, na sinekesekei, na kinonokono, meke doduru zinama ṉoṉovala. Gua ri na koburu haha pu tiqe pododi sapu okoro nia sa meleke, si mi okoro nia sa ginani maqomaqo hinokara, sapu sa vina tumatumae te Tamasa, pude boka toqolo sage koasa tinaharupu mia. Ura tiqe gilania mia mo gamu sa guguana sa tataru va tukana tanisa Baṉara.* Sam 34:8
Mi mae koasa Baṉara toana, sapu kekeṉoṉo guana Patu sapu loke laena pa tie, ba arilaena pa vinizata te Tamasa. Gamu si korapa somana tugo gua rina patu toamia pu ta tavetavetae pa kinurina sa Zelepade te Tamasa. Na butubutu hiama si gamu tava madimia koe Tamasa, gamu pu taveti sari na vinariponi na vina vukivukihi pa tinoa maqomaqo mia. Arini sari na vinariponi na vina vukivukihi pu va qetua sa Tamasa pa korapana Zisu Karisito. Ura zama sa Tamasa pa Kinubekubere Hope:* Ais 28:16
“Ele vekoa Rau si keke patu pa Zaione,
na patu arilaena meke ta vizatana pude na sinokirae.
Meke asa pu va hinokaria si Asa,
si lopu kaqu tava kurekure,” gua.
Hie si na patu marilaena koa gamu pu va hinokara, ba koa rini sapu lopu va hinokara si guahe:* Sam 118:22
“Sa patu sapu kilua rina tie kuri vetu,
si asa tugo si arilaena hola koari doduru patu.”
Keke Kinubekubere Hope pule si zama guahe:* Ais 8:14-15
“Hie tugo sa patu sapu kote va tubarae i sari na tie,
sa patu sapu kote va hoqai si arini.”
Tubarae ni si arini sina lopu va hinokaria rini sa zinama te Tamasa, gua sapu ele vizata vekoa Sa pude tadirini.
Ba gamu sina butubutu ta vizata mia, na butubutu hiama tanisa Baṉara, na butubutu tava madi mia, meke na tinoni soti te Tamasa. Ta vizata si gamu pude tozi vurani sari na tinavete variva magasadi te Tamasa, Asa pu tioko vurani gamu pa hinuporo, pude koa pa Nana kalalasa marilaena.* Ekd 19:5-6; Ais 43:20,21; Diut 4:20, 7:6, 14:2; Ta 2:14; Ais 9:2 10 Koari na totoso ele hola si lopu na tie te Tamasa si gamu, ba kamahire si na tinoni Tanisa si gamu. Koari na totoso ele hola si lopu tagoa gamu sa Nana tataru variva taleosae, ba kamahire si ele tagoa gamu si asa.* Hoz 2:23
Sari na Pinausu te Tamasa
11 Kasa qua baere ta tataruemia, tepa zoṉazoṉa gamu rau si gamu sapu na tie karovomia koasa kasia popoa hie, mi lopu vala puleni gamu koari na inokoro sea tana tini, sapu varipera doduru totoso koa sa mia tinoa vaqura. 12 Sari na mia kinokoa pa vari korapadi rina tie pu lopu va hinokaria se Karisito, si mani gotogoto pa lineana, pude pana zutuni gamu tie kaleamia rini, si kote dogori rini sari na mia tinavete leadi, meke vahesia sa Tamasa koasa rane pu kaqu pule mae ia Sa.
13 Pa ginuana sa Baṉara, si mi va tabei sari doduru tie pu tuqei sari na ṉiniraṉira koasa binaṉara pa pepeso: koa sa ṉati baṉara nomana pa qinavuna, 14 meke koari na qavuna koari hopeke popoa pu ele vizati na va turui Sa pude va kilasi saripu tavete va sea, meke va lavati saripu tavete valeana. 15 Ura hivani gamu sa Tamasa pude koari na mia tinavete leadi, si kote tava mokomoko sari na zinama pekipekidi tadi na tie duviduvilidi. 16 Mi koa guana tie ta rupaha mia; ba mi lopu tavetavete nia sa mia tinarupaha pude va paere i sari mia tinavete sea, ba mi koa guana nabulu te Tamasa. 17 Mi koa pamaṉa koari doduru tie, mi tataru ni sari na tasimia koe Karisito, mi pamaṉa nia sa Tamasa, mi pamaṉa nia tugo se Siza, sa mia ṉati baṉara.
Sa Kinehana sa Tinasigiti te Karisito
18 Gamu na pinausu, mi va tabei sari na mia palabatu pa tinavete; mi pamaṉa ni si arini, lopu sarini mo pu hoke tataru ni gamu, na ṉoṉo koa gamu, ba gua tugo koarini pu hoke ṉoṉovala gamu. 19 Kote va qetua gamu sa Tamasa, be koa va nabu si gamu koari na tinasigiti totoso lopu tavete va sea si gamu, sina gilania gamu sapu na hiniva te Tamasa si pude gua asa si gamu. 20 Na lineana sa si kote vagia gamu, be ta komiti si gamu koa sa mia tinavete kaleana? Ba be koa va nabu si gamu koasa tinasigitina sa tinavete leana si kaqu qetu ni gamu sa Tamasa si gamu. 21 Pa ginugua asa si tioko gamu sa Tamasa pude keha lulia se Karisito. Ura Karisito telena si ele koa ta sigiti ni gamu, meke ele vekoa Sa si keke kineha leana, pude kaqu lulia gamu.
22 Loke sinea si tavetia Sa,
meke loke zinama kokoha si zama nia Sa.* Ais 53:9
23 Totoso ta zama ṉoṉovala si Asa, si lopu olaṉa hobei Sa pa ṉinovaṉovala. Totoso tava sigiti Sa, si lopu podekia Sa pude zama hobena, ba kalavarae zoṉazoṉa si Asa koasa Tamasa, sa tie varipitui toṉotona.* Ais 53:7 24 E Karisito telena si ele paleke lani pa korosi pa tinina soti sari nada sinea, pude luara pani betoi gita sari nada sinea, gua na tie matena pu lopu boka tavete sea, meke pude toa nia gita sa tinoṉoto. Koari na bakorana Sa si ta salaṉa si gamu.* Ais 53:5-6 25 Ura koari na totoso ele hola si koa guana sipi muliuṉu si gamu, ba ele turaṉa puleni gamu Tamasa si gamu pude lulia se Karisito sa Sepati, sa Tie sapu kopu ni sari na mia tinoa.* Ais 53:6

*2:3 Sam 34:8

*2:6 Ais 28:16

*2:7 Sam 118:22

*2:8 Ais 8:14-15

*2:9 Ekd 19:5-6; Ais 43:20,21; Diut 4:20, 7:6, 14:2; Ta 2:14; Ais 9:2

*2:10 Hoz 2:23

*2:22 Ais 53:9

*2:23 Ais 53:7

*2:24 Ais 53:5-6

*2:25 Ais 53:6