8
Sa Tuna Aisea si na Vina Gilagila koari na Tie
1 Zama se Zihova koa rau, “Mu vagia keke pepa tana kubekubere ta viqusuna, nomana, mamu kubere va bakalia vasina sa pozapoza hie: ‘Mahea-Salala-Hasi-Bazi,’ gua. 2 Meke kote tioki Rau sari Uraea sa hiama meke Zakaraea sa tuna e Zeberekaea, karua tie ta ronudi, pude va sosode poni Au.”
3 Meke la puta turaṉia rau sa qua barikaleqe, meke aritiana si asa meke podoa sa si keke tuna koreo. Meke zama se Zihova koa rau, “Mu poza nia ‘Mahea-Salala-Hasi-Bazi.*Sa ginuana sa pozapoza Mahaea-Salala-Hasi-Bazi si “Aria-Hikohiko-Tuturei-Zau-Vagi.”’ 4 Sipu lopu ele tumae nia sa koburu pude zama ‘Papa’ meke ‘Mama’, si sari tinagotago pa Damasikasi meke sari tiṉitoṉa ta hikodi pa Sameria si kote ta paleke taloa beto koasa baṉara pa Asiria,” gua.
Sa Baṉara pa Asiria si Korapa Mae
5 Zama pule mae koa rau se Zihova:
6 “Sina kilua ri na tie pa Ziuda
sa tototolo bulebulena pa Saelo,*Saelo si na popoa koa ia sa Ipi hopena meke e Zihova pukerane.
meke qetuqetu nia rini sa baṉara Rezini
meke sa baṉara Peka.
7 Ke kote la se Zihova meke va raza ni koa rini sa baṉara pa Asiria, meke sa nana qeto minate,
sapu kekeṉoṉo guana na naqe ṉiṉirana pa ovuku.
Kote sage sa naqe
meke holani sari taqelena,
8 meke kote totolo ṉiṉira meke nuquru la pa Ziuda,
kote siṉi sage vasina osolae kamo pa asedi rina tie.
Kote repahi sa naqe sari tatapuruna meke nobi betoa mo sa sa doduruna sa popoa Ziuda.
Kei Imanuela! Tamasa, Mu koa turaṉa gami.”
9 Mi matagutu, gamu pa votiki butubutu!
Mi va avoso, gamu pa popoa seu.
Mi va qaqiri pude varipera, ba mi matagutu!
Uve, qaqiri pude varipera, ba mi matagutu,
sina kaqu tava kilasa si gamu.
10 Mi rove valeania kote vegua sa rinapata, ba kote loke laena;
mi tavete vura nia sa hiniva pude varipera, ba lopu kote boka tugo;
ura sa Tamasa si koa turaṉa gami.
Va Balau ia e Zihova sa Poropita
11 Meke zama se Zihova koa rau, meke sa limana ṉiṉirana si va hake mae nia Sa koa rau; va balau au Sa si arau pude lopu lulia sa hahanana tadi na tinoni. Zama si Asa:
12 “Lopu poza nia vinariva egoi koari na kana pude huaria sa binaṉara
sari doduru ginugua sapu ta pozae vinariva egoi koari na kana;
mu lopu matagutu ni gua sapu matagutu ni ari kasa,
meke lopu holoqoru ni si arini.*1 Pit 3:14-15
13 E Zihova Tadi na Qeto Minate eke mo si kote va hope ia goi,
Asa eke mo si kote pamaṉa nia goi,
Asa eke mo si kote matagutu nia goi,
14 meke Asa si kote na tometomeana;
ba koari na tie Izireli meke Ziuda si kote na
patu si Asa sapu kote va tubarae i sari na tie,
meke na patu sapu va hoqai sari na tie,
meke koari tie pa Zerusalema si kote
na sipata meke na sipele si Asa.*1 Pit 2:8
15 Soku arini si kote ta tubarae;
kote hoqani meke lopu boka gasa turu pule
kote ta sipata vagi meke ta raovo taloa.”
Na Vina Balau koasa Tinepa Tinokae koari na Tie Matemateana
16 Kopu nia sa Inavoso te Tamasa,
meke va naqitia sa Qua kinorokorotae, gamu na qua disaepeli.
17 Arau kaqu aqa nia se Zihova,
sapu taliri va seu koari na tuna Zekopi.
Koa Sa si kaqu vekoa rau sa qua rinaṉeraṉe.*Hib 2:13
18 Hiera si arau, meke sari na koburu pu poni au e Zihova. Gami sari na vina gilagila meke na vina nonoga pa Izireli ta garunu mae gua koe Zihova Tadi na Qeto Minate, Asa pu koa pa toqere Zaione.*Hib 2:13
19 Pana tozi nigo ri tie pude nanasi sari na tie matemateana na tie sabusabukae, saripu hoke manamanasa na qimuqimutu sapu vea, lopu kote nanasa la tu sari tie koasa dia Tamasa? Na vegua ke kaqu nanasa poni tu sari tie toadi koari tie matedi? 20 Mu doṉo la koasa tinarae meke inavoso te Tamasa! Pana lopu luli rini sari Nana zinama, si na loke dia kalalasa si arini.
Na Totoso Tasuna si Kamo
21 Nunala meke ovia, ke kote ene vilorae ia rini sa popoa; totoso ovia mate, si kote bugoro si arini meke ta ṉaziri, meke kote doṉo sage si arini meke leve nia rini sa dia baṉara meke sa dia Tamasa. 22 Meke kote tiro gore ia rini sa pepeso, meke na tinasuna, na hinuporo variva matagutu mo si kote dogoria rini. Meke kote ta oki la si arini koasa vasina sapu huporo dudukurumuna,