28
Na Vina Balau koasa Butubutu Iparemi
1 Mani talotaṉa sa vina sari havoro isa, sa vina lavata pule tadi na tie viviridi sara pa butubutu Iparemi,
koasa havoro sapu ele pureke nana tinolava isa,
sapu hake pa batuna sa lolomo masuruna,
koasa vasileana nomana asa, sa dia vina lavata ari kasa pu eko puta pa vaeni!
2 Doṉo la, se Zihova si tagoa si keke tie mataqarana meke ṉiṉirana.
Sa tie asa si guana ruku kabukabue aesi meke na givusu vivirua,
guana ruku sapu lulia na givusu meke zoropae guana naqe,
sapu kote buli gore la pa pepeso sa vasileana nomana.
3 Sa vina sari havoro isa, sa vina lavata pule tadi na butubutu Iparemi, sari tie viviridi sara,
si kote ta neti gore la pa pepeso.
4 Sa havoro sapu ele pureke nana tinolava isa,
sapu hake pa batuna sa lolomo masuruna
si kote guana vua piqi sapu sagana kekenu,
totoso dogoria ri na tie si kote saputu vagia,
meke hena ia.
5 Koasa rane asa si se Zihova Tadi na Qeto Minate
si kote guana toropae baṉara tolavaena,
na piribatu leleana tadi kasa Nana visavisa tinoni pu koa hola.
6 Kote na Maqomaqo pude viliviliti va toṉoto si Asa
koa sa pu habotu tavetena sa vinari pitui,
na ṉiniraṉira si Asa koa rini
pu va tia ia sa vinaripera pa sasadana sa goba pa vasileana.
Aisea meke sari na Poropita Viviridi pa Ziuda
7 Meke arini tugo si tedeve pa vaeni
meke viviri pa napo bia:
Sari hiama meke poropita si tedeve pa bia
meke va pupuhi na vaeni;
viviri pa napo bia,
tedeve totoso va dogoroni Tamasa sari kaiqa dinogodogorae,
ta tubarae ni totoso vilavilasa pa vinaripitui.
8 Sari na tevolo pu haboti rini si tale luadi mo,
meke loke vasina si hite via.
9 “Ke esei si podekia sa pude va tumatumae ia?
Koe sei si korapa va bakabakala la inavoso sa?
Koari na haha pu tiqe podalae hena ginani,
koa rini pu tiqe luara susu?
10 Keke ṉoṉodi mo sari vina tumatumae zama pilipuleni sa:
Hie si keke, isana si keke,
beto keke tokele zinama si keke pule,
vasinahite tani, vasinahite tana.”
11 Ba leana, pa beru karovodi meke pa votiki vinekala
si kote zama la sa Tamasa koari Nana tinoni,*1 Kor 14:21
12 koa rini sapu ele zama la guahe si Asa,
“Hie sa vasina magomagogosoana,
madi mae magogoso tani sarini pu mabo,” meke, “Tani sa vasina pude koa noso,”
ba lopu hiva avoso si arini.
13 Gua asa ke sa zinama te Zihova la koa rini si kote: Hie si keke, isana si keke,
beto keke tokele zinama si keke pule,
vasinahite tani, vasinahite tana;
pude madi ene la meke ta tubarae ni,
madi bakora meke ta sipata vagi meke ta zau taloa.
Na Inavoso tadi pa Zaione
14 Ke mi avosia sa zinama te Zihova, gamu pu lopu raṉe ia si Asa,
meke gamu pu baṉara ni sari na tie pa Zerusalema.
15 Zama va titie guahe si gamu, “Gami si ele tavetia sa vinariva egoi koasa minate,
koasa lovu si ele variva egoi gami.
Pana kamo mae si keke vinaripera nomana,
si lopu kaqu tiqu gami sa si gami,
ura ele vekoa gami sa koha pude koa sa kote la aqoro,
meke na sinekesekei sa mami tometomeana.”
16 Ke guahe sa zinama te Zihova sa Baṉara:
“Doṉo la, va ekoa Rau si keke patu pa Zaione,
na patu sapu ele ta podekena,
na patu arilaena pude va sokirae nia vetu.
Asa pu raṉea si lopu kaqu bebeno hiva govete.*Sam 118:22-23; Rom 9:33, 10:11; 1 Pit 2:6
17 Sa vinilasa toṉotona si kote tavetavete nia Rau pude ṉava ia sa vetu,
meke sa tinoṉoto guana aroso sapu koa ia mamamata;
na ruku kabukabue aesi kote paleke taloa nia sa mia aqoro, sapu sa kokoha,
meke na naqe kote huara pania sa mia tometomeana.
18 Sa mia vinariva egoi koasa minate si kote tava noso;
sa mia vinariva egoi koasa lovu si kote kokoi.
Pana raza atu sa vinaripera nomana
si kaqu ta ene nia gamu.
19 Meke doduru totoso sapu kamo atu sa si kote paleke taloa ni gamu sa;
kamo keke munumunu, hola keke munumunu, pana rane meke pana boṉi,
kote paleke taloani gamu sa.”
Sa ginilagilanana sa inavoso asa
si kote variva tarazuzuna!
20 Sa teqe si papaka hola pude eko nadoro sa tie,
sa nobi si lopu labe pude hade nia.
21 Se Zihova si kote varipera, gua sapu tavetia Sa pa toqere Perazimi,
meke gua sapu tavetia Sa pa Lolomo Qibione,
pude tavetia sa Nana tinavete, sa Nana tinavete variva magasa,
meke evaṉia sa Nana hiniva, na tinavete karovona.*Zos 10:10-12; 2 Samuela 5:20; 1 Koron 14:11
22 Ego, noso gamu! Lopu va sisire,
be lopu gua si kote mamata nono la sa mia tinasuna;
e Zihova Tadi na Qeto Minate si ele tozi nau
sa tinahuara sapu ele ta korotae koasa doduruna sa popoa.
Sa Ginilagilana Maena Koe Tamasa
23 Va avoso, mamu avosia sa mamalaiṉiqu;
noso, mamu avosi sari qua zinama.
24 Pana la piki sa tie pude lelete, si vea kote piki lamo si asa?
Vea, kote geli lamo ia sa sa pepeso meke lopu lelete?
25 Pana va nama ia sa sa pepeso,
si vea, lopu lete ia sa sa kiko dili meke taburu nia sa sa kiko kumini?
Vea, lopu lete ia sa sa huiti pa nana ilaka,
na bale pa nana lolomo,
meke kaiqa kiko pule si pa hukihukiri inuma?
26 Sa nana Tamasa na va tumatumae ia si asa
meke tozi nia Sa sa hahanana tavetavete.
27 Sa dili si lopu kote ta paqaha kiko koari na qaqalotodi pa hatara huda nomana,
meke sa totopili munamunalana si lopu kote topili va munala nia koasa kumini;
na dili si kote seke nia pa huda hite pude paqahia,
meke na kumini si pa kolu.
28 Na kiko huiti si tana bereti meke kote muzara lea mo;
ke lopu paqapaqaha lamo kiko si arini koari na qaqalotodi.
Tumae nia sa pude lopu neti va muzari na hose meke na totopili sari na kiko,
ba koa dia sari patu muzamuzarana.
29 Doduru hire si mae guadi koe Zihova Tadi na Qeto Minate,
na titisa leana hola meke tolavaedi sari Nana ginilagilana.